Read Hmong Njua Phoo Ntawv Nkauj 143 Bible Online

Phoo Ntawv Nkauj 143 - Hmong Njua bible

Phoo Ntawv Nkauj 143

¹Tug TSWV, thov koj noog kuv tej lug thov! Koj yog tug kws ncaaj nceeg, thov koj noog kuv tej lug thov; koj yog tug muaj lub sab ncaaj, thov koj teb kuv tej lug!

²Thov tsi xob coj kuv kws yog koj tug tubkhai moog txav txim; rua qhov yeej tsi muaj ib tug tuabneeg ncaaj nceeg taabmeeg koj le.

³Kuv tug yeebncuab caum kuv tua, hab kuv swb nwg lawm; nwg coj kuv moog kaw rua huv lub tsev lojcuj kws tsaus ntuj nti, hab kuv zoo le cov tuabneeg kws tub tuag tau ntev lug lawm.

⁴Kuv kawg tswvyim, hab kuv taag kev ca sab lawm.

⁵Kuv xaav txug lub naj lub xyoo kws dlhau lawm; kuv xaav txug txhua yaam kws koj tau ua taag lug; kuv xaav txug tej kws koj ua ntawd.

⁶Kuv tsaa kuv ob txhais teg thov koj; kuv lub sab qhuav qhawv ib yaam le cov aav, kuv tshaib nqhes koj txujlug ib yaam le nqhes dlej.

⁷Tug TSWV, thov koj teb kuv tej lug thov taamsim nuav! Kuv taag kev ca sab lawm. Thov koj tsi xob tsiv nkaum kuv, nyob tsaam kuv moog nyob xyaw cov tuabneeg kws moog nyob huv tubtuag teb lawm.

⁸Thov koj naj taagkig qha koj txujkev hlub kws tsi paub kawg rua kuv, rua qhov kuv ca sab ntsoov rua koj xwb. Thov koj qha saib tsimnyog kuv taug txujkev twg, rua qhov kuv tau thov koj lawm.

⁹Tug TSWV, kuv lug cuag koj, thov koj tiv thaiv kuv; thov koj cawm kuv kuas dlim ntawm kuv cov yeebncuab.

¹⁰Koj yog kuv tug Vaajtswv; thov koj qha kuas kuv paub ua lawv le koj lub sab nyam. Thov koj ua sab dlawb sab zoo rua kuv hab coj kuv taug txujkev kws tso sab lug.

¹¹Tug TSWV, thov koj cawm kuv kuas dlim lawv le koj tau coglug tseg lawm! Koj yog tug muaj lub sab dlawb sab zoo, thov koj paab kuas kuv dlim tej kev nyuaj sab!

¹²Vim koj hlub kuv heev, thov koj tua kuv cov yeebncuab povtseg hab muab cov tuabneeg kws tsimtxom kuv ua kuas puamtsuaj, rua qhov kuv yog koj tug tubkhai.