Read Hmong Njua Tsiv Dlim 27 Bible Online

Tsiv Dlim 27 - Hmong Njua bible

Tsiv Dlim 27

¹“Muab ntoo kubtwg lug ua lub thaaj. Ua qhov ntev hab qhov dlaav tsib tshim hab qhov sab peb tshim.

²Ua plaub tug kub rua sau plaub ceg kaum thaaj. Plaub tug kub ntawd, txua koom hlo nrug lub thaaj hab muab tooj vuam rua huv tuabsi.

³Ua ib co laujkaub ntim tshauv, ib co dluav, ib co taig, ib co dlav rawg hab ib cov yag rau ncaig tawg. Tej cuabyeej nuav puavleej yog muab tooj ua.

⁴Muab tooj hab ua dlaim ntxaij; hab muab tooj ntaus ua plaub lub khawb ntsa rua plaub ceg kaum ua teg nqaa.

⁵Muab dlaim ntxaij tooj ntawd pua rua huv lub thaaj kuas txug ndlua ib nraab.

⁶Muab ntoo kubtwg ua ob tug laag kws kwv lub thaaj, hab muab tooj vuam rua,

⁷hab muab ntxig rua ntawm plaub lub khawb kws ntsa rua ntawm lub thaaj ob saab.

⁸Muab txag ntoo ua lub thaaj hab tseg huv plawv khoob, lawv nraim le tug qauv kws kuv tau qha rua koj sau roob lawm.

⁹“Koj yuavtsum xov vaaj ncig lub Tsevntaub. Muab dlaim ntaub maag kws ntev ib puas tshim xov saab nraag,

¹⁰muab neeg nkaum tug kaav tooj ua ncej, muab neeg nkaum tug kaav tooj tag taw, tabsis cov khawb hab cov hlua yog muab nyaj ua.

¹¹Xov zoo ib yaam le ntawd rua saab ntsaa vaaj peg hab.

¹²Muab dlaim ntaub kws ntev tsib caug tshim xov saab nubpoob, txhus kaum tug ncej hab kaum tug tag taw.

¹³Saab nub tuaj, yog lub roojvaag kws nkaag moog rua huv, saab ntawd xov tsib caug tshim dlaav ib yaam nkaus.

¹⁴Ib saab roojvaag twg ntev kaum tsib tshim, txhus peb tug ncej hab peb tug tag taw.

¹⁵Saab roojvaag tod los ntev kaum tsib tshim, txhus peb tug ncej hab peb tug tag taw.

¹⁶Dlaim ntaub maag kws npug lub roojvaag ntev neeg nkaum tshim hab txaij xav, tsaamxem hab lab, hab muab xaws ua paaj ntaub txaij nraug zeeg rua. Txhus plaub tug ncej hab plaub tug tag taw dlai dlaim ntaub ntawd.

¹⁷Taagnrho cov ncej kws xov ncig lub tsev, puavleej muab xuv nyaj paav, tej khawb khawm los yog khawb nyaj, hab cov tag taw puavleej yog tooj.

¹⁸Lub vaaj, qhov ntev muaj ib puas tshim, qhov dlaav muaj tsib caug tshim, hab qhov sab muaj tsib tshim. Muab cov ntaub maag kws zoo heev xaws ua ntsaa vaaj hab muab tooj ua cov tag taw.

¹⁹Taagnrho txhua yaam cuabyeej siv huv lub Tsevntaub, tej tswg kws txhus nqug lub Tsevntaub hab tug ntsaa vaaj puavleej yog muab tooj ua.

²⁰“Ca le saamfwm rua cov Yixalayees kuas puab nqaa cov roj txiv ntoo kws zoo tshaaj plawg tuaj rua koj saam rua lub teeb, txhaj tau taws txhua mo.

²¹Aloos hab nwg cov tub ua cov kws tu hab taws lub teeb huv lub Tsevntaub kws yog kuv qhov chaw sis ntsib kws ncaaj lub Phijxaab ntawm dlaim ntaub saab nrau nuav kuas cig taabmeeg kuv ib mos kaaj ntug. Cov Yixalayees hab puab cov xeebntxwv yuavtsum ceev cov lug saamfwm nuav moog ibtxhis le.”