Read Hmong Njua Paajlug 17 Bible Online

Paajlug 17 - Hmong Njua bible

Paajlug 17

¹Tsev tuabneeg kws noj mov qhuav tabsis muaj kev kaaj sab, zoo dlua le tsev tuabneeg kws muaj noj muaj haus nplua mag, tabsis muaj kev sis caav sis tshe.

²Tug tubkhai kws ntse yuav tau ua tug kaav tug tswv tug tub kws rhuav ntsejmuag, hab yuav tau txais tug tswv tej qubtxeeg qubteg ib yaam le tug tub.

³Nyaj hab kub yuav raug muab suavtawg sim, tabsis tug TSWV yuav sim tuabneeg lub sab.

⁴Cov tuabneeg ua phem yeej nyam lub tswvyim phem, hab tug tuabneeg dlaag yeej nyam noog tej lug dlaag.

⁵Koj saib tsi taug cov tuabneeg pluag, ces yog koj tuam mom Vaajtswv tug kws tsim puab. Yog koj luag tug kws raug kev txomnyem plig, koj yuav raug txim.

⁶Tej tuabneeg laug zoo sab heev rua puab tej xeebntxwv, ib yaam le tej mivnyuas zoo sab rua puab nam puab txiv.

⁷Cov tuabneeg muaj koob meej yeej tsi laam has tej lug dlaag ib zag, tabsis cov tuabneeg ruag laam tau laam has tej lug tsi tseemceeb.

⁸Muaj qee leej xaav has tas, tej nyaj kws luas muab tuaj xab zoo le lub povhum. Puab xaav has tas tej nyaj ntawd ua tau txhua yaam.

⁹Yog koj xaav kuas tuabneeg nyam koj, thaus puab ua txhum rua koj, koj yuavtsum zaam txim rua puab. Tug kws cim ntsoov luas tej kev txhum rua nruab sab yuav tu kev phoojywg.

¹⁰Tug tuabneeg txawj ntse raug luas tshev ib zag xwb, nwg ris sab hlo, tug tuabneeg ruag raug luas ntaus quas pua nplawm los nwg tsi hloov.

¹¹Kev tuag yuav raug cov tuabneeg sab phem kws pheej tsim kev kub ntxhuv ib yaam le tug tub ceevxwm kws tsi zaam rua leejtwg le.

¹²Koj moog ntsib tug maum dlais kws luas muab nwg cov mivnyuas lawm, zoo dlua le koj moog ntsib tug tuabneeg ruag kws rau sab ntso rua nwg teg num ruag kws tsi muaj qaabhau.

¹³Yog koj ua qhov phem pauj qhov zoo, mas kev phem yuav rov lug raug koj.

¹⁴Kev chiv sis caav sis tshe zoo le lub paag dlej tauv kws chiv paim. Ca le cheem tsi xob pub kuas nthuav luj tuaj.

¹⁵Rau txim rua tug tuabneeg kws tsi muaj txim txhum hab tso tug tuabneeg kws muaj txim, yog ob yaam kws tug TSWV ntxub.

¹⁶Muab nyaj rua tug tuabneeg ruag moog kawm ntawv ces yeej tsi muaj qaabhau dlaabtsi le, rua qhov nwg tub tsi muaj tswvyim le.

¹⁷Tej phoojywg tub txawj sis hlub txhua lub sijhawm. Yog kwvtij tsi paub sis paab thaus muaj kev txomnyem, yuav zoo dlaabtsi?

¹⁸Tsuas yog tug tuabneeg kws tsi muaj tswvyim txhaj leeg them lwm tug tej nuj nqes xwb.

¹⁹Tug kws nyam kev txhum yeej nyam tsim teebmeem. Yog koj pheej khaavtheeb, ces yog koj nrhav teebmeem ntaag.

²⁰Tug kws muaj lub sab xaav phem hab has lug tsi zoo; yeej tsi muaj ib yaam zoo rua nwg lub neej, tsuas yog tau kev puamtsuaj xwb.

²¹Leej txiv kws muaj tug tub ruag, tsi muaj kev ca sab dlaabtsi le, tsuas muaj kev nyuaj sab hab tu sab xwb.

²²Kev zoo sab ua hauv tshuaj kuab muaj tsuas rua koj lub cev. Kev ntxhuv sab ua rua koj lub neej tsaus ntuj nti.

²³Cov tu plaub ntug kws sab phem yuav luas tej nyaj xab, txhaj txav txim tsi ncaaj.

²⁴Tug tuabneeg txawj ntse muaj lub homphaj ua num. Tabsis tug tuabneeg ruag tsi paub pib qhov twg tuaj.

²⁵Tug tub ruag ua rua nwg txiv tu sab hab ua rua nwg nam nyuaj sab kawg le.

²⁶Tsi muaj cai nplua tug tuabneeg tsi muaj txhum. Rau txim rua cov tuabneeg zoo yog ua tsi ncaaj nceeg.

²⁷Tug tuabneeg kws thoob tsib to nrog tsi ntau ncauj, hab tug tuabneeg kws ua sab ntev yog tug txawj ntse.

²⁸Txawm yog tug tuabneeg ruag los yog nwg nyob tuabywv, ces luas xaav tas nwg ntse. Nwg tsi has lug luas suav has tas nwg yog tug muaj tswvyim.