Read Hmong Njua Phoo Ntawv Nkauj 78 Bible Online

Phoo Ntawv Nkauj 78 - Hmong Njua bible

Phoo Ntawv Nkauj 78

¹Kuv tsaav tuabneeg, mej ca le noog kuv tej lug qha, hab ua tuab zoo noog tej lug kws kuv has.

²Kuv yuav siv tej lug txawj lug ntse has hab ua tuab zoo qha tej kws yaav taag lug tsi muaj tuabneeg paub.

³Tej ntawd yog yaam kws peb tau nov hab paub, yog tej kws peb cov yawmkoob tau qha rua peb lawm.

⁴Peb yuav tsi muab tej ntawd zais tsi qha rua peb tej mivnyuas; peb yuav qha tug TSWV lub fwjchim hab nwg teg num kws tseemceeb ib tam rua ib tam, hab qha has txug tej txujci luj kws nwg tau ua taag lug lawm.

⁵Vaajtswv muab kevcai cob rua cov Yixalayees, hab muab Kaum Nqai Kevcai cob rua Yakhauj cov xeebntxwv. Nwg saamfwm kuas peb cov yawmkoob muab nwg tej Kevcai qha rua puab cov mivnyuas,

⁶kuas tej xeebntxwv yaav tom ntej txhaj tau tej ntawd lug rua puab kawm, hab muab qha rua puab cov mivnyuas moog ntxiv.

⁷Ua le nuav puab txhaj yuav ca sab rua Vaajtswv, ncu ntsoov tej num kws nwg tau ua lug lawm, hab naj nub coj lawv le Vaajtswv tej lug saamfwm.

⁸Puab yuavtsum tsi xob coj lawv le puab cov yawmkoob kws yog tuabneeg ntxeev sab hab tsi noog lug, puab txujkev ca sab rua Vaajtswv tsi ruaj tsi khov hab puab tsi muab sab npuab Vaajtswv.

⁹Cov Efalayees tub muaj neevnti hab muaj xub vug los tseem ca le tsiv huv tshaav rog moog lawm hab.

¹⁰Puab tsi ceev Vaajtswv tej lug cog tseg; puab tsi fwm hab ua lawv le Vaajtswv txuj kevcai.

¹¹Puab tsi ncu qaab txhua yaam kws Vaajtswv tau ua, hab tej txujci tseemceeb kws nwg ua rua puab pum lawm.

¹²Vaajtswv ua tej txujci ntawd rua puab cov yawmkoob pum, thaus puab taug kev lug txug ntawm lub taj Xau-as huv tebchaws Iziv.

¹³Vaajtswv ua rua dlej havtxwv faib hlo rua ob saab hab coj puab moog dlhau plawg rua saab tim u; Vaajtswv ua rua dlej sawv tseeg zoo le tej phaab ntsaa.

¹⁴Thaus nruab nub nwg ua ib tauv fuab roog puab hab mo ntuj nwg ua ib tug nplaim tawg cig rua puab pum kev.

¹⁵Nyob ntawm taj suabpuam nwg ua rua phaab pobzeb tawg txua hab muaj dlej txhawv huv qhov kws tub heev lug rua puab haus.

¹⁶Nwg ua rua dlej txhawv huv qhov pobzeb tuaj, hab ndlwg ib yaam le tug dlej.

¹⁷Tabsis puab pheej ua txhum rua Vaajtswv tsi tseg le, hab thaus nyob ntawm taj suabpuam puab tau ntxeev sab rua tug kws muaj fwjchim luj kawg nkaus.

¹⁸Puab txhobtxwm sim Vaajtswv sab sab hab thov kuas Vaajtswv tso mov lug rua puab.

¹⁹Puab has lug twm Vaajtswv has tas, “Vaajtswv puas muaj cuabkaav muab tau mov rua peb noj nyob ntawm taj suabpuam nuav?

²⁰Yeej muaj tseeb, Vaajtswv ntaus pobzeb tawg txua dlej txhawv ndlwg laub lug lug; tabsis nwg puas muaj cuabkaav muab tau mov hab nqaj rua peb noj?”

²¹Thaus tug TSWV nov puab has le ntawd, nwg chim heev rua puab; nwg txhaj ua kuas muaj nplaim tawg tuaj kub nwg tsaav tuabneeg, hab nwg txujkev chim tau tawmtsaam puab,

²²rua qhov puab tsi ntseeg Vaajtswv hab tsi ntseeg has tas nwg muaj peevxwm cawm tau puab dlim le.

