Read Hmong Njua Phoo Ntawv Nkauj 30 Bible Online

Phoo Ntawv Nkauj 30 - Hmong Njua bible

Phoo Ntawv Nkauj 30

¹Tug TSWV, kuv ua koj tsaug, rua qhov koj yog tug cawm kuv dlim, hab koj tsi pub kuv cov yeebncuab nyos tau kuv.

²Tug TSWV, kuv tug Vaajtswv, kuv quaj thov koj paab kuv, hab koj tau khu kuv zoo hlo,

³koj tau coj kuv tawm huv txujkev tuag lug; kuv tub taug txujkev moog rua huv lub qhov kws tub heev, tabsis koj pub kuv rov tau txujsa tshab.

⁴Taagnrho nwg tsaav tuabneeg kws ncaaj nceeg, ca le hu nkauj qhuas tug TSWV! Mej ncu ntsoov nwg lub npe kws yog tug Dlawbhuv hab ua nwg tsaug moog le.

⁵Nwg txujkev chim tsuas nyob ib plag xwb, nwg txujkev ua zoo nyob moog tsi paub kawg le. Thaus tsaus ntuj muaj kev quaj ntsuag, tabsis thaus kaaj ntug muaj kev zoo sab.

⁶Thaus kuv tau zoo nyob kaaj sab kuv xaav has tas, “Kuv yuav tsi swb luas ib zag le.”

⁷Tug TSWV, koj ua zoo kawg nkaus rua kuv, koj tsomkwm kuv ib yaam le lub roob kws ruaj khov. Tabsis thaus koj tsiv nkaum kuv lawm, ua rua kuv ntshai kawg le.

⁸Tug TSWV, kuv tsaa ncauj hu koj, kuv thov koj paab kuv le nuav:

⁹“Yog kuv tuag lawm puas yuav muaj nqes rua koj? Yog kuv moog rua huv qhov tuag lawm yuav muaj nqes rua koj los? Cov tuabneeg tuag puas qhuas tau koj lawm? Puab puas moog qha tau koj txujkev zoo kws tsi txawj puamtsuaj le?

¹⁰Tug TSWV, thov noog kuv lub suab hu hab taabncuab kuv! Tug TSWV, thov paab kuv!”

¹¹Koj muab kuv txujkev nyuaj sab hloov ua kev zoo sab dlha seev cev, koj muab kuv tej kev tu sab tshem moog povtseg huv tuabsi lawm, hab koj pub kev zoo sab lug nyob puagncig kuv.

¹²Yog le ntawd, kuv txhaj tsi nyob ntsag tu, kuv yuav hu nkauj qhuas koj. Tug TSWV, koj yog kuv tug Vaajtswv, kuv yuav ua koj tsaug moog ibtxhis tsi kawg.