Read Hmong Njua Phoo Ntawv Nkauj 140 Bible Online

Phoo Ntawv Nkauj 140 - Hmong Njua bible

Phoo Ntawv Nkauj 140

¹Tug TSWV, thov koj paab kuv kuas dlim ntawm cov tuabneeg sab phem; thov cawm kuas kuv dlim ntawm cov tuabneeg limham.

²Puab lub sab pheej xaav ntsoov ua phem nkaus xwb, hab naj nub dlu kuas muaj kev sis caav sis tshe.

³Puab tug nplaig muaj taug ib yaam le taug naab; hab puab tej lug muaj taug ib yaam le taug naab raaj kubsai.

⁴Tug TSWV, thov koj tiv thaiv kuv kuas dlim ntawm cov tuabneeg sab phem lub fwjchim; thov cawm kuas kuv dlim ntawm cov tuabneeg kws xaav txuv kuv txujsa.

⁵Cov tuabneeg khaavtheeb cuab muv tog kuv kev; puab cuab vaag hab cuab muv lawv ntug kev kuas maag kuv.

⁶Kuv has rua tug TSWV tas, “Koj yog kuv tug Vaajtswv.” Tug TSWV, thov koj noog tej lug kws kuv thov koj paab kuv!

⁷Tug TSWV, kuv tug TSWV, tug tiv thaiv kuv kws muaj zug heev, koj tub cawm kuv dlim kuv tshaav rog lug lawm.

⁸Tug TSWV, thov koj tsi xob pub rua cov tuabneeg sab phem lawv le puab thov; thov tsi xob pub kuas puab tej kev ntxeev sab ntawm tav.

⁹Thov koj tsi xob pub kuv cov yeebncuab kovyeej kuv; thov kuas tej lug phem kws puab has rov lug raug puab.

¹⁰Thov kuas cov ncaig tawg kws cig lab ploog poob lug rua sau puab taubhau; thov muab puab pov rua huv qhov tsaus ntuj kuas puab tawm tsi tau lug le.

¹¹Thov kuas cov tuabneeg kws kom luas tsi tseeb tsi xob yeej; thov kuas txujkev phem lug raug cov tuabneeg limham hab ua rua puab raug kev puamtsuaj;

¹²Tug TSWV, kuv paub has tas koj yeej tuaj cov tuabneeg pluag tog hab txav txim ncaaj rua cov tuabneeg kws txomnyem.

¹³Cov tuabneeg ncaaj nceeg yuav tuav koj lub npe ua koj tsaug; puab yuav nyob ntawm koj lub xubndlag moog ibtxhis.