²³Tabsis nwg has rua lub ntuj kws nyob sau hab saamfwm kuas rooj ntug qheb;

²⁴Nwg tso mov sau ntuj lug rua puab, yog tso manas sau ntuj lug rua puab noj.

²⁵Yog le ntawd, puab txhaj tau noj cov timtswv ceebtsheej tej mov, hab Vaajtswv muab txhua yaam kws puab xaav tau rua puab.

²⁶Vaajtswv tseem ua kuas cov cua saab nubtuaj ntsawj tuaj, hab nwg siv nwg lub fwjchim ua rua kuas cov cua saab qaabteb ntsawj tuaj;

²⁷hab nwg tso noog lug rua nwg tsaav tuabneeg noj, cov noog ntawd ntau ib yaam le tej xuabzeb ntawm ntug havtxwv;

²⁸cov noog ntawd lug puv nkaus rua huv lub plawv yeej hab puagncig tej tsevntaub kws puab nyob.

²⁹Yog le ntawd, cov Yixalayees txhaj muaj nqaj noj txaus puab sab; Vaajtswv tau muab txhua yaam kws puab xaav tau rua puab.

³⁰Txawm yog puab tseem npuav rawv mov huv qhovncauj los puab tseem pheej tsi txaus sab le,

³¹thaus ntawd Vaajtswv chim kawg rua puab, Vaajtswv txhaj tua puab cov tuabneeg kws muaj zug heev hab cov Yixalayees tej tub hluas kws zoo heev povtseg.

³²Txawm yog tub muaj tej nuav los puab tseem ua txhum quas qeeg; txawm yog nwg ua ntau yaam txujci rua puab pum los puab yeej tsi ntseeg nwg le.

³³Yog le ntawd, Vaajtswv txhaj ua rua puab txujsa yaaj ntshis moog ib yaam le ua paa hab tuab ntsais muag xwb, puab lub neej raug kev puamtsuaj taag.

³⁴Thaus Vaajtswv tua puab ibtxha lawm, cov kws seem rov lug cuag nwg, puab txhaj thov Vaajtswv hab hloov dlua sab tshab.

³⁵Puab rov ncu txug has tas, Vaajtswv txhaj yog tug kws tiv thaiv puab, hab tug muaj fwjchim luj kawg nkaus yog tug kws tau lug paab puab.

³⁶Tabsis tej lug kws puab has ntawd yog lug dlaag xwb; tsi muaj ib lus kws yog lug tseeb le.

³⁷Puab tsi muab sab npuab Vaajtswv; puab tsi ua sab ncaaj rua Vaajtswv tej lug kws cog tseg rua puab.

³⁸Tabsis Vaajtswv tseem hlub hab taabncuab nwg tsaav tuabneeg. Nwg zaam puab tej kev txhum hab tsi ua kuas puab puamtsuaj. Muaj ntau zag Vaajtswv tau thim nwg txujkev chim hab cheem nwg txujkev npautawg.

³⁹Vaajtswv yeej ncu txug has tas, puab yog tuabneeg xwb, puab zoo ib yaam le nthwv cua kws ntsawj lug hab tub dlhau moog lawm.

⁴⁰Nyob ntawm taj suabpuam, puab pheej ntxeev sab rua Vaajtswv hab puab tau ua rua Vaajtswv tu sab heev.

⁴¹Puab pheej sim Vaajtswv sab ib zag taag ib zag tuaj; hab ua rua cov Yixalayees tug Vaajtswv kws Dlawbhuv chim kawg le.

⁴²Puab tsi ncu qaab Vaajtswv lub fwjchim kws luj hab nub kws nwg cawm puab dlim ntawm puab cov yeebncuab txhais teg,

⁴³hab siv nwg lub fwjchim luj ua tej txujci tseemceeb rua puab pum ntawm lub taj nraag Xau-as huv tebchaws Iziv.

⁴⁴Vaajtswv muab tej dlej hloov ua ntshaav, hab ua rua cov tuabneeg Iziv tsi tau dlej haus le.

⁴⁵Nwg tso yoov yaa lug puv nkaus txhua qhov tsimtxom cov Iziv hab tso qaav lug ua rua puab lub tebchaws puamtsuaj.

⁴⁶Hab tso kooj txomfaav lug noj puab tej qoobloo huv puab tej laj teb puamtsuaj taag.

⁴⁷Nwg tseem tso lawg lug ntaus puab tej txiv maab hab tso te lug tua puab tej ntoo txiv ncuav pas tuag taag.

⁴⁸Nwg tso lawg lug ntaus puab tej nyuj, hab tso tsaglig xub laim tua puab tej yaaj tej tshis tuag taag huv tuabsi.

