Read Hmong Njua Phoo Ntawv Nkauj 101 Bible Online

Phoo Ntawv Nkauj 101 - Hmong Njua bible

Phoo Ntawv Nkauj 101

¹Tug Tswv, kuv hu nkauj qhuas koj, kuv zaaj nkauj yog has txug qhov kws koj ua sab dlawb sab zoo hab ncaaj nceeg.

²Kuv yuav xyum ua lub neej kuas tsi muaj leejtwg thuam tau le. Thaus twg koj maam lug cuag kuv? Kuv yuav ua lub neej dlawbhuv nyob huv kuv lub tsev

³hab kuv yuav tsi quavntsej tej kev phem kev qas le. Kuv ntxub tej kws cov tuabneeg tsiv tawm ntawm Vaajtswv moog lawm ua; kuv yuav tsi raus teg rua tej kev phem kev qas ntawd le.

⁴Kuv yuav tsi ua tuabneeg sab nkhaus hab kuv yuav tsi koom nrug cov tuabneeg sab phem.

⁵Kuv yuav muab cov tuabneeg kws has luas plig ua kuas puamtsuaj; kuv yuav tsi ua sab ntev rua tug tuabneeg khaavtheeb hab muaj plhus hlo le.

⁶Kuv yuav pub cov tuabneeg kws muaj lub sab npuab Vaajtswv nyob huv kuv lub loog. Kuv yuav ca cov tuabneeg kws muaj lub sab ncaaj ua kuv teg num.

⁷Yuav tsi muaj tuabneeg dlaag nyob huv kuv lub loog; yuav tsi muaj cov tuabneeg ntsejmuag ncaaj sab nkhaus nyob taabmeeg kuv.

⁸Kuv yuav rhuav cov tuabneeg sab phem kws nyob huv peb lub tebchaws ib nub dlhau ib nub kuas pluj taag; kuv yuav muab cov tuabneeg limham ntab tawm huv tug TSWV lub nroog moog.