Read Hmong Njua Exethaws 9 Bible Online

Exethaws 9 - Hmong Njua bible

Exethaws 9

¹Thaus txug nub kaum peb, lub kaum ob hlis kws yog lub hli Adas, yog nub kws yuav ua lawv le vaajntxwv tau saamfwm tseg rua huv nwg tsaab ntawv, hab yog nub kws cov Yudais cov yeebncuab ca sab has tas, puab yuav yeej cov Yudais, tabsis nub ntawd ca le hloov moog ua nub kws cov Yudais yeej puab cov yeebncuab lawm.

²Cov Yudais txhaj tuaj sis sau ua ke taagnrho rua huv puab tej nroog hab huv txhua lub xeev kws vaajntxwv kaav, npaaj tawmtsaam cov yeebncuab kws tuaj tua puab, tsi muaj leejtwg yuav tiv tau cov Yudais le, rua qhov cov tuabneeg kws nyob txhua qhov chaw puavleej ntshai cov Yudais heev.

³Taagnrho cov numtswv ntawm txhua lub xeev, tsi has txhua tug tswv xeev, txhua tug tsaavxwm hab taagnrho vaajntxwv cov numtswv txhua tug, puavleej paab cov Yudais, vim puab ntshai nyob tsaam Maudekhais muab puab tua povtseg.

⁴Maudekhais tau ua tug luj nyob huv vaajntxwv lub loog, hab nwg lub koob lub npe nrov nchaa moo lug moog thoob plawg txhua lub xeev hab Maudekhais muaj fwjchim luj zuj zug tuaj.

⁵Cov Yudais txhaj muab ntaaj tua puab cov yeebncuab tuag taagnrho, hab puab ua txaus nkaus lawv le puab lub sab nyam rua cov tuabneeg kws ntxub puab.

⁶Nyob huv lub tuamceeb nroog Susas nkaus xwb cov Yudais tua puab cov yeebncuab tuag lawm tsib puas leej txivneej.

⁷Cov tuabneeg kws raug tua tuag taag ntawd, muaj cov Yudais tug yeebncuab Hamaas kws yog Hamedethas tug tub, kaum leej tub nyob rua huv hab puab cov ntawd yog: Pasadathas, Dalefoos, Apathas, Pulathas, Adalias, Alidathas, Pamatas, Alixais, Alidais hab Vaixathas. Txawm le ntawd los puab yeej tsi fuab ib yaam khoom dlaabtsi le.

¹¹Tuab nub ntawd muaj tuabneeg moog qha rua vaajntxwv paub txug cov tuabneeg kws raug tua tuag taag huv lub tuamceeb nroog Susas saib coob npaum twg.

¹²Ces vaajntxwv has qha rua nam Vaajntxwv Exethaws has tas, “Nyob huv lub tuamceeb nroog Susas nkaus xwb cov Yudais tua cov yeebncuab tuag lawm tsib puas leej txivneej kws yog xaam Hamaas kaum leej tub nrug hab. Dlua le lwm lub xeev sov puab tua tuag lawm npaum twg tseem tsi tau paub! Nwgnuav koj xaav yuav yaam dlaabtsi? Koj yeej yuav tau yaam ntawd. Qha rua kuv saib koj xaav yuav dlaabtsi, kuv yuav muab kuas tau rua koj.”

¹³Exethaws teb has tas, “Yog hum vaajntxwv sab, pigkig thov ca cov Yudais kws nyob huv lub nroog Susas rov ua dlua ib zag ntxiv le kws nub nua koj tau tso cai rua puab ua taag lug lawm. Thov muab Hamaas kaum leej tub ntawd cov cev tuag coj moog dlai rua ntawm cov ncej dlai cejdlaab hab.”

¹⁴Yog le ntawd, vaajntxwv txhaj saamfwm kuas ca le ua lawv le ntawd; txhaj ua ib tsaab ntawv tshaajtawm moog rua huv lub nroog Susas, hab muab Hamaas kaum leej tub ntawd coj moog dlai rua ntawm cov ncej dlai cejdlaab.

¹⁵Nub kaum plaub kws yog lub hlis Adas, cov Yudais huv lub nroog Susas txhaj sis sau ua ke hab rov moog tua cov tuabneeg huv lub nroog Susas tuag peb puas leej ntxiv. Tabsis puab tsi fuab ib yaam khoom dlaabtsi hlo le.

¹⁶Cov Yudais kws nyob huv txhua lub xeev kuj sis sau moog ua ke hab tiv thaiv puab cov tuabneeg txujsa kuas dlim ntawm cov yeebncuab. Hab puab tua cov yeebncuab kws ntxub puab tuag lawm xyaa caum tsib txheeb leej. Tabsis puab tsi fuab ib yaam khoom dlaabtsi hlo le.

¹⁷Tej nuav yog tshwm muaj rua nub kaum peb kws yog lub hli Adas, hab nub kaum plaub, puab su hab muab nub ntawd ua nub kws puab noj haus hab muaj kev zoo sab.

