Read Hmong Njua Tsiv Dlim 10 Bible Online

Tsiv Dlim 10 - Hmong Njua bible

Tsiv Dlim 10

¹Ces tug TSWV has rua Mauxes has tas, “Koj ca le moog cuag Falaus. Kuv ua rua Falaus hab nwg cov numtswv kuas muaj lub sab tawv, kuv txhaj tau ua kuv tej txujci tseemceeb rua puab pum

²hab mej txhaj yuav tau pav rua mej tej xeebntxwv noog has tas, thaus kuv ua kuv tej txujci ntawd, cov Iziv poob ntsejmuag luj kawg nkaus. Mej txhaj yuav paub has tas, kuv yog tug TSWV.”

³Mauxes hab Aloos moog cuag Falaus hab has rua nwg tas, “Tug TSWV kws yog cov Henplais tug Vaajtswv has tas, ‘Koj yuav tawv moog txug thaus twg koj maam le fwm kuv? Ca le tso kuv tsaav tuabneeg moog, puab yuav moog pehawm kuv.

⁴Yog koj tseem tawv tsi kaam tso kuv tsaav tuabneeg moog, mas pigkig kuv yuav tso kooj lug puv nkaus koj lub tebchaws.

⁵Cov kooj ntawd yuav coob heev plooj nkaus sau npoo aav. Cov kooj ntawd yuav noj txhua yaam kws lawg ntaus tuag tsi taag hab noj tej ntoo kuas taag huv tuabsi.

⁶Cov kooj ntawd yuav yaa lug puv nkaus huv koj lub loog hab huv koj cov numtswv hab koj cov pejxeem tej tsev. Cov kooj ntawd yuav ua phem tshaaj plawg tej kws koj cov yawmkoob ibtxwm pum lug lawm.’ ” Ces Mauxes txawm tawm lug lawm.

⁷Falaus cov numtswv has rua Falaus has tas, “Koj tseem yuav ca tug tuabneeg nuav ua rua peb raug kev txomnyem moog txug thaus twg? Ca le tso cov Yixalayees nuav moog, puab txhaj tau moog pe tug TSWV kws yog puab tug Vaajtswv. Koj tsi pum lub tebchaws Iziv tub puamtsuaj taag lawm los?”

⁸Falaus khaiv tuabneeg moog hu Mauxes hab Aloos obtug tuaj cuag nwg, nwg has rua obtug tas, “Ca le moog pehawm tug TSWV kws yog mej tug Vaajtswv. Tabsis cov twg yuav moog?”

⁹Mauxes teb has tas, “Peb suavdlawg yuav moog taagnrho, moog kuas taag peb tej mivnyuas hab tej laug huv tuabsi. Peb yuav coj peb cov tub cov ntxhais, tej yaaj tej tshis hab tej nyuj moog huv tuabsi, rua qhov peb yuav moog ua ib rooj mov noj qhuas tug TSWV.”

¹⁰Falaus teb has tas, “Kuv coglug rua tug TSWV has tas kuv yuav tsi pub mej coj mej tej quaspuj mivnyuas moog! Kuv paub has tas, mej taabtom tuavhuv yuav ua phem.

¹¹Tsi tau, tsi pub moog! Yog has tas mej xaav moog tag, tsuas pub cov txivneej moog xwb.” Ces Falaus txawm ntab Mauxes hab Aloos obtug tawm huv nwg lub loog moog lawm.

¹²Tug TSWV has rua Mauxes has tas, “Koj ca le tsaa teg rua lub tebchaws Iziv, kuas kooj lug rua huv tebchaws Iziv nuav. Kooj yuav lug noj txhua tsaav txhua yaam qoobloo hab noj tej kws lawg ntaus puamtsuaj tsi taag.”

¹³Mauxes txawm muab nwg tug paas nreg tsaa rua lub tebchaws Iziv, tug TSWV tso cua ntsawj saab nubtuaj tuaj, nub ntawd ib nub hab ib mos. Taagkig sawv ntxuv cua txawm ntsawj kooj yaa ua npoj ntwg lug.

