Read Hmong Njua Tsiv Dlim 35 Bible Online

Tsiv Dlim 35 - Hmong Njua bible

Tsiv Dlim 35

¹Mauxes hu taagnrho ib tsoom pejxeem Yixalayees tuaj sis sau ua ke hab nwg has rua puab tas, “Ntawm nuav yog tug TSWV tej lug kws saamfwm kuas mej yuavtsum ua le nuav:

²Mej muaj rau nub ua mej tej num, tabsis nub xyaa yog nub tseemceeb rua mej, nub Xanpataus yog nub kws mej su hab pehawm tug TSWV. Yog leejtwg tseem ua num nub ntawd, yuav raug tua tuag.

³Txawm yog huv mej tej tsev los nub Xanpataus tsi xob rauv tawg hlo le.”

⁴Mauxes has rua cov Yixalayees tas, “Ntawm nuav yog tug TSWV tej lug saamfwm:

⁵Muab txhua yaam kws mej muaj coj tuaj fij rua tug TSWV. Txhua tug kws xaav nqaa khoom tuaj fij rua tug TSWV mas yog nqaa kub, nyaj hab tooj;

⁶tej tseem ntaub maag, ntaub xav, ntaub tsaamxem hab xuv lab; tej ntaub kws muab plaub tshis ntus;

⁷tawv laug yaaj kws muab zaas lab; tej tseem tawv nyuj; ntoo kubtwg;

⁸roj saam teeb; ntoo tsw qaab tso rua cov roj txhawb meejthawj hab tej moov tshuaj kws tsw qaab;

⁹tej qai zeb hab lwm yaam hlaws kws muab xaws rua ntawm cov Povthawj Hlub lub tsho efaus hab dlaim ntaub npug hauvsab.

¹⁰“Taagnrho mej cov kws muaj tswvyim ua txhua yaam yuavtsum tuaj hab ua tej kws tug TSWV saamfwm tseg nuav:

¹¹lub Tsevntaub, cov vuv lub tsev, cov xov lub tsev, cov khawb, cov laag, cov taab, cov puab, hab cov tag taw;

¹²lub Phijxaab kws ntim Vaajtswv tej lug cog tseg, ob tug laag, lub hau Phijxaab hab dlaim ntaub thaiv lub Phijxaab;

¹³lub rooj, cov ceg rooj hab taagnrho tej khoom siv rua lub rooj; cov ncuav kws fij rua tug TSWV;

¹⁴Lub teeb kws taws kuas cig pum kev hab tej khoom siv; cov teebxeeb hab cov roj;

¹⁵lub thaaj hlawv moov tshuaj tsw qaab hab cov ceg; cov roj txhawb meejthawj, cov moov tshuaj tsw qaab; dlaim ntaub thaiv lub qhovrooj kws moog rua huv lub Tsevntaub;

¹⁶lub thaaj hlawv khoom fij hab dlaim ntxaij tooj kws pua lub thaaj; cov ceg thaaj hab tej khoom siv rua lub thaaj; lub phab tooj ntxuav teg ntxuav taw hab lub taw phab;

¹⁷dlaim ntaub xov vaaj, cov ncej vaaj hab cov tag taw, dlaim ntaub roojvaag;

¹⁸lub Tsevntaub tej ntsa hab tej hlua paav lub Tsevntaub hab lub vaaj;

¹⁹hab tej tsoog tsho rua cov povthawj naav thaus puab moog ua num huv Chaav Dlawbhuv, tej tsoog tsho rua Aloos kws yog tug Povthawj Hlub hab nwg cov tub naav.”

²⁰Ces cov Yixalayees txawm sawv kev moog,

²¹hab puab txhua tug txaus sab hlo coj puab tej khoom tuaj fij ua tug TSWV lub Tsevntaub sis ntsib. Puab puavleej nqaa txhua yaam khoom moog tso rua huv lub tsev ntawd, kuas tau siv hab ua tej tsoog tsho rua cov povthawj.

²²Taagnrho tej quaspuj txivneej kws xaav muab khoom fij ntawd, txhaj nqaa paaj ntaub, qhws ntsej, nplhaib, saw, paug cejdlaab hab txhua yaam kws yog saw kub tuaj fij rua tug TSWV.

²³Txhua tug kws muaj coj tej tseem ntaub maag, ntaub xav, ntaub tsaamxem, xuv lab lossis tej tseem tawv nyuj tuaj.

²⁴Cov kws txaus sab muab nyaj lossis tooj tuaj fij, kuas puab ca le nqaa tuaj fij rua tug TSWV, hab txhua tug kws muaj ntoo kubtwg kws zoo siv coj tuaj huv tuabsi.

²⁵Txhua tug quaspuj kws txawj ntus ntaub kuas puab nqaa tej tseem xuv maaj, xuv xav, xuv tsaamxem hab xuv lab lossis tej ntaub kws puab tub ntus tau lawm huv tuabsi tuaj.

²⁶Hab kuas puab muab tej plaub tshis xuab ua xuv.

²⁷Kuas cov thawjcoj nqaa qai zeb hab lwm yaam hlaws kws muaj nqes tuaj dlai rua lub tsho efaus hab dlaim ntaub npug hauvsab,

²⁸hab nqaa tej ntoo tsw qaab hab tej roj kws saam rua cov teeb, cov roj txhawb meejthawj, hab tej moov tshuaj kws tsw qaab tuaj.

²⁹Cov Yixalayees tej quaspuj hab txivneej kws txaus sab hlo puavleej nqaa puab tej khoom tuaj fij pub rua tug TSWV ua tej num kws tug TSWV tau saamfwm rua Mauxes kuas puab ua ntawd.

³⁰Mauxes has rua cov Yixalayees has tas, “Tug TSWV xaiv Npexalees kws yog Ulis tug tub hab yog Haules tug xeebntxwv huv xeem Yudas tuaj.

³¹Vaajtswv pub rua nwg puv npo Vaajtswv tug ntsujplig, muaj kev txawj, muaj peevxwm hab totaub ua tau txhua yaam,

³²muaj tswvyim paub muab qauv hab txawj nchuav kub nchuav, nyaj nchuav hab tooj;

³³txav tej qai zeb dlai ua tej tshaam, txawj txua ntoo; hab txawj ua tau txhua yaam.

³⁴Hab Vaajtswv pub rua Auhauli-as kws yog Ahixamas tug tub kws yog xeem Daas, hab Npexalees kuas muaj peevxwm qha tau lwm tug.

³⁵Vaajtswv pub tswvyim rua obtug txawj ua txhua yaam kws yog txawj muab qauv, ntus tej tseem ntaub maag; ntaub xav, ntaub tsaamxem, hab ntaub plaub yaaj lab hab lwm yaam ntaub. Obtug muaj peevxwm ua tau txhua yaam hab txawj muab txhua yaam qauv.