¹⁸Tabsis cov Yudais kws nyob huv lub nroog Susas lug sis sau ua ke nub kaum peb hab kaum plaub tua puab cov yeebncuab, hab puab su rua nub kaum tsib, muab nub ntawd ua nub kws puab noj haus hab muaj kev zoo sab.

¹⁹Yog le ntawd, cov Yudais kws nyob huv tej zog hab tej nroog txhaj le su rua nub kaum plaub kws yog lub hli Adas ntawd. Hab puab txhaj le noj haus hab ua kev lomzem zoo sab rua nub ntawd. Puab ib leeg coj zaub mov moog pub rua ib leeg noj.

²⁰Maudekhais muab tej xwm nuav sau rua huv ntawv hab xaa moog txhua nrho rua cov Yudais kws nyob rua txhua lub xeev kws Vaajntxwv Xawxes kaav, tsi has nyob dleb lossis nyob ze;

²¹kuas puab muab nub kaum plaub hab kaum tsib kws yog lub hli Adas ntawm txhua lub xyoo lug ua nub su.

²²Ob nub nua, yog ob nub kws cov Yudais dlim ntawm puab cov yeebncuab, hab yog lub hlis kws muab kev tu sab hloov lug ua kev kaaj sab, hab muab kev quaj ntsuag hloov lug ua kev luag zoo sab; Kuas puab ncu ntsoov muab nub ntawd ua ib nub noj haus zoo sab, nub ntawd puab ib leeg coj zaub mov moog pub rua ib leeg hab pub rua cov pluag.

²³Cov pejxeem Yudais txaus sab ua lawv le tsaab ntawv kws Maudekhais sau xaa tuaj rua puab. Cov Yudais txhaj le naj xyoo ua kevcai ncu txug qhov kws puab tub chiv ua muaj lug ntawd lawm.

²⁴Hamedethas tug tub Hamaas kws yog Ankas tug xeebntxwv kws yog cov Yudais tug yeebncuab tau tuav tswvyim yuav muab cov Yudais tua povtseg, nwg txhaj rhu ntawv xaam noobnyoog yuav muab cov Yudais tua kuas tu noob. (Qhov rhu ntawv ntawd puab hu ua “Pulees”.)

²⁵Tabsis Exethaws moog thov vaajntxwv, vaajntxwv txhaj sau ntawv saamfwm kuas muab Hamaas tej tswvyim tuavhuv ua phem rua cov Yudais ntawd tig rov lug raug nwg. Yog le ntawd, nwg hab nwg cov tub txhaj le raug muab dlai cejdlaab taag.

²⁶Tub yog vim le nuav puab txhaj muab ob nub su ntawd hu ua pulees, txhais has tas, “Rhu Ntawv.” Rua qhov yog Maudekhais tsaab ntawv hab txhua yaam kws muaj tshwmsim rua cov Yudais,

²⁷cov Yudais txhaj muab zaaj nuav lug ua ib txuj kevcai rua puab, puab tej xeebntxwv hab txhua tug tuabneeg kws tau lug kaav xeem ua tuabneeg Yudais lawm coj, kuas yuavtsum naj xyoo muab ob nub nuav lug ua ob nub su lawv le kws Maudekhais tau has tseg ca lawm.

²⁸Yuav ua rua cov Yudais ncu ntsoov ob nub kws ua lub koobtsheej Pulees nuav moog txhua tam. Txhua yim tuabneeg, txhua lub xeev hab txhua lub nroog yuav ncu ntsoov hab coj txuj kevcai nuav moog ibtxhis le.

²⁹Ces nam Vaajntxwv Exethaws kws yog Anpihais tug ntxhais, hab Maudekhais txhaj sau dlua ib tsaab ntawv leeg paub tsaab ntawv kws Maudekhais xub sau lawm, kuas ncu ntsoov ua kevcai Pulees.

³⁰Maudekhais txhaj muab tsaab ntawv nuav xaa moog rua cov Yudais txhua tug, xaa moog thoob plawg ib puas neeg nkaum xyaa lub xeev huv tebchaws Pawxias kws Vaajntxwv Xawxes kaav hab foom koob moov rua cov Yudais kuas muaj kev thaajyeeb hab tau zoo nyob kaaj sab lug,

³¹hab kuas coj txuj kevcai ua koobtsheej Pulees lawv le lub caij lub nyoog kws puab tub tau teem tseg lawv le kws Maudekhais kws yog tuabneeg Yudais hab nam Vaajntxwv Exethaws tau saamfwm rua cov Yudais; hab coj lawv le txuj kevcai yoo mov hab txuj kevcai quaj ntsuag kws obtug tau teem tseg rua obtug hab obtug tej xeebntxwv lawm.

³²Txuj kevcai ua koobtsheej Pulees kws Exethaws tau saamfwm kuas muaj ntawd, tau muab teev tseg ca rua huv thooj ntawv lawm.