Read Hmong Njua Yauj 17 Bible Online

Yauj 17 - Hmong Njua bible

Yauj 17

¹“Kuv txujsa tub yuav tu. Kuv ua tsi taug paa lawm; tsi tshuav ib yaam dlaabtsi rua kuv le, tsuas tshuav lub qhov ntxaa qheb lug tog kuv xwb.

²Kuv saib ntsoov luas txobthuam kuv mob kawg le.

³Vaajtswv, kuv yeej ua ncaaj, thov koj noog kuv tej lug, yeej tsi muaj leejtwg noog kuv tej lug le.

⁴Koj kaw puab lub sab kuas puab tsi totaub; thov tsi xob pub puab kovyeej kuv.

⁵Tug tuabneeg kws dlaag nwg tug phoojywg tej nyaj yuav, nwg tej mivnyuas yuav raug kev txomnyem vim tej kws nwg ua ntawd.

⁶Vaajtswv ua rua kuv raug luas has tsi zoo, hab luas nti quavncaug rua kuv ntsejmuag.

⁷Kuv tej kev quaj ntsuag ua rua kuv lub qhovmuag tsi pum kev; kuv ob txhais npaab hab ob txhais ceg ntxaug qhuav qhawv ib yaam le tej mojzeeg.

⁸Cov tuabneeg kws khaav has tas puab ncaaj nceeg, yuav xaav tsi thoob tej nuav, hab puab thuam has tas kuv tsi fwm Vaajtswv.

⁹Cov tuabneeg kws muaj meejmom khaav has tas, puab yog cov ncaaj nceeg tshaaj.

¹⁰Tabsis yog puab cov ntawd tuaj sawv taabmeeg kuv, kuv pum has tas puab tsi muaj ib tug ntse le.

¹¹“Kuv lub sijhawm tub dlhau lawm, tej kws kuv npaaj sab ua tsi tau tav; kuv taag kev ca sab lawm.

¹²Tabsis kuv tej phoojywg has tas mo ntuj yuav hloov ua nruab nub; puab has tas, qhov kaaj tub lug ze lawm, tabsis kuv pum has tas, kuv tseem nyob huv qhov tsaus ntuj nti.

¹³Kuv txujkev ca sab tsuas yog tubtuag teb xwb, yog qhov chaw tsaus ntuj nti kws kuv yuav moog pw.

¹⁴Kuv yuav hu lub qhov ntxaa ua kuv txiv, hab hu tej kaas kws noj kuv ua kuv nam hab kuv cov muam.

¹⁵Kuv tseem tshuav kev ca sab hab los? Leejtwg pum has tas tseem muaj kev ca sab?

¹⁶Thaus kuv moog rua huv tubtuag teb, kuv tsi muaj kev ca sab le lawm.”