Read Hmong Njua Tsiv Dlim 30 Bible Online

Tsiv Dlim 30 - Hmong Njua bible

Tsiv Dlim 30

¹“Muab ntoo kubtwg ua ib lub thaaj hlawv tej moov tshuaj tsw qaab.

²Lub thaaj ntawd txua ua plaub faab, ntev ib tshim hab dlaav ib tshim, hab sab ob tshim. Txua plaub tug kub koom hlo rua plaub ceg kaum thaaj.

³Koj muab tej tseem kub vuam rua plaub saab, hab plaub tug kub huv tuabsi, hab muab ib pluaj kub ntsa puab tug ntug thoob plawg.

⁴Ua plaub lub khawb kub rua lub thaaj, hab muab ntsa rua ob saab huv qaab tug ntug, ib saab twg ob lub ua chaw ntxig laag kwv lub thaaj.

⁵Muab ntoo kubtwg txua ua laag kwv lub thaaj hab muab kub vuam ob tug laag ntawd huv tuabsi.

⁶Muab lub thaaj ntawd txawb rua ntawm dlaim ntaub kws thaiv lub Phijxaab saab nrau nuav. Qhov chaw ntawd, txhaj yog qhov chaw kws kuv yuav ntsib koj.

⁷Txhua taagkig kws Aloos tuaj tu cov teeb, nwg yuavtsum hlawv moov tshuaj kuas tsw qaab ntxag rua sau lub thaaj ntawd.

⁸Thaus yuav tsaus ntuj kws Aloos tuaj taws cov teeb, nwg yuavtsum hlawv tej moov tshuaj tsw qaab ntawd ib yaam nkaus. Tej moov tshuaj tsw qaab nuav yuavtsum hlawv fij rua tug TSWV moog ibtxhis le.

⁹Tsi xob muab tej yaam moov tshuaj tsw qaab kws tsi dlawbhuv lossis tsaj lossis qoobloo hlawv rua sau lub thaaj ntawd, hab tsi pub laub cawv txiv maab fij rua sau lub thaaj ntawd.

¹⁰Aloos yuavtsum muab tej ntshaav tsaj kws tua theej txhoj, pleev lub thaaj plaub tug kub ua kevcai ntxuav ib xyoos ib zag. Yuavtsum ua le nuav txhua xyoo moog ibtxhis le. Lub thaaj nuav yog lub kws dlawbhuv kawg nkaus rua kuv kws yog tug TSWV.”

¹¹Tug TSWV has rua Mauxes tas,

¹²“Thaus koj txheeb cov Yixalayees npe, txhua tug txivneej yuavtsum them nyaj rua kuv txhwv nwg txujsa rov qaab, ua le nuav thaus koj taabtom txheeb npe, puab txhaj tsi raug kev puamtsuaj.

¹³Txhua tug kws sau npe yuavtsum them nyaj kuas puv ntoob le kws tau kom tseg, muab luj kuas nyaav ntaus nqe lawv le numtswv kevcai. Txhua tug yuavtsum them cov nyaj nuav ua khoom fij rua kuv.

¹⁴Txhua tug tuabneeg kws muaj noobnyoog neeg nkaum xyoo rov sau kws tub sau npe taag lawm, yuavtsum coj nyaj tuaj fij rua tug TSWV.

¹⁵Thaus puab them cov nyaj nuav txhwv puab txujsa, kuas tug npluanuj tsi xob them ntau tshaaj, hab tug pluag tsi xob them tsawg tshaaj.

¹⁶Txais cov nyaj kws cov pejxeem Yixalayees coj tuaj khaws tseg tau siv rua huv lub Tsevntaub kws yog kuv qhov chaw sis ntsib. Cov nyaj nuav yog coj tuaj txhwv puab txujsa, kuv yuav ncu ntsoov tsomkwm puab.”

¹⁷Tug TSWV has rua Mauxes has tas,

¹⁸“Koj muab tooj ua ib lub phab hab lub taw phab. Coj moog txawb rua ntawm lub Tsevntaub kws yog qhov chaw sis ntsib hab lub thaaj kis nruab nraab, hab nqaa dlej lug laub kuas puv nkaus lub phab ntawd.

