Read Hmong Njua Yauj 18 Bible Online

Yauj 18 - Hmong Njua bible

Yauj 18

¹Npiledas kws yog tuabneeg Suhas has tas, “Yauj, koj txawm yuav has lug tsi paub xaus le los? Yog koj tsum, peb txhaj yuav has rua koj noog.

³Ua le caag koj xaav has tas, peb ruag ib yaam le tej nyuj?

⁴Qhov kws koj chim hajyam ua rua koj mob heev xwb. Koj txujkev chim puas yuav ua rua lub nplajteb nuav hloov ua suabpuam? Vaajtswv puas yuav muab tej hauv roob tshem kuas koj zoo sab?

⁵“Tug tuabneeg sab phem lub teeb tub tuag hab nwg lub cubtawg yuav tsi cig lawm.

⁶Lub teeb kws nyob huv nwg lub tsevntaub yuav tsaus moog.

⁷Thaus u nwg rhais ruj khov kho, tabsis nwgnuav nwg qaug lawm; qhov kws nwg qaug tub yog vim nwg ua ywj nwg lub sab.

⁸Nwg taug kev moog rua ntawm luas lub vuj hlua, hab lub vuj hlua yuav soo nwg kutaw,

⁹raab cuamkoob yuav tais nwg laujtaws ruaj nreeg ca.

¹⁰Luas faus vuj hlua rua huv aav; hab cuab muv tog nwg kev.

¹¹“Muaj kev txhawj ntshai nyob puagncig nwg, hab caum nwg moog txhua kaujruam.

¹²Nwg ibtxwm npluanuj, tabsis nwgnuav nwg tshaib nqhes; kev puamtsuaj sawv ntawm nwg ib saab tog nwg.

¹³Muaj mob ua paug mag thoob plawg nwg lub cev, ua rua nwg ob txhais npaab hab ob txhais ceg qawj tub zuj zug.

¹⁴Nwg raug muab rhu tawm huv lub tsevntaub kws nwg nyob kaaj sab lug, hab muab caab moog cuag tug vaajntxwv kws yog kev tuag.

¹⁵Suavtawg leejfaaj yuav kub txhua yaam huv nwg lub tsevntaub kuas taag dlu lug tsi tshuav ib yaam dlaabtsi nyob huv le lawm.

¹⁶Nwg tej caag yuav qhuav hab tej nplooj yuav ntsws.

¹⁷Nwg lub koob lub npe yuav pluj huv nplajteb nuav moog; hab yuav tsi muaj leejtwg ncu txug nwg le lawm.

¹⁸Luas yuav muab nwg tshem tawm ntawm cov kws tseem muaj sa nyob lub tebchaws moog, hab muab nwg ntab tawm ntawm qhov kaaj moog rua huv qhov kws tsaus ntuj nti.

¹⁹Nwg tsi muaj xeebntxwv seem ua neej nyob le lawm.

²⁰Tej tuabneeg kws nyob saab nub tuaj hab saab nubpoob, nov txug tej kev puamtsuaj kws lug raug nwg, puab ntshai ua ib ce tshee nyo.

²¹Cov tuabneeg kws ua phem ua qas yuav tau tej nuav, hab cov tuabneeg kws tsi quavntsej Vaajtswv los yuav tau tej nuav ib yaam nkaus.”