⁴⁹Nwg tso nwg txujkev chim kws nruj tsiv lug rua puab, ua rua puab ntxhuv sab kawg le, qhov ntawd yog nwg tso ib paab timtswv ceebtsheej coj txujkev tuag lug rua puab.

⁵⁰Vaajtswv yeej tsi cheem nwg txujkev chim lossis tsi txuag puab sav le, tabsis nwg tso kaab mob aws lug tua puab tuag coob heev.

⁵¹Nwg tua cov Iziv txhua yim tug tub hlub tuag taag.

⁵²Ces nwg coj nwg tsaav tuabneeg tawm lug ib yaam le tug tub yug yaaj, hab coj puab kev lug hlaa taj suabpuam.

⁵³Nwg coj puab lug kaaj sab lug, hab tsi ntshai dlaabtsi le; tabsis dlej havtxwv nphau nphwv lug npug puab tej yeebncuab.

⁵⁴Nwg coj puab lug rua huv nwg lub tebchaws dlawbhuv, hab lug nyob sau tej roob kws nwg tua yeej lawm.

⁵⁵Nwg muab lwm tsaav tuabneeg ntab tawm tsiv thaus nwg coj nwg tsaav tuabneeg lug nyob; nwg muab lub tebchaws ntawd faib rua txhua xeem Yixalayees hab muab puab tej vaaj tej tsev rua nwg tsaav tuabneeg nyob.

⁵⁶Tabsis puab tseem ntxeev sab tawmtsaam tug Vaajtswv kws muaj Fwjchim Luj kawg nkaus hab puab pheej sim nwg sab. Puab tsi noog Vaajtswv tej lug saamfwm le.

⁵⁷Puab ntxeev sab hab tsi muab sab npuab Vaajtswv ib yaam le puab cov yawmkoob, puab zoo ib yaam le xibxub nkhaus kws siv tsi tau lawm.

⁵⁸Puab ua rua Vaajtswv chim kawg, vim puab tej chaw teev dlaab, hab puab ua rua Vaajtswv npautawg heev vim puab pe mlom.

⁵⁹Vaajtswv chim heev thaus nwg pum tej mlom ntawd, yog le ntawd, nwg txhaj tso nwg tsaav tuabneeg tseg tsi quavntsej puab lawm.

⁶⁰Vaajtswv muab nwg lub tsevntaub huv Silaus yog lub tsev kws nwg nrug peb nyob ntawd tso tseg lawm hab.

⁶¹Nwg ca peb cov yeebncuab tuaj txeeb tau lub Phijxaab kws ntim Vaajtswv tej lug cog tseg, yog lub cim ntawm Vaajtswv lub fwjchim hab tug tshwjchim kws ci ntsaa ab.

⁶²Nwg chim heev rua nwg tsaav tuabneeg, nwg txhaj ca puab cov yeebncuab tuaj tua puab.

⁶³Puab cov tub hluas tuag taag rua huv tshaav rog, tsi muaj leejtwg yuav puab tej ntxhais le.

⁶⁴Cov povthawj los raug luas tua tuag taag, hab luas tsi pub puab cov quaspuj quaj nyav le.

⁶⁵Thaus kawg tug TSWV txhaj sawv tseeg, ib yaam le tug kws tsim nruab dlaab ndlub, nwg zoo ib yaam le tug txivneej kws haus cawv ua rua nwg muaj zug.

⁶⁶Nwg ua rua nwg cov yeebncuab swb kag hab thim plhawv rov qaab poob ntsejmuag moog ibtxhis le lawm.

⁶⁷Tabsis nwg tsi leeg paub Yauxej cov xeebntxwv. Vaajtswv tsi xaiv xeem Efalayees.

⁶⁸Tabsis Vaajtswv xaiv xeem Yudas hab lub Roob Xi-oos kws nwg hlub tshaaj plawg.

⁶⁹Nwg tsim nwg lub Tuamtsev zoo le nwg lub tsev kws nyob sau ntuj; nwg ua lub tsev ntawd ruaj ib yaam le lub nplajteb kws nyob ruaj khov moog ibtxhis.

⁷⁰Nwg xaiv Daviv kws yog nwg tug tubkhai; nwg coj Daviv tawm huv tshaav zaub

⁷¹qhov chaw kws Daviv zuv Daviv paab yaaj lug, hab muab Daviv tsaa ua vaajntxwv kaav cov Yixalayees, Daviv yog tug tub yug yaaj kws saib Vaajtswv tsaav tuabneeg.

⁷²Daviv muaj lub sab dlawb paug saib puab, hab nwg muaj tswvyim zoo coj puab.