Read Hmong Njua Tsiv Dlim 40 Bible Online

Tsiv Dlim 40 - Hmong Njua bible

Tsiv Dlim 40

¹Tug TSWV has rua Mauxes tas,

²“Koj ca le tsaa tug TSWV lub Tsevntaub sis ntsib rua lub ib hlis ntuj nub xab ib.

³Hab muab lub Phijxaab kws ntim Vaajtswv tej lug cog tseg coj moog tso rua huv lub Tsevntaub hab muab dlaim ntaub dlai thaiv lub phijxaab.

⁴Nqaa lub rooj lug teeb rua huv, muab tej cuabyeej tso rua sau lub rooj. Hab nqaa tug ncej teeb lug txawb hab muab cov teebxeeb rua huv lub teeb.

⁵Muab lub thaaj kub kws hlawv moov tshuaj tsw qaab teeb rua ntawm lub Phijxaab hauv ntej hab dlai dlaim ntaub thaiv lub qhovrooj Tsevntaub.

⁶Teeb ib lub thaaj rua ntawm lub Tsevntaub hauv ntej tau hlawv khoom fij.

⁷Hab muab lub phab ntxuav teg ntxuav taw teeb rua kis nruab nraab ntawm tug TSWV lub Tsevntaub hab lub thaaj, hab nqaa dlej lug laub rua kuas puv.

⁸Xov vaaj ncig thoob plawg hab muab dlaim ntaub lug dlai thaiv lub roojvaag.

⁹“Ces muab cov roj txhawb meejthawj nchus rua lub Tsevntaub hab taagnrho tej cuabyeej siv, kuas lub tsevntaub hab tej cuabyeej txhaj yuav dlawbhuv.

¹⁰Dlua le ntawd, tseem muab nchus rua lub thaaj hab lub thaaj tej cuabyeej, kuas lub thaaj tej cuabyeej txhaj yuav dlawbhuv.

¹¹Hab muab nchus rua lub phab ntxuav teg ntxuav taw hab lub taw phab huv tuabsi.

¹²“Coj Aloos hab nwg cov tub tuaj rua ntawm tug TSWV lub Tsevntaub sis ntsib lub qhovrooj, hab muab dlej lug ntxuav puab.

¹³Muab lub tsho luj rua Aloos naav hab muab nwg txhawb meejthawj, mej ua le nuav txhaj yog mej muab nwg tsaa ua povthawj ua kuv teg num.

¹⁴Coj Aloos cov tub tuaj hab muab cov tsho luj rua puab naav.

¹⁵Muab roj pleev puab ib yaam le pleev rua puab txiv, puab txhaj tau ua cov povthawj ua kuv teg num. Muab puab txhawb meejthawj le nuav, puab txhaj yuav tau ua cov povthawj moog ibtxhis.”

¹⁶Mauxes ua txhua yaam lawv le tug TSWV has rua nwg.

¹⁷Yog le ntawd, lub ib hlis ntuj nub xab ib kws yog xyoo ob, suav txij le thaus puab tsiv tawm nraag tebchaws Iziv lug, yog nub kws Mauxes tsaa lub Tsevntaub.

¹⁸Mauxes cog cov tag taw ncej, tsaa cov taab, muab cov laag lug yuam rua hab txhus cov ncej.

¹⁹Nthuav ntaub vuv lub Tsevntaub hab nthuav dlaim tawv kws vuv tuaj sau vuv lub tsev, lawv le tug TSWV tau saamfwm lawm.

²⁰Ces Mauxes txhaj muab ob dlaim txag zeb tso rua huv lub Phijxaab. Nwg muab ob tug laag ntxig rua ntawm lub Phijxaab cov khawb hab muab lub hau khwb lub phijxaab.

²¹Nwg muab lub Phijxaab moog tso rua huv lub Tsevntaub, hab dlai dlaim ntaub thaiv. Qhov kws nwg ua le nuav tub yog muab dlaim ntaub thaiv lub Phijxaab lawv le tug TSWV tau saamfwm tseg lawm.

²²Mauxes teeb rooj rua huv lub Tsevntaub ntawm dlaim ntaub thaiv saab peg,

²³hab muab cov ncuav kws fij rua tug TSWV tso rua sau lub rooj, lawv le tug TSWV tau saamfwm tseg rua nwg lawm.

²⁴Nwg muab tug ncej teeb moog txawb rua huv tug TSWV lub Tsevntaub sis ntsib saab nraag kws yog nyob sis ncaag zog lub rooj,

²⁵hab nwg taws cov teeb ntawd rua huv chaav kws nrug tug TSWV sis ntsib, lawv le tug TSWV tau saamfwm tseg rua nwg lawm.

²⁶Nwg muab lub thaaj kub coj moog teeb rua huv tug TSWV lub Tsevntaub sis ntsib ntawm dlaim ntaub kws kem lub tsev hauv ntej,

²⁷hab hlawv tej moov tshuaj kws tsw qaab, lawv le tug TSWV tau saamfwm tseg rua nwg.

²⁸Ces nwg txhaj dlai dlaim ntaub thaiv lub qhovrooj Tsevntaub,

²⁹hab nwg muab lub thaaj hlawv khoom fij coj moog teeb rua ntawm hauv ntej dlaim ntaub thaiv lub qhovrooj Tsevntaub sis ntsib. Nwg coj tej khoom fij hab tej qoobloo kws yog khoom fij coj moog hlawv huv tuabsi rua sau lub thaaj, lawv le tug TSWV tau saamfwm tseg rua nwg.

³⁰Nwg muab lub phab ntxuav teg ntxuav taw coj moog teeb rua ntawm tug TSWV lub Tsevntaub sis ntsib hab lub thaaj kis nruab nraab hab nqaa dlej lug laub rua huv puv nkaus.

³¹Mauxes, Aloos hab Aloos cov tub ntxuav puab tej teg hab tej taw ntawm lub phab ntawd,

³²puab ntxuav teg ntxuav taw ua ntej kws puab moog huv tug TSWV lub Tsevntaub sis ntsib lossis moog ntawm lub thaaj, lawv le tug TSWV tau saamfwm tseg rua nwg lawm.

³³Mauxes xov vaaj ncig lub Tsevntaub hab lub thaaj, hab nwg dlai ib dlaim ntaub thaiv lub roojvaag. Yog le ntawd, nwg txhaj ua txhua yaam tav huv tuabsi lawm.

³⁴Ces pus fuab tsaus nti laum nkaus tug TSWV lub Tsevntaub hab tug TSWV tug tshwjchim ci ntsaa ab huv tsev.

³⁵Vim le ntawd, Mauxes txhaj moog tsi tau rua huv tug TSWV lub Tsevntaub.

³⁶Thaus tauv fuab tshem tawm ntawm lub Tsevntaub lawm, cov Yixalayees txhaj tshais chaw tau moog rua lwm qhov.

³⁷Tabsis yog tauv fuab ntawd tsi tshem, ces puab yeej tsi tshais chaw moog txug thaus kws tauv fuab tshem.

³⁸Lub sijhawm kws cov Yixalayees pheej tsiv moog tsiv lug, nruab nub puab yeej pum tauv fuab kws yog tug TSWV qhov chaw nyob pus tsaus nti sau lub Tsevntaub hab mo ntuj muaj nplaim tawg cig laam lug.