Read Hmong Njua Yauj 13 Bible Online

Yauj 13 - Hmong Njua bible

Yauj 13

¹“Tej kws koj has ntawd, kuv tub nov taag lawm, kuv totaub txhua yaam; kuv paub ib yaam le koj paub. Kuv lub qhovmuag yeej pum tej nuav lawm, kuv tsi tau swb koj.

³Tabsis yog kuv nrug Vaajtswv sis has, tsi yog nrug koj sis caav; kuv xaav nrug Vaajtswv sis has txug kuv zaaj.

⁴Koj muab tej lug dlaag lug npug koj txujkev ruag; koj zoo le tej kws tshuaj kws khu tsi tau luas tej mob zoo.

⁵Koj tsi xob has lug, luas txhaj xaav has tas, koj yog tuabneeg ntse!

⁶“Koj ca le noog kuv has kuv zaaj.

⁷Vim le caag koj has lug dlaag? Koj xaav has tas, koj tej lug dlaag muaj nqes rua Vaajtswv nua los?

⁸Koj yuav tuaj Vaajtswv tog txheem los? Koj yuav nrug Vaajtswv has nwg zaaj huv tsev tu plaub los?

⁹Yog Vaajtswv ua tuab zoo saib koj, nwg puas pum koj muaj ib qho zoo? Koj xaav has tas koj dlaag tau Vaajtswv le koj dlaag tuabneeg nua los?

¹⁰Yog has tas koj ua tsi ncaaj rua ib tog, Vaajtswv yuav rau txim nyaav rua koj,

¹¹hab nwg lub fwjchim yuav ua rua koj ntshai kawg nkaus le.

¹²Koj tej paajlug tsi muaj nqes ib yaam le tej moov tshauv; koj tej lug sis caav muas ib yaam le tej aav nplaum.

¹³Koj ca le nyob tuabywv, kuv txhaj le muaj sijhawm has lug, ca saib thaus kawg tej ntawd yuav zoo le caag.

¹⁴“Kuv pheej moo ua kuv lub neej.

¹⁵Kuv taag kev ca sab lawm, Vaajtswv yuav muab kuv tua povtseg los xij. Kuv yeej yuav moog nrug nwg has kuv zaaj xwb.

¹⁶Tej zag qhov kws kuv muaj lub sab tawv le nuav yuav paab tau kuv, rua qhov cov tuabneeg sab phem tsi muaj ib tug moog cuag tau Vaajtswv le.

¹⁷Nwgnuav koj ca le ua tuab zoo noog tej lug kws kuv qha koj.

¹⁸Kuv yeej npaaj rawv yuav moog has kuv zaaj, rua qhov kuv paub has tas kuv tsi tau ua txhum.

¹⁹“Vaajtswv, koj yuav kom kuv ntaag los? Yog koj kom kuv, ces kuv yeej has tsi taug hab tuag xwb!

²⁰Ca kuv thov ob yaam; thov kuas koj pum le nuav, kuv yuav tsi tsiv nkaum koj;

²¹tsi xob rau txim rua kuv, hab tsi xob ua rua kuv ntshai dlhau.

²²“Vaajtswv, koj has ua ntej, kuv maam le teb Lossis ca kuv has ua ntej, koj maam le teb.

²³Kuv tej kev txhum yog dlaabtsi? Kuv tau ua txhum dlaabtsi? Thov koj ca le phua kuv tej kev txhum rua kuv.

²⁴“Vim le caag koj tso kuv tseg? Vim le caag koj saib kuv zoo le tug yeebncuab?

²⁵Puas yog koj ua kuas kuv ntshai? Kuv tsi tseemceeb dlaabtsi le; kuv zoo le dlaim nplooj xwb; koj laam tawmtsaam tej nyuas quavnyaab qhuav los?

²⁶“Koj muab kev ab sab lug tawmtsaam kuv, koj sau tej kev txhum kws kuv ua thaus kuv tseem hluas lug rua kuv ris.

²⁷Koj muab saw hlau khi kuv kutaw; koj saib ntsoov kuv rhais txhua kaujruam, hab koj tu nrim rua kuv tsuj.

²⁸Thaus kawg kuv zoo ib yaam le yaav caav ntoo lwj, hab zoo ib yaam le lub tsho kws ntsaum kaabrwg noj.”