Read Hmong Njua Phoo Ntawv Nkauj 109 Bible Online

Phoo Ntawv Nkauj 109 - Hmong Njua bible

Phoo Ntawv Nkauj 109

¹Vaajtswv, kuv qhuas koj; thov koj tsi xob nyob ntsag tu!

²Cov tuabneeg sab phem hab dlaag ntxag tuaj tawmtsaam kuv, hab puab has lug dlaag rhuav kuv rua nuav rua u,

³hab puab has tej lug phem qas rua kuv, hab puab laam tau laam tawmtsaam kuv tsi muaj qaabhau le.

⁴Txawm yog kuv hlub puab hab thov Vaajtswv paab puab los puab pheej tawmtsaam kuv le.

⁵Puab ua phem pauj kuv tej kev ua zoo hab puab muab kev ntxub pauj kuv tej kev hlub.

⁶Ca le xaiv ib tug txav txim tsi ncaaj moog sim kuv tug yeebncuab, hab ca kuas nwg cov yeebncuab ib tug tuaj kom nwg.

⁷Thov kuas nwg yog tug kws luas has tas nwg yog tug txhum, hab thov kuas nwg tej lug thov rov rau txim rua nwg.

⁸Thov tsi xob pub nwg muaj sa nyob ntev; ca lwm tug lug ua nwg teg num!

⁹Thov kuas nwg cov mivnyuas ua ntsuag, hab nwg tug quaspuj ua puj ntsuag!

¹⁰Thov kuas nwg cov mivnyuas ua tuabneeg lajlees hab tsi muaj vaaj tse nyob; thov kuas puab raug lawv tawm huv puab tej tsev kws puag taag ntawd moog!

¹¹Thov kuas cov tuabneeg kws qev rua nwg, tuaj txeeb nwg vaaj nwg tsev; thov ca luas tuaj txeeb txhua yaam kws nwg tau lug huv tuabsi moog.

¹²Thov kuas tsi xob muaj ib tug twg ua zoo rua nwg lossis tsi xob quavntsej nwg tej mivnyuas ntsuag kws nwg tso tseg le.

¹³Thov kuas nwg cov xeebntxwv tuag taag huv tuabsi, hab kuas tam tuabneeg tom ntej nuav tsi xob muaj leejtwg ncu txug nwg lub npe le lawm.

¹⁴Thov kuas tug TSWV ncu ntsoov nwg cov yawmkoob tej kev phem kev qas hab tsi xob zaam nwg nam tej kev txhum hlo le.

¹⁵Thov Vaajtswv ncu ntsoov puab tej kev txhum, tabsis thov tsi xob ncu txug puab hlo le lawm!

¹⁶Tug tuabneeg ntawd tsi muaj lub sab dlawb sab zoo; nwg tsimtxom hab tua cov tuabneeg pluag, cov txomnyem hab cov kws taag kev ca sab.

¹⁷Nwg nyam foom phem rua luas, thov kuas nwg tej lug foom phem ntawd rov lug raug nwg! Nwg ntxub txujkev foom koob moov rua luas, thov kuas tsi xob muaj tuabneeg foom koob moov rua nwg.

¹⁸Nwg muab tej lug foom phem lug naav ib yaam le naav rig tsho; thov kuas nwg tej lug foom phem nkaag moog rua huv nwg lub cev ib yaam le dlej, hab nkaag moog rua huv nwg cov pobtxhaa ib yaam le roj.

¹⁹Thov kuas tej lug foom phem ntawd looj nkaus nwg le tej tsoog tsho hab rig nwg lub cev le txuj hlaab.

²⁰Tug TSWV, thov rau txim rua kuv cov yeebncuab le ntawd, cov kws pheej has lug phem tawmtsaam kuv!

²¹Tabsis tug TSWV kws kaav ib puas tsaav yaam, thov koj paab kuv lawv le koj tau coglug lawm; hab thov tso kuv dlim vim koj txujkev hlub kws zoo kawg nkaus.

²²Kuv pluag hab txomnyem heev, tu kuv sab kawg le.

²³Kuv taabtom yuav pluj moog ib yaam le tug dluab ntxoov ntxoo thaus yuav tsaus ntuj; kuv raug muab xyeeb povtseg ib yaam le tug kooj.

²⁴Kuv ob lub hauvcaug tsaug tsi muaj zug, vim tsi tau mov noj; kuv ntxaug heev tshuav tawv qhwv pobtxhaa lawm xwb.

²⁵Thaus luas pum kuv, luas luag kuv plig hab thuam kuv cu hau nyo.

²⁶Tug TSWV kws yog kuv tug Vaajtswv, thov koj paab kuv; vim koj yog tug muaj txujkev hlub kws tsi paub kawg, thov cawm kuv lauj!

²⁷Thov ua rua kuv cov yeebncuab paub has tas yog koj txhais teg cawm kuv dlim.

²⁸Txawm yog puab foom phem rua kuv los koj yuav foom koob moov rua kuv. Thov kuas cov tuabneeg kws tsimtxom kuv swb hlo moog, hab thov ca kuv kws yog koj tug tubkhai zoo sab.

²⁹Thov kuas kuv cov yeebncuab raug txaajmuag; thov kuas tej kev txaajmuag looj nkaus puab ib yaam le naav tsoog tsho.

³⁰Kuv yuav tsaa suab ua tug TSWV tsaug; kuv yuav qhuas nwg taabmeeg ib tsoom tuabneeg suavdlawg kws tuaj txoos ua ke,

³¹rua qhov nwg tuaj tug tuabneeg pluag tog, hab cawm tug pluag dlim ntawm cov tuabneeg kws rau txim rua nwg.