Read Hmong Njua Yauj 19 Bible Online

Yauj 19 - Hmong Njua bible

Yauj 19

¹Yauj has tas, “Ua le caag mej pheej has lug twm kuv?

³Mej naj nub has lug saib tsi taug kuv, mej pheej tshev kuv, mej tsi txaajmuag le.

⁴Txawm yog kuv tau ua txhum tag los tej kev txhum ntawd tsuas raug kuv xwb.

⁵Mej xaav has tas mej yog tuabneeg zoo dlua kuv, hab mej suav has tas qhov kws kuv raug kev txomnyem yog kuv ua txhum.

⁶Mej tsi paub has tas Vaajtswv yog tug kws ua tej nuav los? Nwg cuab hlua kuas maag kuv.

⁷Kuv caam qhov kws nwg quab yuam kuv, tabsis tsi muaj leejtwg noog kuv has; tsi muaj leejtwg nov kuv lub suab quaj thov kev ncaaj nceeg.

⁸Vaajtswv taav kuv txuj hauv kev, kuv txhaj moog tsi dlhau; nwg ua rua kuv txuj hauv kev tsaus ntuj quas nti.

⁹Nwg sau kuv tej nyaj tej kub lawm taag, hab txu kuv lub koob lub npe poob.

¹⁰Nwg puav kuv ntaus txhua ceg kaum. Nwg rhu kuv txujkev ca sab ib yaam le dlob ntoo kuas kuv qhuav hab tuag moog.

¹¹Vaajtswv chim hab ua nruj ua tsiv tawmtsaam kuv; nwg ua rua kuv ib yaam le kuv yog nwg tug yeebncuab.

¹²Nwg tso nwg tej tubrog tuaj tawmtsaam kuv; puab khawb qhov hab tsuam yeej puagncig kuv lub tsevntaub.

¹³“Vaajtswv ua rua kuv tej kwvtij tso kuv tseg; cov tuabneeg kws ibtxwm swm kuv tsi paub kuv lawm;

¹⁴kuv tej kwvtij kwv npawg tsiv taag tso kuv tseg.

¹⁵Tej tuabneeg kws ibtxwm tuaj ua qhua huv kuv tsev tsi xaam muaj kuv lawm; txawm yog kuv tej ntxhais qhev los saib kuv zoo le tug qhua hab zoo le tej tuabneeg txawv tebchaws lawm xwb.

¹⁶Thaus kuv hu kuv tug tubkhai, nwg tsi teb kuv, txawm yog kuv thov nwg los nwg tsi paab.

¹⁷Kuv tug quaspuj na tsi taug kuv tug ntxhab, hab kuv tej kwvtij tsi muaj ib tug txaav lug ze kuv.

¹⁸Thaus tej mivnyuas yau pum kuv, puab saib tsi taug kuv.

¹⁹Kuv tej phoojywg kws zoo los puab qas kuv; cov tuabneeg kws ibtxwm hlub kuv tig rov tawmtsaam kuv.

²⁰Kuv ntxaug heev tshuav tawv qhwv txhaa lawm xwb; kuv tub yuav laug tsi caj lug ua neej nyob.

²¹Mej yog kuv cov phoojywg, mej ca le hlub kuv! Vim Vaajtswv tsaa nwg txhais teg ntaus kuv qaug lawm.

²²Ua le caag mej txhaj tsimtxom kuv ib yaam le Vaajtswv ua rua kuv? Mej tseem tsimtxom kuv tsi tau txaus los?

²³“Kuv xaav kuas muaj ib tug ncu kuv tej lug hab muab sau tseg rua nruab ntaw!

²⁴Lossis muab kuv tej lug txaug rua ntawm tej pobzeb kuas nyob moog ibtxhis.

²⁵Tabsis kuv paub has tas, muaj ib tug nyob sau ntuj, thaus kawg nwg yuav lug paab kuv dlaws kuv zaaj.

²⁶Txawm yog tej kaab mob noj kuv cev nqaj dlaim tawv taag lawm los tam neej nuav kuv tseem yuav pum Vaajtswv.

²⁷Kuv lub qhovmuag yuav pum ntsoov nwg, nwg yuav tsi zoo le tug tuabneeg kws kuv tsi paub. Kuv qaug zug rua qhov mej has tas,

²⁸‘Peb yuav tsimtxom nwg le caag?’ Mej nrhav tswvyim ntau yaam tawmtsaam kuv.

²⁹Tabsis nwgnuav mej ca le ntshai nav ntaaj nav rag, Vaajtswv txujkev chim yog raab ntaaj kws yuav hlais tug tuabneeg kws ua txhum, kuas mej paub has tas, muaj ib tug yuav txav txim.”