Read Hmong Njua Tsiv Dlim 28 Bible Online

Tsiv Dlim 28 - Hmong Njua bible

Tsiv Dlim 28

¹“Ca le hu koj tug tijlaug Aloos hab nwg cov tub: Nadas, Anpihus, Ele-axas hab Ithamas tuaj. Muab puab cais tawm huv cov Yixalayees, hab muab puab tsaa ua cov povthawj ua kuv teg num.

²Xaws cov tsho povthawj rua koj tug tijlaug Aloos naav, tsaav nwg lub meejmom kuas suavdlawg fwm.

³Koj hu taagnrho cov tuabneeg kws kuv pub puab muaj peevxwm ua txhua yaam tuaj, hab qha kuas puab xaws cov tsho ntev rua Aloos naav, muab nwg tsaa ua povthawj ua kuv teg num.

⁴Qha kuas puab ua dlaim ntaub npug hauvsab, lub tsho efaus, lub tsho ntev, lub tsho txaij, txuj phuam kws ntoo hab txuj hlaab sa. Puab ua cov tsho povthawj nuav rua koj tug tijlaug Aloos hab nwg cov tub naav, kuas puab ua cov povthawj ua kuv teg num.

⁵Cov tuabneeg ntawd muab ntaub xav, ntaub tsaamxem, xuv lab, xuv kub hab cov ntaub maag kws zoo heev xaws ua cov tsoog tsho ntawd.

⁶“Puab muab ntaub xav, ntaub tsaamxem, xuv lab, xuv kub, hab muab cov ntaub maag kws zoo heev xaws ua lub tsho efaus hab xaws paaj ntaub txaij nraug zeeg rua.

⁷Ob txuj hlaab kws khuam xubpwg, muab sis rig rua nrau nrausqaum moog khawm rua nraag ob saab nthaa.

⁸Txuj hlaab sa yog muab cov ntaub kws xaws lub tsho efaus ua, hab muab xaws rua ntawm lub tsho efaus.

⁹Muab ob lub qai zeb ci ci txaug Yakhauj kaum ob tug tub cov npe rua,

¹⁰txaug kuas lawv le puab tej noobnyoog ib tug zuj zug, txaug rau leej npe rua ib lub qai zeb.

¹¹Yuavtsum yog tug kws txawj ntaus nplhaib, txhaj txaug tau Yakhauj cov tub tej npe rua ntawm ob lub qai zeb, hab yuavtsum nchuav ob dlaim phaj cog ob lub qai zeb ntawd.

¹²Muab ob lub qai zeb ntawd dlai rua ntawm lub tsho efaus ob txuj hlaab sau xubpwg, ua lub cim ncu txug kaum ob xeem Yixalayees. Ua le ntawd Aloos txhaj tau coj rawv puab tej npe rua sau nwg ob saab xubpwg, kuas kuv kws yog tug TSWV, ncu ntsoov kuv tsaav tuabneeg.

¹³Muab tej tseem kub nchuav ua ob lub hum txaij nraug zeeg,

¹⁴hab ua ob txuj saw kub ntswj zoo le txuj hlua, hab muab tis rua ntawm ob dlaim phaj ntawd.

¹⁵“Ua dlaim ntaub npug hauvsab rua tug Povthawj Hlub tau siv npug hauvsab le Vaajtswv lub sab nyam. Muab cov ntaub kws xaws lub tsho efaus ua dlaim ntaub npug hauvsab hab xaws paaj ntaub txaij nraug zeeg rua hab.

¹⁶Dlaim ntaub npug hauvsab ntawd ua xwmfaab xwmmeem hab muab tais ua ob tsem, ntev ib dlus hab dlaav ib dlus.

¹⁷Cog plaub leej qai zeb kws muaj nqes rua ntawm dlaim ntaub npug hauvsab; thawj leej cog ib lub lab dlaaj lig, ib lub dlaaj ntshab si, hab ib lub lab tshab tshab;

¹⁸leej ob, cog ib lub ntsuab ci hob, ib lub xav hab ib lub dlawb ci hob;

¹⁹leej peb, cog ib lub lab ntshab si, ib lub txho tawg, hab ib lub lab ua paajyeeb ntshaa;

²⁰hab leej plaub, cog ib lub txho xav, ib lub dlawb txho hab ib lub dlawb ci ntshab si. Cov qai zeb nuav puavleej muab cog rua ntawm ob dlaim phaj kub.

²¹Kaum ob lub qai zeb ntawd puavleej txaug Yakhauj kaum ob leeg tub npe rua, cov qai zeb ntawd zoo ib yaam le tej homthawj kws txaug kaum ob xeem ntawd npe rua.

²²Muab cov tseem kub nchuav ua ob txuj saw, hab muab ntswj zoo le txuj hlua, tis rua ntawm dlaim ntaub npug hauvsab.

²³Ua ob lub khawb kub tis rua dlaim ntaub npug hauvsab ob lub ntsej saab sau,

²⁴hab muab ob txuj saw kub tis rua ntawm ob lub khawb kub.

