Read Hmong Njua Phoo Ntawv Nkauj 145 Bible Online

Phoo Ntawv Nkauj 145 - Hmong Njua bible

Phoo Ntawv Nkauj 145

¹Kuv tug Vaajtswv hab kuv tug vaajntxwv, kuv yuav pav koj lub fwjchim rua suavdlawg; hab kuv yuav ua koj tsaug moog ibtxhis tsi kawg le.

²Kuv yuav naj nub ua koj tsaug, hab yuav qhuas koj moog ibtxhis tsi kawg le;

³Tug TSWV yog tug kws muaj fwjchim luj hab tsimnyog suavdlawg qhuas nwg kawg le; nwg lub fwjchim luj dlua tej kws peb lub sab xaav.

⁴Txhua tam tuabneeg yuav qhuas tej txujci luj kws koj ua taag lug; puab yuav pav koj teg num tseemceeb kawg nkaus rua suavdlawg paub.

⁵Tuabneeg yuav pav koj tug tshwjchim hab koj lub koob meej, hab kuv yuav xaav ntsoov txug koj tej txujci tseemceeb kws koj tau ua taag lug.

⁶Tuabneeg yuav pav tej num tseemceeb kws koj ua, hab kuv yuav pav koj lub fwjchim luj rua suavdlawg.

⁷Puab yuav qha txug ib puas tsaav yaam zoo kws koj ua, hab hu nkauj qhuas koj txujkev hlub.

⁸Tug TSWV yog tug muaj kev hlub hab taabncuab, nwg tsi chim sai hab nwg muaj txujkev hlub kws tsi paub kawg.

⁹Nwg ua zoo rua txhua tug, hab nwg hlub ib puas tsaav yaam kws nwg tsim.

¹⁰Tug TSWV, ib puas tsaav yaam kws koj tsim yuav qhuas koj, hab koj tsaav tuabneeg yuav ua koj tsaug.

¹¹Puab yuav pav txug koj tug tshwjchim kws ci ntsaa ab huv koj lub tebchaws; hab qha rua suavdlawg paub txug koj tug zug luj zug nchaav,

¹²kuas txhua tug paub txug koj tej num tseemceeb, hab koj tug tshwjchim kws ci ntsaa ab huv koj lub tebchaws.

¹³Koj lub tebchaws yuav nyob moog ibtxhis, hab koj yuav ua vaajntxwv kaav moog ibtxhis tsi kawg le. Tug TSWV yeej ua lawv nraim le nwg tej lug cog tseg, hab nwg yeej hlub txhua yaam kws nwg tsim tseg lawm.

¹⁴Nwg paab txhua tug kws raug kev txomnyem; hab tsaa txhua tug kws qaug lawm sawv.

¹⁵Ib puas tsaav yaam kws muaj sa puavleej ca sab ntsoov rua koj, hab koj pub puab muaj noj muaj haus lawv le puab sab xaav.

¹⁶Koj pub puab muaj txaus nkaus hab txaus rua tej kws puab muaj.

¹⁷Ib puas tsaav yaam kws tug TSWV ua puavleej ncaaj nceeg, nwg muaj lub sab dlawb sab zoo ua nwg teg num.

¹⁸Nwg nyob ze txhua tug kws thov nwg hab txhua tug kws muab sab npuab nwg.

¹⁹Nwg pub rua txhua tug kws fwm nwg lawv le tej kws puab xaav yuav, nwg nov puab tej suab thov hab cawm puab dlim.

²⁰Tug TSWV tiv thaiv txhua tug kws hlub nwg, tabsis nwg yuav ua kuas cov tuabneeg sab phem raug kev puamtsuaj.

²¹Kuv yuav naj nub qhuas tug TSWV; ib puas tsaav yaam kws nwg tsim tseg ca le qhuas nwg lub npe kws dlawbhuv moog ibtxhis.