Read Hmong Njua Phoo Ntawv Nkauj 92 Bible Online

Phoo Ntawv Nkauj 92 - Hmong Njua bible

Phoo Ntawv Nkauj 92

¹Tug TSWV, kuv ua koj tsaug hab hu nkauj qhuas koj kws yog Vaajtswv tug muaj Fwjchim Luj kawg nkaus,

²Naj taagkig qha koj txujkev hlub kws tsi paub kawg, hab naj mo qha koj txujkev ncaaj nceeg,

³nrug tej suab nkauj nogncaas hab tej suab raaj kws zoo heev.

⁴Tug TSWV, koj tej num kws tseemceeb ua rua kuv zoo sab heev; kuv hu nkauj zoo sab rua txhua yaam kws koj tau ua lug lawm.

⁵Tug TSWV, koj tej num tseemceeb kawg le! Koj txujkev xaav tub kawg nkaus!

⁶Qhov nuav ua rua tug tuabneeg ruag paub tsi txug; tug tuabneeg ruag tsi totaub tej ntawd le.

⁷Cov tuabneeg sab phem yuav luj hlub ib yaam le tej nroj tsuag, hab cov tuabneeg txhum yuav vaammeej, tabsis puab yuav raug kev puamtsuaj taag,

⁸rua qhov koj yog tug TSWV kws muaj fwjchim nyob moog ibtxhis.

⁹Peb paub has tas koj cov yeebncuab yuav tuag taag, hab cov tuabneeg sab phem yuav swb.

¹⁰Koj pub rua kuv muaj zug ib yaam le tug nyuj qus; koj foom koob moov rua kuv muaj kev zoo sab.

¹¹Kuv pum has tas kuv cov yeebncuab swb taag lawm, hab nov cov tuabneeg sab phem quaj ntshu nrooj.

¹²Cov tuabneeg ncaaj nceeg yuav luj hlub ib yaam le tej ntsuag txoob; hab puab yuav hlub zoo ib yaam le tej ntoo cab peg Lenpanoos.

¹³Puab zoo ib yaam le cov ntoo kws cog huv tug TSWV lub tsev kws tawg paaj ntsaa ab nyob huv peb tug Vaajtswv lub Tuamtsev,

¹⁴txawm yog cov ntoo tub laug lawm los tseem ntsuab, txi taug txiv hab khov heev.

¹⁵Qhov nuav qha has tas tug TSWV yeej ncaaj nceeg, tug kws tsomkwm kuv, nwg yeej tsi muaj ib qho txhum le.