Read Hmong Njua Phoo Ntawv Nkauj 147 Bible Online

Phoo Ntawv Nkauj 147 - Hmong Njua bible

Phoo Ntawv Nkauj 147

¹Ca le qhuas tug TSWV! qhov kws hu nkauj qhuas peb tug Vaajtswv yog ib qhov kws zoo heev; tsimnyog suavdlawg txaus sab hab qhuas nwg kawg le.

²Tug TSWV yog tug kws txhim khu lub nroog Yeluxalees; nwg coj cov tuabneeg kws raug luas nteg moog lawm rov qaab lug.

³Nwg khu cov tuabneeg kws sab ntsws puag taag hab qhwv puab tej qhov txhaab.

⁴Nwg yeej kom tseg saib pub muaj pistsawg lub nubqub, hab nwg tis npe rua txhua lub nubqub nyag muaj nyag npe.

⁵Peb tug TSWV yog tug kws muaj fwjchim hab muaj zug luj zug nchaav; tsi muaj leejtwg yuav totaub txug nwg lub tswvyim.

⁶Nwg txhawb tug kws txu fwjchim, tabsis nwg tsuj tug kws ua phem ua qas rua huv aav.

⁷Ca le hu nkauj qhuas tug TSWV; ca le ntaus nkauj nogncaas qhuas Vaajtswv.

⁸Nwg ua kuas muaj fuab nyob sau nruab ntug; nwg tso naag lug ywg lub nplajteb hab ua kuas nroj tsuag tuaj sau tej pov roob.

⁹Nwg pub kuas tej tsaj muaj noj muaj haus hab pub kuas tej mivnyuas uab laag tau noj thaus puab quaj.

¹⁰Tsi yog nwg txaus sab rua cov neeg kws muaj zug, hab tsi yog nwg txaus sab rua cov tubrog kws muaj sab tawv;

¹¹tabsis nwg txaus sab rua cov tuabneeg kws fwm nwg, hab cov tuabneeg kws ca sab rua nwg txujkev hlub kws tsi paub kawg.

¹²Yeluxalees, ca le qhuas tug TSWV! Xi-oos, ca le qhuas koj tug Vaajtswv!

¹³Nwg tsomkwm koj tej roojvaag nyob ruaj khov kho; nwg foom koob moov rua koj tsaav tuabneeg.

¹⁴Nwg tsomkwm tsi pub kuas luas tuaj txeeb koj nrim dlej nrim aav, hab nwg pub kuas koj ua tau qoobloo ntau.

¹⁵Nwg has rua lub nplajteb, hab tej lug kws nwg has ua rua txhua yaam tav.

¹⁶Nwg tso dlaus lug puv toj roob hauv peg dlawb paug ib yaam le plaub yaaj hab muaj te khov dlawb paug rua txhua qhov ib yaam le moov tshauv.

¹⁷Nwg tso lawg lug ib yaam le tej pobzeb; yeej tsi muaj leejtwg tiv taug qhov no kws nwg tso lug ntawd le!

¹⁸Nwg has lug xwb tej dlej nkoog ca le yaaj taag; nwg tso cua ntsawj tuaj, ces tej dlej ca le ndlwg lawm.

¹⁹Nwg qha nwg txujlug rua Yakhauj, nwg pav nwg tej lug saamfwm hab tej kevcai rua cov Yixalayees.

²⁰Nwg tsi tau qha tej ntawd rua lwm tsaav tuabneeg le; rua qhov lwm tsaav tuabneeg tsi paub nwg tej kevcai. Ca le qhuas tug TSWV.