Read Hmong Njua Yauj 24 Bible Online

Yauj 24 - Hmong Njua bible

Yauj 24

¹“Vim le caag, Vaajtswv tsi teem ib lub sijhawm tseg txav txim, hab ua le caag cov kws ua nwg teg num tsi pum nub kws txav txim ncaaj nceeg le?

²“Tej tuabneeg kws naam luas nrimteb kuas tau aav dlaav; puab moog nyag luas tej yaaj lug ua puab tug.

³Puab moog txhaav cov mivnyuas ntsuag tej neeg luav, hab caab cov puj ntsuag tej nyuj lug yuam nqe moog txug thaus kws puab them nqe taag.

⁴Puab yuam cov tuabneeg pluag txuj cai hab ntab cov tuabneeg txomnyem tsiv tawm moog.

⁵“Yog le ntawd, cov tuabneeg txomnyem txhaj moog nrhav noj tom taj suabpuam ib yaam le tej neeg luav qus; tsi muaj ib thaaj chaw twg kws puab yuav moog nrhav zaub mov lug rua puab tej mivnyuas noj le.

⁶Puab yuav tau moog sau qoobloo tom tej teb kws tsi yog puab le hab yuav tau moog dle txiv maab huv cov tuabneeg sab phem tej vaaj.

⁷Mo ntuj puab pw labqaab tsi muaj rig tsho naav, hab tsi muaj ib yaam dlaabtsi rua puab vuv tiv no le.

⁸Tej kob tuamtsaam naag kws lug lawv roob ua rua puab ntub taag, hab puab moog nraim ntawm tej qaab pobzeb xwb.

⁹“Cov tuabneeg sab phem yuam tej mivnyuas kws tsi muaj nam tsi muaj txiv ua puab qhev, hab puab moog coj cov tuabneeg pluag tej mivnyuas lug yuam tej nqe kws cov tuabneeg pluag them tsi taug.

¹⁰Tabsis cov tuabneeg pluag yuav tau tawm labqaab moog tiv thaiv puab tej mivnyuas; hab puab yuav tau yoo tshaib moog sau qoob.

¹¹Puab yuav tau yoo nqhes moog tsuam txiv ntoo roj lug ua roj, hab moog tsuam txiv maab lug ua cawv.

¹²Tej tuabneeg kws raug mob hab yuav tuag, quaj ntsoog qeeg huv tej nroog, tabsis Vaajtswv tsi quavntsej puab tej lug thov le.

¹³“Muaj ib cov tuabneeg tsi kaam txais yuav txujkev kaaj; puab tsi totaub hab tsi paub moog lawv le txujkev kaaj coj puab.

¹⁴Thaus sawv ntxuv cov tuabneeg tua tuabneeg sawv moog tua cov tuabneeg pluag hab cov txomnyem, hab thaus tsaus ntuj, puab moog ua tubsaab.

¹⁵Tug tuabneeg kws ua kev nkauj kev nraug tog tsi taug tsaus ntuj, nwg muab ntaub npug nwg lub ntsejmuag kuas tsi muaj leejtwg paub nwg.

¹⁶Mo ntuj tubsaab tsoo lug huv tsev, tabsis nruab nub tubsaab tsiv moog nkaum kuas luas tsi pum.

¹⁷Nruab nub puab ntshai qhov kaaj, tabsis mo ntuj puab tsi ntshai dlaabtsi le.”

¹⁸“Tug tuabneeg sab phem yuav raug dlej kuav moog, hab puab tej laj teb yuav raug Vaajtswv foom tsi zoo; puab yuav tsi tau moog tu puab tej vaaj txiv maab lawm.

¹⁹Tshaav ntuj zab tej dlaus yaaj hab qhuav le caag, ces tubtuag teb yuav coj tug tug tuabneeg txhum moog ib yaam le ntawd ntaag.

²⁰Txawm yog puab nam los tub tsi ncu txug puab le lawm; kaas yuav noj puab lub cev hab puab cev nqaj yuav puamtsuaj ib yaam le tug caav ntoo lwj.

²¹Tej ntawd lug raug puab rua qhov puab tsi ua zoo rua tej puj ntsuag hab tsi ua sab dlawb sab zoo rua cov quaspuj kws tsi muaj mivnyuas.

²²Vaajtswv lub fwjchim yuav rhuav tshem cov tuabneeg kws muaj zug; cov tuabneeg sab phem ua neej nyob tsi muaj kev ca sab.

²³Vaajtswv ca puab nyob tso sab lug, tabsis Vaajtswv saib ntsoov puab txhua lub sijhawm.

²⁴Cov tuabneeg sab phem lub neej tsuas vaammeej ib ntus xwb, tabsis tom qab ntawd puab yuav ntsws hab qhuav ib yaam le tej nroj tsuag, puab zoo ib yaam le tej kaav nplej kws luas muab txav lawm.

²⁵Puas muaj leejtwg ua timkhawv has tas, tsi muaj le ntawd? Puas muaj leejtwg ua timkhawv has tas, kuv tej lug tsi tseeb?”