²⁵Muab ob tog qaab tis rua ob dlaim phaj, ua le nuav kuas ob txuj saw lu rua lub tsho efaus ob dlaim tag xubpwg ntawm xubndlag.

²⁶Ua dlua ob lub khawb kub tis rua ntawm dlaim ntaub npug hauvsab ob lub kaum huv qaab ntawm tug npoo kws npuab nkaus lub tsho efaus.

²⁷Ua dlua ob lub khawb kub tis ntxiv rua lub tsho khuam ob txuj hlaab khuam xubpwg ob tog tw kawg tom xubndlag kws ze kaab xaws hab txuas nkaus txuj hlaab kws muab ntaub plaub yaaj xaws.

²⁸Muab ob txuj hlaab ntaub xav khi dlaim ntaub npug hauvsab ob lub khawb rua ntawm lub tsho efaus ob lub khawb, kuas txuas nkaus rua ntawm txuj hlaab lab, hab kuas dlaim ntaub npug hauvsab nyob ncaaj rua ntawm lub tsho efaus.

²⁹“Thaus Aloos moog rua huv Chaav Dlawbhuv, nwg yuavtsum naav rawv dlaim ntaub npug hauvsab kws txaug taagnrho cov Yixalayees kaum ob xeem npe rua lawm, kuas kuv kws yog tug TSWV, ncu qaab ntsoov kuv tsaav tuabneeg.

³⁰Muab lub Ulees hab lub Thumees ntsaws rua huv dlaim ntaub npug hauvsab, kuas thaus Aloos tuaj rua huv Chaav Dlawbhuv kws yog kuv qhov chaw nyob, nwg txhaj nqaa rawv ob yaam ntawd. Txhua zag nwg yuavtsum npua dlaim ntaub npug hauvsab tuaj, nwg txhaj yuav paub qha rua cov Yixalayees ua tej yaam kws hum kuv sab.

³¹“Muab cov xuv xav xaws ua lub tsho ntev naav npug tuaj sau lub tsho efaus.

³²Lub tsho ntawd, xaws looj sau taubhau tuaj, hab foob lub cejdlaab tsho kuas thoob plawg txhaj tsi ndluag.

³³Muab xuv xav, xuv tsaamxem hab xuv lab khi ua tej lub txiv ntsab pobkws, dlai ib lub txiv ntsab pobkws quas ib lub tswb kub, thoob plawg lub tw tsho ntev.

³⁵Hab muab lub tsho ntev ntawd rua Aloos naav thaus nwg moog ua teg num povthawj, txhaj yuav nov tej tswb ntawd nrov thaus nwg moog rua huv Chaav Dlawbhuv tim ntsej tim muag tug TSWV hab thaus nwg tawm rov qaab, nwg txhaj tsi raug tua tuag.

³⁶“Hab koj muab cov tseem kub ntaus ua ib dlaim phaj, hab txaug ib cov lug rua ntawm dlaim phaj kub has tas, ‘Dlawbhuv rua tug TSWV.’

³⁷Muab ib txuj hlaab ntaub xav khi dlaim phaj kub ntawd rua sau txuj phuam kws ntoo sau taubhau.

³⁸Aloos coj rawv dlaim phaj kub ntawd rua sau nwg hauvplaj, ces txawm yog cov pejxeem fij tej yaam khoom yuam kev mivntsiv los kuv kws yog tug TSWV txhaj yuav txais cov Yixalayees tej khoom kws puab coj tuaj fij rua kuv ntawd.

³⁹“Muab cov xuv maaj kws zoo heev ntus ua ib lub tsho rua Aloos naav hab ntus ua ib txuj phuam rua Aloos ntoo, hab xaws paaj ntaub rua txuj hlaab kuas txaij nraug zeeg.

⁴⁰“Koj ca le ua ib cov tsho, ib cov hlaab hab ib cov mom rua Aloos cov tub, koj yuavtsum ua kuas zoo tsimnyog rua puab naav kuas suavdlawg fwm puab.

⁴¹Muab cov tsho nuav rua koj tug tijlaug Aloos hab nwg cov tub naav. Ca le muab roj txiv ntoo pleev puab hab tsaa puab ua cov povthawj ua kuv teg num.

⁴²Koj muab ntaub maag xaws ib cov rig tuab lu rua puab naav tuaj huv qaab kuas txij ndlua ntawm dluav rua nraag ncej qaab, txhaj tsi pum puab chaw txaajmuag.

⁴³Aloos hab nwg cov tub yuavtsum naav cov rig nuav thaus puab moog rua huv lub Tsevntaub kws yog kuv qhov chaw sis ntsib lossis thaus puab moog sawv ntawm lub thaaj ua teg num povthawj huv Chaav Dlawbhuv, puab txhaj tsi raug tua vim pum puab tej chaw txaajmuag. Qhov nuav yog txuj kevcai kws Aloos hab nwg cov xeebntxwv yuav tau coj moog ibtxhis le.