Read Hmong Njua Tsiv Dlim 3 Bible Online

Tsiv Dlim 3 - Hmong Njua bible

Tsiv Dlim 3

¹Muaj ib nub Mauxes taabtom moog yug nwg yawmtxiv Yethoos kws yog tug povthawj nyob huv tebchaws Midias cov yaaj hab cov tshis, nwg coj paab tsaj ntawd hlaa taj suabpuam moog txug tim lub Roob Xinais kws yog lub roob dlawbhuv.

²Nyob rua qhov ntawd, tug TSWV ib tug timtswv tau lug txa ua nplaim suavtawg cig laam lug rua Mauxes pum nyob huv ib tsob ntoo. Mauxes pum nplaim tawg cig lab ploog huv tsob ntoo tuaj, tabsis tsob ntoo tsi kub nyab le.

³Mauxes xaav has tas, “Ua caag qhov nuav yuav txawv ua luaj, vim le caag tsob ntoo tsi kub nyab le, kuv yuav txaav moog kuas ze hab xauj saib.”

⁴Thaus tug TSWV pum Mauxes txaav lug ze, nwg hu Mauxes huv tsob ntoo ntawd tuaj has tas, “Mauxes! Mauxes!” Mauxes teb has tas, “Kuv nyob ntawm nuav.”

⁵Vaajtswv has tas, “Tsi xob txaav lug ze ntawm nuav. Ca le hle koj nkawm khau, rua qhov koj sawv ntawm thaaj chaw kws dlawbhuv.

⁶Kuv yog koj cov yawmkoob tug Vaajtswv, yog Anplahaas, Ixaj hab Yakhauj tug Vaajtswv.” Yog le ntawd, Mauxes tsi muaj cuabkaav yuav saib taug Vaajtswv, nwg txhaj muab teg pus nwg ntsejmuag.

⁷Tom qaab ntawd tug TSWV has tas, “Kuv pum kuv tsaav tuabneeg kws nyob nraag tebchaws Iziv raug kev tsimtxom heev, kuv nov puab tej suab quaj qw thov kuv paab kuas puab dlim ntawm txujkev kws puab raug yuam ua luas qhev. Kuv paub puab raug kev txomnyem kawg nkaus le lawm,

⁸yog le ntawd, kuv txhaj lug paab kuas puab dlim ntawm cov tuabneeg Iziv hab yuav coj puab tawm huv tebchaws Iziv moog nyob lub tebchaws vaammeej kws aav rog hab zoo qoob kws naj nub nua cov Kana-aas, cov Hitis, cov Amoos, cov Pelixes, cov Hivis hab cov Yenpus nyob.

⁹Kuv tub nov kuv tsaav tuabneeg lub suab quaj thov kuv paab puab lawm, hab kuv pum cov tuabneeg Iziv tsimtxom puab kawg nkaus le.

¹⁰Nwgnuav kuv yuav khaiv koj moog cuag cov Iziv tug vaajntxwv hab koj moog tso kuv tsaav tuabneeg kuas puab tawm tau huv nwg lub tebchaws lug.”

¹¹Tabsis Mauxes has rua Vaajtswv tas, “Kuv tsi yog ib tug numtswv. Kuv yuav ua le caag muaj cuabkaav moog cuag tau vaajntxwv, hab coj cov Yixalayees tawm huv tebchaws Iziv lug?”

¹²Vaajtswv teb has tas, “Kuv yuav nrug nraim koj, hab thaus koj coj cov Yixalayees tawm huv tebchaws Iziv lug, mej yuav tuaj pehawm kuv sau lub roob nuav. Koj txhaj yuav paub has tas kuv yog tug khaiv koj moog.”

¹³Mauxes teb Vaajtswv has tas, “Thaus kuv moog txug ntawm cov Yixalayees hab qha rua puab has tas, ‘Mej cov yawmkoob tug Vaajtswv khaiv kuv tuaj cuag mej,’ hab puab yuav nug kuv has tas, ‘Tug Vaajtswv ntawd lub npe hu le caag?’ Yog le ntawd, kuv yuav teb puab le caag?”

¹⁴Vaajtswv has tas, “KUV YOG TUG KWS KUV YOG. Koj yuavtsum qha rua puab has tas: ‘Tug kws nwg lub npe hu ua KUV YOG TUG KWS KUV YOG, tau tso kuv tuaj paab mej.’

¹⁵Qha rua cov Yixalayees paub has tas, kuv yog tug TSWV, puab cov yawmkoob tug Vaajtswv, kws yog Anplahaas, Ixaj hab Yakhauj tug Vaajtswv, khaiv koj moog paab puab. Lub npe nuav yog kuv lub npe moog ibtxhis, txij nuav moog lawm yaav tom ntej txhua tam tuabneeg yuavtsum hu kuv lub npe le nuav.

¹⁶Koj ca le moog hab hu cov Yixalayees cov kev txwjlaug tuaj ua ke hab qha rua puab has tas, kuv yog tug TSWV, puab cov yawmkoob tug Vaajtswv kws yog Anplahaas, Ixaj, hab Yakhauj tug Vaajtswv tau lug tshwm rua koj pum. Qha rua puab has tas, kuv tub lug saib puab hab kuv pum cov Iziv tsimtxom puab lawm.

¹⁷Kuv npaaj sab has tas, kuv yuav coj puab tawm huv tebchaws Iziv, qhov chaw kws puab raug luas tsimtxom moog nyob huv lub tebchaws vaammeej kws yog cov Kana-aas, cov Hitis, cov Amoos, cov Pelixes, cov Hivis hab cov Yenpus lub tebchaws vaammeej kws aav rog hab zoo qoob.

¹⁸“Kuv tsaav tuabneeg yuav noog tej lug kws koj has. Ces koj yuavtsum nrug cov Yixalayees tej kev txwjlaug moog cuag cov Iziv tug vaajntxwv hab has rua nwg tas, ‘Tug TSWV kws yog cov Henplais tug Vaajtswv lug ua rua peb pum. Nwgnuav thov koj tso peb moog peb nub ke rua tom taj suabpuam, peb yuav moog tua tsaj fij rua tug TSWV kws yog peb tug Vaajtswv.’

¹⁹Kuv paub has tas, cov Iziv tug vaajntxwv yeej yuav tsi tso mej moog, yog nwg tsi raug tug kws muaj fwjchim luj kawg nkaus yuam kuas tso.

²⁰Tabsis kuv yuav siv kuv lub fwjchim kws txaus ntshai kawg rau txim rua cov Iziv. Ces tom qaab ntawd nwg maam le yuav tso mej tawm moog.

²¹“Kuv yuav tshoov cov Iziv sab kuas puab fwm koj, mas thaus kuv tsaav tuabneeg tawm moog, puab yuav tsi tawm moog teg dlawb teg nplag.

²²Txhua tug quaspuj Yixalayees yuav moog thov tej quaspuj Iziv kws nrug mej nyob koom zej koom zog, hab nrug nwg nyob ua ib tse, tej tsoog tsho, saw nyaj saw kub. Cov Yixalayees yuav muab tej ntawd rua puab tej tub tej ntxhais coj hab naav, hab mej yuav sau cov Iziv tej qhov txhua chaw huv tuabsi moog.”