Read Hmong Njua Phoo Ntawv Nkauj 106 Bible Online

Phoo Ntawv Nkauj 106 - Hmong Njua bible

Phoo Ntawv Nkauj 106

¹Ca le qhuas tug TSWV! Ca le ua tug TSWV tsaug, rua qhov nwg muaj sab dlawb sab zoo; nwg txujkev hlub nyob moog ibtxhis.

²Leejtwg txhaj muaj cuabkaav pav tau tej txujci tseemceeb kws tug TSWV tau ua? Leejtwg txhaj txawj qhuas nwg taag sab nrho?

³Cov tuabneeg kws naj nub ua ncaaj lawv le tug TSWV tej lug saamfwm, mas puab yog cov kws muaj kev zoo sab kawg le.

⁴Tug TSWV, thaus koj paab koj tsaav tuabneeg thov koj ncu ntsoov kuv; thaus koj cawm puab thov xaam txug kuv hab.

⁵Thov kuas kuv pum koj tsaav tuabneeg vaammeej, hab tau koom koj tsaav tuabneeg ua neej nyob kaaj sab lug; kuas kuv txhaj tau nrug koj tsaav tuabneeg tau koob meej.

⁶Peb tau ua txhum ib yaam le peb cov yawmkoob; peb tau ua kev txhum hab ua phem ua qas lawm.

⁷Thaus tseem nyob nraag tebchaws Iziv, peb cov yawmkoob tsi totaub Vaajtswv tej txujci kws tseemceeb le; puab tsi ncu qaab has tas nwg tau qha nwg txujkev hlub rua puab hab thaus nyob ntawm Havtxwv Lab, puab tau ntxeev sab rua tug kws muaj Fwjchim Luj kawg nkaus.

⁸Txawm le ntawd los nwg tseem cawm puab lawv le nwg tau coglug tseg, yog nwg xaav qha nwg lub fwjchim kws luj rua puab pum.

⁹Nwg has rua dlej Havtxwv Lab, ces dlej txawm faib hlo ua kev qhuav qhawv; nwg coj nwg tsaav tuabneeg moog dlhau rua saab tim u.

¹⁰Nwg paab puab dlim ntawm cov tuabneeg kws ntxub puab; nwg cawm puab dlim ntawm puab cov yeebncuab.

¹¹Dlej havtxwv nphau nphwv lug npug nkaus puab cov yeebncuab; ua rua cov yeebncuab tsi seem ib tug le.

¹²Nwg tsaav tuabneeg txhaj ntseeg nwg tej lug cog tseg hab hu nkauj qhuas nwg.

¹³Tabsis puab txawm siv tsi ncu qaab tej txujci kws tug TSWV tau ua lawm, puab laam tau laam ua tsi yuav Vaajtswv ua tug tuavxaam le.

¹⁴Thaus nyob nraag taj suabpuam, puab sab hlub xaav tau ntau, puab txhaj sim Vaajtswv sab;

¹⁵nwg kuj muab tej kws puab thov rua puab, tabsis nwg tso tej kaab mob kws txaus ntshai heev lug rua puab.

¹⁶Thaus nyob nraag taj suabpuam puab ua saib tsi taug Mauxes hab Aloos kws yog tug TSWV ob tug tubkhai kws dlawbhuv.

¹⁷Ces aav txawm qheb hlo nqog kag Dathaas hab nphau lug txhub Anpilaas tsev tuabneeg;

¹⁸suavtawg poob lug kub puab cov kwvtij hab hlawv cov tuabneeg sab phem tuag taag huv tuabsi.

¹⁹Puab muab kub lug nchuav ua ib tug mlom nyuj rua ntawm Roob Xinais hab puab pe tug mlom nyuj ntawd;

²⁰puab muab tug mlom kws zoo le tug tsaj noj zaub lug hloov Vaajtswv tug tshwjchim kws ci ntsaa quas ab chaw.

²¹Puab tsi ncu qaab tug Vaajtswv kws tau ua tej txujci luj cawm puab dlim nraag tebchaws Iziv lawm.

²²Tug TSWV tau ua tej txujci tseemceeb nyob nraag tebchaws Iziv! Hab tau ua tej txujci kws xaav tsi thoob nyob ntawm Havtxwv Lab!

