Read Hmong Njua Tsiv Dlim 37 Bible Online

Tsiv Dlim 37 - Hmong Njua bible

Tsiv Dlim 37

¹Npexalees muab ntoo kubtwg lug txua ua lub Phijxaab kws ntim Vaajtswv tej lug cog tseg, ntev ob tshim hab ib dlus, dlaav ib tshim hab ib dlus, sab ib tshim hab ib dlus.

²Nwg muab cov tseem kub vuam saab huv, saab nrau hab ua ib tug ntug thi thoob plawg lub phijxaab.

³Nwg ua plaub lub khawb kub rua lub phijxaab, hab muab ntsa rua ntawm plaub ceg kaum taw phijxaab ib saab ob lub.

⁴Nwg muab ntoo kubtwg ua ob tug laag kwv lub Phijxaab, hab vuam kub huv tuabsi rua,

⁵hab muab ob tug laag ntawd ntxig rua cov khawb, ib saab Phijxaab ib tug.

⁶Nwg muab cov tseem kub lug ua lub hau phijxaab, ntev ob tshim hab ib dlus, dlaav ib tshim hab ib dlus.

⁷Nwg muab kub ntaus ua ob tug qhelunpees,

⁸ib tug txawb rua ib tog hau phijxaab. Nwg muab ob tug qhelunpees ntawd haam kag rua lub hau phijxaab.

⁹Ob tug qhelunpees ntawd puavleej tig ntsejmuag tuaj ua ke, hab ob tug qhelunpees ntawd puavleej nthuav tis npug lub phijxaab.

¹⁰Npexalees muab ntoo kubtwg txua ua ib lub rooj ntev ob tshim, dlaav ib tshim, sab ib tshim hab ib dlus.

¹¹Nwg muab cov tseem kub vuam lub rooj, hab muab kub ua ib tug ntug thi thoob plawg lub rooj ntawd.

¹²Nwg ua ib tug npoo sab le ib xib ncig lub ntug hab muab kub ua tug ntug thoob plawg lub npoo.

¹³Nwg ua plaub lub khawb kub ntsa rua plaub lub kaum rooj ntawm plaub tug ceg.

¹⁴Cov khawb kws ntxig ob tug laag kwv lub rooj, muab ntsa ze rua ntawm tug ntug.

¹⁵Nwg muab ntoo kubtwg ua ob tug laag kws kwv lub rooj hab muab kub vuam rua ob tug laag ntawd huv tuabsi.

¹⁶Nwg tseem muab tej tseem kub nchuav ua ib cov twj taig tau siv rua lub rooj: phaaj, khob, hab taig tau siv rau cawv txiv maab ua khoom fij.

¹⁷Npexalees muab cov tseem kub ua tug ncej txawb teeb. Nwg muab kub ntaus ua tug taw hab tug ncej txawb teeb; ntaus ua cov paaj, cos paaj, hab nplai paaj keevxeeb nrug tug ncej txawb teeb.

¹⁸Hab ua kuas ncau ua rau ceg, ib saab peb ceg.

¹⁹Rau ceg ntawd, ib ceg ua peb lub paaj zoo le paaj txiv dluaj, nrug cov cos paaj hab tej nplai paaj.

²⁰Tug ncej txawb teeb mas muab zaig ua plaub lub paaj zoo le paaj txiv dluaj, nrug cov cos paaj hab tej nplai paaj.

²¹Ntawm rau tug ceg teeb ntawd, ua ib lub paaj rua huv qaab ntawm cov ceg ncau.

²²Cov cos paaj, cov ceg hab tug ncej txawb teeb yog muab tuab thooj kub ntaus ua xwb.

²³Ua xyaa lub teeb rua ntawm tug ncej txawb teeb, hab nwg muab tej tseem kub ntaus ua phaaj hab txab txav teebxeeb.

²⁴Nwg muab xyaa caum tsib choj kub ntaus ua tug ncej txawb teeb hab tej twj siv rua lub teeb.

²⁵Npexalees muab ntoo kubtwg txua ua lub thaaj hlawv moov tshuaj tsw qaab. Lub thaaj ntawd txua ua plaub faab, ntev ib tshim hab dlaav ib tshim, hab sab ob tshim. Txua plaub tug kub koom hlo rua plaub ceg kaum thaaj.

²⁶Nwg muab tej tseem kub vuam rua plaub saab hab plaub tug kub huv tuabsi, hab muab ib pluaj kub ntsa puab tug ntug thoob plawg.

²⁷Ua khawb kub rua lub thaaj hab muab ntsa rua ob saab huv qaab tug ntug, ib saab twg ob lub ua chaw ntxig tug laag kwv lub thaaj.

²⁸Nwg muab ntoo kubtwg txua ua ob tug laag kwv lub thaaj hab muab kub vuam ob tug laag ntawd huv tuabsi.

²⁹Npexalees tseem ua cov roj txhawb meejthawj dlawbhuv hab muab cov nroj tsw qaab lug tov ib yaam le tov tej tshuaj tsw qaab.