¹⁴Cov kooj ntawd yaa ua tsheej ntshuas lug tsaws puv nkaus lub tebchaws Iziv. Zag nuav kooj txomfaav coob tshaaj plawg dlua le kws txeev pum lug lossis yuav tsi pum ib zag ntxiv le lawm.

¹⁵Tej kooj ntawd yaa lug tsaws plooj nkaus aav, tsi pum ib qhov aav tshwm le. Tej kooj ntawd noj tej txiv ntoo hab txhua yaam kws lawg ntaus puamtsuaj tsi taag dlu lug thoob plawg lub tebchaws Iziv tsi seem ib yaam dlaabtsi le.

¹⁶Falaus khaiv tuabneeg ceev heev moog hu Mauxes hab Aloos obtug tuaj hab has rua obtug tas, “Kuv tau ua txhum rua tug TSWV kws yog mej tug Vaajtswv hab ua txhum rua mej lawm.

¹⁷Nwgnuav thov zaam txim rua kuv ib zag ntxiv hab thov tug TSWV kws yog mej tug Vaajtswv tshem lub txim kws yuav coj kuv moog rua txujkev tuag tawm ntawm kuv moog.”

¹⁸Mauxes txawm tawm huv Falaus lub loog moog thov tug TSWV.

¹⁹Hab tug TSWV muab cov cua kws ntsawj saab nubtuaj tuaj hloov kuas ntsawj saab nubpoob tuaj, ntsawj tej kooj ntawd kuas moog poob taag rua huv Havtxwv Lab. Tsi pub kuas seem ib tug kooj nyob qhov twg le.

²⁰Tabsis tug TSWV ua rua Falaus muaj lub sab tawv tsi kaam tso cov Yixalayees moog le hab.

²¹Vaajtswv has rua Mauxes has tas, “Koj ca le tsaa koj txhais teg rua sau ntuj, yuav tsaus ntuj nti thoob plawg lub tebchaws Iziv.”

²²Mauxes tsaa teg rua sau ntuj, txawm tsaus ntuj nti thoob plawg lub tebchaws Iziv tau peb nub.

²³Cov Iziv ib tug saib tsi pum ib tug le, hab lub sijhawm ntawd ua rua cov Iziv tawm tsi tau huv puab tej tsev moog rua qhov twg, tabsis thaaj tsaam kws cov Yixalayees nyob pum kev kaaj nrig.

²⁴Falaus khaiv tuabneeg moog hu Mauxes tuaj cuag nwg hab has tas, “Mej ca le moog pehawm tug TSWV; txawm yog mej yuav coj mej cov quaspuj mivnyuas nrug mej moog los tau. Tabsis mej tej yaaj, tej tshis, hab tej nyuj ca nyob ntawm nuav.”

²⁵Mauxes teb has tas, “Yog le ntawd, koj yuavtsum muab tsaj rua peb coj moog tua hlawv fij rua tug TSWV kws yog peb tug Vaajtswv.

²⁶Yeej tsi tau le, peb yuavtsum caab peb tej tsaj nrug peb moog kuas taag xwb; tsi pub seem ib tug rua qhov twg le. Peb yuavtsum xaiv tej tsaj zoo tua hlawv fij rua tug TSWV kws yog peb tug Vaajtswv. Nwgnuav peb tseem tsi tau paub yuav muab tug tsaj twg, thaus peb moog txug tod lawm peb maam xaiv, peb txhaj paub muab tug zoo lug tua fij rua nwg.”

²⁷Tug TSWV ua rua Falaus muaj lub sab tawv, nwg txhaj tsi kaam tso cov Yixalayees moog.

²⁸Falaus has rua Mauxes has tas, “Koj ca le tsiv tawm moog, tsi xob tuaj tshwm ntsejmuag rua kuv pum ib zag ntxiv lawm. Nub twg yog kuv pum koj, mas koj tuag xwb!”

²⁹Mauxes teb has tas, “Ca ua le koj has los mas!”