Read Hmong Njua Phoo Ntawv Nkauj 6 Bible Online

Phoo Ntawv Nkauj 6 - Hmong Njua bible

Phoo Ntawv Nkauj 6

¹Tug TSWV, thov koj tsi xob chim hab tsi xob tshev kuv! Tsi xob chim hab rau txim rua kuv.

²Tug TSWV, thov koj hlub kuv, rua qhov kuv taabtom raug kev puamtsuaj! Thov txhawb kuv tug zug; vim kuv tug zug ntaug taag lawm,

³taagnrho kuv lub cev raug txomnyem, ua rua kuv lwj sab kawg le. Tug TSWV, koj yuav tog ntev le caag koj maam le paab kuv?

⁴Tug TSWV, koj ca le lug cawm kuas kuv dlim; koj txujkev hlub kws ruaj khov, txhaj yuav cawm tau kuv dlim ntawm txujkev tuag xwb.

⁵Nyob huv tubtuag teb tsi muaj leejtwg ua koj tsaug le; hab puab tsi ncu qaab koj lawm.

⁶Kuv qaug zug vim txujkev tu sab; kuv quaj txhua mo, ua rua kuv lub txaaj ntub kua muag taag, hab kuv lub hauv ncoo tsau rawv kuv tej kua muag.

⁷Kuv rua tsi tau qhovmuag vim kuv txujkev tu sab, kuv quaj qhovmuag o taag vim kuv cov yeebncuab.

⁸Mej cov kws yog tuabneeg ua phem ca le txaav kuas dleb ntawm kuv moog. Rua qhov tug TSWV tub nov kuv tej lug thov lawm;

⁹Nwg noog kuv lub suab quaj thov nwg paab hab nwg yuav teb kuv tej lug thov.

¹⁰Kuv cov yeebncuab yuav paub txug txujkev swb kws txaaj muag ntsuav; ces tuab plag ntshis xwb puab yuav raug lawv tsiv rov qaab.