Read Hmong Njua Tsiv Dlim 36 Bible Online

Tsiv Dlim 36 - Hmong Njua bible

Tsiv Dlim 36

¹“Npexalees, Auhauli-as hab txhua tug kws tug TSWV pub tswvyim kuas txawj hab totaub ua txhua yaam kws xaav tau lug ua lub Tsevntaub, puab ua txhua yaam lawv le tug TSWV saamfwm tseg.”

²Mauxes hu Npexalees, Auhauli-as hab taagnrho cov txivneej txawj ua num kws tug TSWV pub kuas muaj peevxwm hab cov kws txaus sab paab tuaj, hab Mauxes kuas puab ca le pib ua lub Tsevntaub.

³Mauxes muab tej khoom kws cov Yixalayees coj tuaj ua lub Tsevntaub rua puab hab cov Yixalayees tseem naj taagkig nqaa khoom fij tuaj rua Mauxes.

⁴Ces cov txivneej kws txawj ua num txhaj moog cuag

⁵Mauxes hab has rua nwg has tas, “Cov tuabneeg nqaa khoom tuaj ntau tshaaj tej kws peb xaav tau coj lug ua teg num kws tug TSWV saamfwm tseg kuas ua lawm.”

⁶Ces Mauxes txhaj has rua cov pejxeem thoob plawg huv lub yeej, kuas tsi xob nqaa khoom tuaj ua lub Tsevntaub ntxiv lawm; yog le ntawd, cov pejxeem txhaj tseg tsi nqaa tuaj lawm.

⁷Cov khoom kws puab xub nqaa tuaj, yeej txaus ua lub tsev tav lawm.

⁸Cov txivneej kws ua tug TSWV lub Tsevntaub puavleej yog cov kws paub hab txawj. Puab muab kaum dlaim ntaub maag kws txaij xav, tsaamxem, hab lab xaws ua dluab qhelunpees rua.

⁹Cov ntaub ntawd puavleej luj sis luag, ntev neeg nkaum yim tshim hab dlaav plaub tshim.

¹⁰Puab muab tsib dlaim ntaub xaws ua ib dlaig hab muab dlua tsib dlaim lug xaws ua ke ib yaam nkaus le ntawd.

¹¹Puab muab ntaub xav xaws ua ib cov ntsej tis lawv tug ntug thoob plawg dlaim ntaub ob saab ntug nrau.

¹²Ces puab muab tsib caug lub ntsej tis rua thawj dlaim, hab muab tsib caug lub tis rua dlaim ob kuas sis ncaag zog.

¹³Hab puab ntaus tsib caug lub khawb kub lug khawm ob dlaim ntaub ua ke.

¹⁴Ces puab muab plaub tshis ntus ua kaum ib dlaim ntaub lug vuv lub Tsevntaub.

¹⁵Hab puab ntus cov ntaub ntawd sis luag zog, ntev peb caug tshim hab dlaav plaub tshim.

¹⁶Puab muab tsib dlaim lug xaws ua ke ua ib dlaig hab muab rau dlaim lug xaws ua ke ua ib dlaig.

¹⁷Puab muab tsib caug lub ntsej tis rua thawj dlaim ntaub tug ntug ib saab hab muab dlua tsib caug lub ntsej tis rua dlaim ob tug ntug saab tod ib yaam nkaus.

¹⁸Puab muab tooj ntaus ua tsib caug lub khawb khawm ob dlaim ntaub ua ib dlaig vuv lub tsev.

¹⁹Puab tseem vuv ob txheej ntxiv tuaj saab sau, ib txheej yog cov tawv yaaj kws zaas lab hab ib txheej yog cov tawv kws zoo.

²⁰Puab phua ntoo kubtwg lug ua cov taab sawv ntsug rua lub Tsevntaub.

²¹Txhua tug taab sab kaum tshim hab dlaav ib tshim hab ib dlus,

²²muab ob tug taab qhais ua qwb dla, kuas ob tug taab ntawd sis dlhos ua ke.

²³Puab ua neeg nkaum tug taab rua saab nraag

²⁴hab muab plaub caug pluaj nyaj ua taw tag cov taab, ob dlaim tag taw, tag ib tug taab kuas ob tug taab ruaj.

²⁵Saab peg qaum Tsevntaub los puab ua neeg nkaum tug taab,

²⁶hab muab plaub caug pluaj nyaj ua cov tag taw, ob dlaim ua taw tag ib tug taab.

²⁷Lub Tsevntaub tog saab nubpoob, puab ua rau tug taab

²⁸hab ua ob tug rua ntawm ob lub kaum.

²⁹Ob tug taab kws nyob ntawm kaum tsev, muab sis dlhos huv taw nto plawg rua sau. Ob tug taab ntawm ob lub kaum tsev puavleej ua zoo ib yaam nkaus.

³⁰Yog le ntawd, txhaj muab yim tug taab hab kaum rau pluaj nyaj lug ua taw, ob pluaj nyaj tag ib tug taab.

³¹Puab muab ntoo kubtwg ua kaum tsib tug laag, tsib tug yuam ib saab phaab ntsaa Tsevntaub,

³²muab tsib tug yuam saab phaab ntsaa nraag, hab muab tsib tug yuam saab kws nyob saab nubpoob.

³³Tug laag ntoo kws yuam lub Tsevntaub saab phaab ntsaa ntu nruab nraab, yuam tog tom nuav moog ti nkaus tog tom u.

³⁴Puab muab kub lug vuam cov phaab ntsaa ntawd thoob plawg hab puab muab khawb kub khawm cov taab kws vuam kub huv tuabsi rua ntawm cov phaab ntsaa.

³⁵Dlaim ntaub thaiv, mas puab muab cov tseem ntaub maag kws txaij xav, tsaamxem hab lab, xaws ua dluab qhelunpees rua ntawm dlaim ntaub ntawd huv tuabsi.

³⁶Puab muab ntoo kubtwg ua plaub tug ncej kws dlai dlaim ntaub, muab kub vuam huv tuabsi, hab muab tej khawb kub lug khawm rua. Ces puab muab nyaj ntaus ua plaub dlaim taw tag plaub tug taw ncej ntawd.

³⁷Puab muab cov tseem ntaub maag kws txaij xav, tsaamxem hab lab, xaws ua paaj ntaub txaij nraug zeeg rua, lug ua dlaim npug lub qhovrooj Tsevntaub.

³⁸Puab ua tsib tug ncej dlai dlaim ntaub ntawd, muab khawb khawm rua, hab muab kub vuam cov hau ncej hab tej hlua paav ncej, hab muab tooj ua tsib dlaim taw tag tsib tug ncej ntawd.