Read Hmong Njua Tsiv Dlim 13 Bible Online

Tsiv Dlim 13 - Hmong Njua bible

Tsiv Dlim 13

¹Tug TSWV has rua Mauxes has tas,

²“Mej yuavtsum muab mej cov Yixalayees tej tub hlub fij rua kuv moog ibtxhis, hab mej yuavtsum muab tej tsaj thawj tug mivnyuas kws yog tug txiv fij rua kuv ua kuv tug.”

³Mauxes has rua cov Yixalayees tas, “Mej yuavtsum ncu ntsoov nub ntawd, rua qhov nub ntawd tug TSWV kws muaj fwjchim luj kawg nkaus tau coj mej tawm huv tebchaws Iziv qhov chaw kws mej ua luas qhev lug. Nub ntawd mej tsi xob noj tej ncuav kws xyaw keeb hlo le.

⁴Nub ntawd yog lub ib hlis ntuj kws yog lub hli Anpis kws mej tsiv tawm huv tebchaws Iziv lug.

⁵Tug TSWV tau coglug tseg rua mej cov yawmkoob has tas nwg yuav muab cov Kana-aas, cov Hitis, cov Amoos, cov Hivis hab cov Yenpus lub tebchaws rua mej nyob. Thaus Vaajtswv coj mej moog txug rua huv lub tebchaws vaammeej kws aav rog hab zoo qoob, txhua xyoo thaus lub ib hlis ntuj mej yuavtsum ua kevcai noj ncuav tsi xyaw keeb le nuav.

⁶Xyaa nub ntawd mej yuavtsum noj cov ncuav tsi xyaw keeb nkaus xwb, mas nub xyaa mej yuavtsum ua rooj mov noj ua tug TSWV tsaug.

⁷Mej yuavtsum noj ncuav tsi xyaw keeb kuas txwm nkaus xyaa nub; tsi pub kuas muaj keeb lossis ncuav xyaw keeb nyob huv mej lub tebchaws le.

⁸Nub kws pib ua kevcai ntawd, koj yuavtsum qha txhua yaam rua koj cov mivnyuas has tas, Kuv ua le nuav, rua qhov tug TSWV tau ua rua kuv thaus kuv tsiv tawm huv tebchaws Iziv lug.

⁹Txuj kevcai nuav yuav ua rua mej ncu ntsoov kawm hab ncu tug TSWV tej lug, ib yaam le tej kws mej coj rawv ntawm mej teg lossis coj rawv sau mej hauvplaj, ua rua mej ncu ntsoov tug TSWV tej lug, rua qhov tug TSWV, tug kws muaj fwjchim tau coj mej tawm nraag tebchaws Iziv lug.

¹⁰Mej yuavtsum ua txuj kevcai nuav rua txhua xyoo thaus txug lub caij nuav, tsi xob tso tseg le.

¹¹“Tug TSWV yuav coj mej moog nyob huv cov Kana-aas lub tebchaws kws nwg tub coglug rua mej hab mej cov yawmkoob lawm. Thaus nwg muab lub tebchaws ntawd pub rua mej,

¹²mej yuavtsum muab mej tej tub hlub fij rua tug TSWV. Mej tej tsaj thawj tug mivnyuas kws yog tug txiv puavleej yog tug TSWV tug,

¹³tabsis txhua tug mivnyuas txiv neeg luav mej yuavtsum coj ib tug mivnyuas yaaj moog hloov chaw txhwv ntawm tug TSWV rov qaab. Yog mej tsi xaav txhwv tug mivnyuas neeg luav rov qaab, mej ca le muab luv cejdlaab kuas tuag. Mej yuavtsum txhwv mej cov tub hlub txhua tug rov qaab huv tuabsi hab.

¹⁴Lwm nub, thaus koj tug tub nug koj has tas, ‘Ua le nuav lub ntsab yog le caag?’ Koj qha rua nwg has tas, ‘Tug TSWV tau siv nwg lub fwjchim kws luj kawg nkaus coj peb tawm nraag tebchaws Iziv qhov chaw kws peb ua luas qhev lug.

¹⁵Thaus Falaus muaj lub sab tawv tsi kaam tso peb tawm, tug TSWV txhaj le tua cov Iziv cov tub hlub huv lub tebchaws ntawd hab tej tsaj thawj tug mivnyuas kws yog tug txiv tuag taag huv tuabsi. Vim le nuav, peb txhaj le muab peb tej tsaj thawj tug mivnyuas kws yog tug txiv tua fij rua tug TSWV, hab txhwv peb tej tub hlub rov qaab.’

¹⁶Txuj kevcai nuav, yog ua ib qhov rua mej ncu ntsoov rua nruab sab ib yaam le tej kws peb coj ntawm peb txhais teg lossis sau peb hauvplaj, ua rua peb ncu ntsoov nub kws tug TSWV kws muaj fwjchim luj kawg nkaus tau coj peb tawm nraag tebchaws Iziv lug.”

¹⁷Thaus Falaus tso cov Yixalayees moog lawm, Vaajtswv tsi coj puab taug txujkev kws lawv ntug havtxwv ncaaj nraim moog rua peg tebchaws Filitees, txawm yog txujkev ntawd ze los nwg tsi coj puab moog txuj ntawd. Vaajtswv xaav has tas, “Kuv tsi xaav kuas cov Yixalayees hloov sab tsiv rov qaab moog rua nraag tebchaws Iziv thaus muaj kev sis ntaus sis tua ntawm kev.”

¹⁸Yog le ntawd, Vaajtswv txhaj coj puab taug kev lawv taj suabpuam moog rua tom Havtxwv Lab. Thaus cov Yixalayees taug kev tawm huv tebchaws Iziv lug, puab yeej npaaj cuabyeej ua rog nrug nraim tog sis tua xwb.

¹⁹Mauxes coj Yauxej cov pobtxhaa nrug nwg lug, lawv le Yauxej kuas cov Yixalayees coglug rua Yauxej has tas, “Thaus Vaajtswv lug paab mej dlim lawm, mej yuavtsum coj kuv tej pobtxhaa tawm huv tebchaws Iziv nuav nrug mej moog.”

²⁰Cov Yixalayees tsiv tawm huv Xukaus moog tsuam chaw su rua ntawm Ethas kws nyob ntawm ntug taj suabpuam.

²¹Nruab nub tug TSWV ua ib tauv fuab moog ua puab ntej coj puab kev, hab thaus mo ntuj nwg ua ib tug nplaim tawg cig laam lug moog ua puab ntej kuas puab pum kev, puab taug kev moog nruab nub mo ntuj los tau huv tuabsi.

²²Nruab nub tauv fuab coj puab kev moog taag nub, hab mo ntuj tug nplaim tawg cig laam lug coj puab kev moog taag mo.