Read Hmong Njua Phoo Ntawv Nkauj 115 Bible Online

Phoo Ntawv Nkauj 115 - Hmong Njua bible

Phoo Ntawv Nkauj 115

¹Tug TSWV, koj tuab leeg, koj tuab leeg xwb txhaj yog tug tau koob meej! Peb tsi tsimnyog tau, rua qhov koj yog tug ncaaj nceeg hab muaj txujkev hlub kws tsi paub kawg.

²Vim le caag lwm tsaav tuabneeg yuav nug peb has tas “Mej tug Vaajtswv nyob qhov twg?”

³Peb tug Vaajtswv nyob sau ntuj; nwg ua txhua yaam lawv le nwg xaav ua.

⁴Puab tej mlom yog muab nyaj hab kub nchuav, tej ntawd puavleej yog tuabneeg txhais teg ua xwb.

⁵Tej mlom ntawd muaj qhovncauj, tabsis has tsi tau lug, muaj qhovmuag tabsis tsi pum kev.

⁶muaj qhovntsej, tabsis tsi nov lug, muaj qhovntswg, tabsis tsi nov ntxhab.

⁷Muaj teg, tabsis tsi txawj kov dlaabtsi, muaj kutaw, tabsis tsi txawj rhais ruam. Tej mlom ntawd ua tsi tau suab nrov huv qaa tuaj.

⁸Cov tuabneeg kws nchuav mlom hab ca sab rua tej mlom ntawd, puab zoo le tej mlom kws puab nchuav ntawd ntaag.

⁹Cov Yixalayees, mej ca le tso sab rua tug TSWV. nwg yog tug paab mej hab tiv thaiv mej.

¹⁰Vaajtswv cov povthawj, mej ca le tso sab rua tug TSWV; nwg yog tug paab mej hab nwg tiv thaiv mej.

¹¹txhua tug kws pehawm tug TSWV, mej ca le tso sab rua tug TSWV; nwg yog tug paab mej hab tiv thaiv mej.

¹²Tug TSWV ncu ntsoov peb hab yuav foom koob moov rua peb; tug TSWV yuav foom koob moov rua cov Yixalayees, hab rua Vaajtswv cov povthawj txhua tug.

¹³Nwg yuav foom koob moov rua txhua tug kws fwm nwg, tsi has tug hlub tug yau huv tuabsi.

¹⁴Thov tug TSWV pub kuas mej hab mej cov tubki muaj xeebntxwv coob!

¹⁵Thov tug TSWV kws tsim lub ntuj hab lub nplajteb foom koob moov rua mej!

¹⁶Lub ntuj yog Vaajtswv tuab leeg le, tabsis nwg muab lub nplajteb pub rua tuabneeg nyob.

¹⁷Tug kws tuag hab moog nyob huv lub chaw kws ntsag tu lawm yeej tsi txawj qhuas tug TSWV.

¹⁸Tabsis peb cov kws muaj sa nyob, peb yuav ua nwg tsaug, nwgnuav hab moog ibtxhis le. Ca le qhuas tug TSWV!