²³Thaus Vaajtswv has tas nwg yuav ua kuas nwg tsaav tuabneeg puamtsuaj, Mauxes kws yog Vaajtswv tug tubkhai kws nwg xaiv txawm sawv cheem Vaajtswv tsi pub nwg txujkev chim rhuav nwg tsaav tuabneeg.

²⁴Cov Yixalayees tsi kaam moog nyob huv lub tebchaws kws tau zoo, rua qhov puab tsi ntseeg Vaajtswv tej lug cog tseg.

²⁵Puab nyob huv puab tej tsevntaub hab ywg taag zug, tsi kaam noog tug TSWV tej lug le.

²⁶Yog le ntawd nwg txhaj has rua puab tas, nwg yuav ca kuas puab tuag taag rua huv taj suabpuam,

²⁷hab yuav muab puab cov xeebntxwv ntab tsiv moog nyob ua saab ua sua xyaw lwm tsaav tuabneeg, hab yuav ca puab tuag taag rua huv luas tej tebchaws.

²⁸Thaus nyob huv lub nroog Pe-aus, Vaajtswv tsaav tuabneeg tau moog nrug luas pe Npa-aas; hab moog nrug luas noj tej kws muab fij rua tej vaajtswv kws tsi muaj sa.

²⁹Tej kws puab ua ntawd ua rua tug TSWV npautawg, nwg txhaj tso tej kaab mob kws txaus ntshai heev lug rua puab.

³⁰Tabsis Finehas txawm sawv tseeg rau txim rua cov tuabneeg kws ua txhum, ces tej kaab mob ntawd txhaj dlua moog lawm.

³¹Qhov ntawd yog ua kuas puab ncu ntsoov tseg, ib tam rua ib tam moog ibtxhis le.

³²Nyob ntawm lub qhovdlej Melinpas, Mauxes ntxhuv sab kawg le, rua qhov cov Yixalayees ua rua tug TSWV chim heev.

³³Puab tau ua rua Mauxes npautawg kawg le, Mauxes txhaj laam tau laam has lug tsi xaav tom ntej tom qaab.

³⁴Puab tsi muab cov yeebncuab tua kuas tuag taag lawv le tug TSWV has,

³⁵tabsis puab moog nrug cov tuabneeg ntawd ua tshoob ua kug hab moog xyum ua lawv le cov tuabneeg ntawd ua.

³⁶Vaajtswv tsaav tuabneeg moog pe mlom, puab txhaj moog maag luas lub vuj hlua.

³⁷Puab muab puab tej tub tej ntxhais tua fij rua tej mlom huv tebchaws Kana-aas.

³⁸Puab muab puab tej mivnyuas kws tsi muaj txhum tua, vim puab tua tuabneeg le ntawd, puab lub tebchaws txhaj tsi huv lawm.

³⁹Tej kws puab ua ntawd, ua rua puab tsi huv hab puab tsi muab sab npuab Vaajtswv lawm.

⁴⁰Yog le ntawd tug TSWV txhaj chim rua nwg tsaav tuabneeg; hab nwg dlhuav puab heev.

⁴¹Nwg muab puab cob rua lwm tsaav tuabneeg txhais teg, hab ca puab cov yeebncuab tuaj kaav puab.

⁴²Puab raug puab cov yeebncuab tsimtxom hab raug yuam ua qhev.

⁴³Tug TSWV tau paab puab ntau zag lawm, tabsis puab txhobtxwm ntxeev sab rua nwg hab puab tau moog ua kev txhum luj heev.

⁴⁴Txawm le ntawd los thaus puab thov tug TSWV, nwg nov puab tej suab quaj hab nwg paab puab dlim kev txomnyem.

⁴⁵Vim nwg taabncuab puab, nwg txhaj ncu txug nwg tej lug cog tseg, hab vim nwg txujkev hlub luj heev, nwg txhaj hloov sab.

⁴⁶Nwg ua rua cov tuabneeg kws tsimtxom puab paub tu sab rua tej kws puab ua limham ntawd.

⁴⁷Tug TSWV kws yog peb tug Vaajtswv, thov cawm peb hab coj peb tawm huv lwm tsaav tuabneeg rov qaab lug; kuas peb txhaj tau ua koj tsaug hab qhuas koj lub npe kws dlawbhuv.

⁴⁸Ca le qhuas tug TSWV kws yog cov Yixalayees tug Vaajtswv; nwgnuav ca le qhuas nwg hab qhuas nwg moog ibtxhis le. Hab suavdlawg has tas, “Amees!” Ca le qhuas tug TSWV!