¹⁹Aloos hab nwg cov tub txhaj tau cov dlej ntawd ntxuav teg ntxuav taw

²⁰ua ntej kws puab moog huv lub Tsevntaub kws yog qhov chaw sis ntsib lossis thaus puab moog sawv fij zaub mov rua ntawm lub thaaj. Puab txhaj tsi raug tua tuag.

²¹Puab yuavtsum ncu ntsoov ntxuav teg hab ntxuav taw, puab txhaj yuav tsi tuag. Qhov nuav ua ib txuj kevcai rua puab hab puab tej xeebntxwv coj moog ibtxhis le.”

²²Tug TSWV has rua Mauxes has tas,

²³“Muab tej khoom tsw qaab nuav: kaum ob choj moov tshuaj tsw qaab, rau choj nroj tsw qaab, rau choj quavntsuas tauj tsw qaab,

²⁴hab kaum ob choj ntoo kubtwg (muab luj kuas nyaav ntaus nqe lawv le numtswv kevcai). Laub ib taub roj txiv ntoo ntxiv rua,

²⁵hab muab nyoj ua cov roj txhawb meejthawj, sis tov kuas zoo ib yaam le cov tshuaj tsw qaab.

²⁶Muab cov roj ntawd pleev lub Tsevntaub kws yog kuv qhov chaw sis ntsib hab lub Phijxaab kws ntim Vaajtswv tej lug cog tseg,

²⁷lub rooj hab tej cuabyeej kws siv rua lub rooj, lub teeb hab tej cuabyeej kws siv rua lub teeb, lub thaaj hlawv moov tshuaj tsw qaab,

²⁸lub thaaj kws hlawv tej khoom fij hab tej cuabyeej kws siv rua lub thaaj ntawd, hab lub phab tooj kws ntxuav teg ntxuav taw hab lub taw phab.

²⁹Qhov kws koj ua le nuav yog muab tej ntawd fij kuas dlawbhuv, ces txhua tug tuabneeg lossis txhua yaam kws chwv tej ntawd txhaj le dlawbhuv, vim chwv raug yaam kws dlawbhuv.

³⁰Koj muab Aloos hab nwg cov tub txhawb meejthawj, hab muab puab tsaa ua cov povthawj ua kuv teg num.

³¹Koj has rua cov pejxeem Yixalayees tas, ‘Mej yuavtsum siv cov roj txhawb meejthawj kws dlawbhuv nuav ua kuv teg num moog ibtxhis.

³²Cov roj nuav, koj tsi xob muab laub rua tej tug tuabneeg kws tsi raug tsaa hab koj tsi xob muab cov roj nuav ua qauv moog ua dlua ib co kuas zoo le cov nuav ntxiv lawm. Cov roj nuav dlawbhuv, mas koj yuavtsum saib taug cov roj dlawbhuv nuav.

³³Yog leejtwg txhobtxwm ua dlua ib cov roj kuas zoo le cov nuav lossis muab cov nuav moog laub rua tug tuabneeg kws tsi yog povthawj, tug ntawd yuav raug rhu tawm huv kuv tsaav tuabneeg Yixalayees moog.’ ”

³⁴Tug TSWV has rua Mauxes has tas, “Koj ca le muab xatates, aunikes, nkanpanoos hab cov tseem roj ntoo tsw qaab kws tsw qaab ntxag nuav (txhua yaam muab luj kuas nyaav sis npaug zog),

³⁵coj moog zum ua ke ua ib cov moov tshuaj tsw qaab hab muab ntsev tov ntxiv rua kuas sis tov zoo txhaj dlawbhuv.

³⁶Muab zum kuas ua moov mog heev, hab nqaa moog ca rua huv lub Tsevntaub kws yog kuv qhov chaw sis ntsib, hab muab nphoo rua ntawm hauv ntej lub Phijxaab kws ntim Vaajtswv tej lug cog tseg. Cov moov tshuaj tsw qaab nuav ua kuas mej dlawbhuv rua tug TSWV.

³⁷Tsi xob muab tug qauv nuav moog ua moov tshuaj tsw qaab rua mej siv ntxiv lawm. Tej moov tshuaj tsw qaab nuav ua kuas mej dlawbhuv rua tug TSWV.

³⁸Yog leejtwg tseem ua dlua ib cov moov tshuaj tsw qaab zoo le cov nuav lug rua nwg siv, ca le muab tug ntawd rhu tawm huv kuv tsaav tuabneeg moog.”