Read Hmong Njua Tej Lug Qha 7 Bible Online

Tej Lug Qha 7 - Hmong Njua bible

Tej Lug Qha 7

¹Lub koob lub npe zoo, zoo dlua tej roj tsw qaab kws muaj nqes; hab nub tuag zoo dlua nub yug.

²Moog rua huv lub tsev kws muaj kev quaj ntsuag zoo dlua moog rua huv lub tsev kws muaj rooj noj rooj haus hab muaj kev lomzem. Cov kws tseem ua neej nyob yuavtsum ncu ntsoov has tas, txujkev tuag yeej tog rawv txhua tug.

³Kev quaj ntsuag zoo dlua kev luag ua tsuj ua tsaug. Qhov ntawd ua rua koj lub ntsejmuag mluag, tabsis yuav ua rua koj muaj kev txawj ntse.

⁴Tug kws xaav ntsoov rua txujkev tau zoo yog tuabneeg ruag. Tug kws xaav ntsoov rua txujkev tuag yog tuabneeg ntse.

⁵Koj noog tug tuabneeg txawj ntse tej lug ntuag, zoo dlua le noog tug tuabneeg ruag hu nkauj qhuas koj.

⁶Tug tuabneeg ruag lub suab luag zoo ib yaam le tej txaim tawg kws tawg huv qhovcub, nwg tsuas nrov qhuav xwb tsi muaj qaabhau le.

⁷Thaus tug tuabneeg ntse ua tsi ncaaj rua lwm tug, yog nwg ua le tug tuabneeg ruag ua. Yog koj yuav luas tej nyaj xab, ces yog koj rov ua rua koj poob ntsejmuag.

⁸Qhov kws xaus zoo dlua qhov kws chiv. Kev ua sab ntev zoo dlua kev khaavtheeb.

⁹Tsi xob npautawg sai. Tsuas yog cov tuabneeg ruag txhaj npautawg sai xwb.

¹⁰Tsi xob nug has tas, “Vim le caag yaav taag lug zoo dlua taamsim nuav?” Qhov kws nug le ntawd tsi yog lug ntse.

¹¹Txhua tug kws ua neej nyob yuavtsum muaj tswvyim, rua qhov tswvyim zoo ib yaam le koj tau txais qubtxeeg qubteg,

¹²hab lub tswvyim yuav tsomkwm koj ib yaam le tej nyaj txag. Yaam kws muaj nqes ntawm kev txawj ntse, yog lub tswvyim kws muaj peevxwm ua rua koj nyob kaaj sab lug.

¹³Ca le xaav txug tej kws Vaajtswv ua taag lug; leejtwg yuav muaj cuabkaav muab yaam kws Vaajtswv muab nkhaus lawm, ua kuas ncaaj?

¹⁴Thaus koj noj qaab nyob zoo, ca le zoo sab, hab thaus koj raug kev txomnyem, ces ncu ntsoov has tas kev noj qaab nyob zoo hab kev txomnyem puavleej yog lug ntawm Vaajtswv lug; koj tsi muaj cuabkaav paub has tas, yuav muaj dlaabtsi tshwmsim lug tom hauv ntej.

¹⁵Kuv pum txhua yaam nyob huv kuv lub neej kws tsi muaj qaabhau. Tug tuabneeg kws ua zoo yuav tuag moog, tabsis tug tuabneeg ua phem los nwg muaj sa nyob.

¹⁶Tsi xob ua tuabneeg ncaaj lossis ntse dlhau hwv. Vim le caag koj yuav ua rua koj puamtsuaj?

¹⁷Tabsis tsi xob ua tuabneeg phem lossis ruag dlhau hwv. Vim le caag koj tuag ua ntej lub sijhawm kws teem tseg rua koj?

¹⁸Koj yuavtsum zaam kuas dlhau ob yaam ntawd huv tuabsi. Yog koj ua lub neej fwm Vaajtswv, koj yeej yuav zaam dlhau ob yaam ntawd xwb.

¹⁹Tswvyim paab tau tug tuabneeg txawj ntse ua tau num zoo dlua kaum tug thawj tswjfwm huv ib lub nroog.

²⁰Nyob huv nplajteb nuav yeej tsi muaj ib tug ua zoo txhua lub sijhawm lossis tsi ua txhum le.

²¹Tsi xob quavntsej tej kws luas has, nyob tsaam koj nov koj tug tubkhai txobthuam koj,

²²hab koj los yeej tau txobthuam lwm tug ntau zag lawm.

²³Kuv siv kuv lub tswvyim sim txhua yaam nuav. Kuv suav has tas kuv yog tug tuabneeg kws txawj ntse, tabsis qhov tseeb, txujkev txawj ntse nyob dleb kuv heev.

²⁴Yuav ua le caag txhaj paub has tas, kev ua neej nyob muaj qaabhau? Qhov ntawd nyob tub dlhau hwv, peb paub tsi txug le.

²⁵Tabsis kuv nrhav hab kawm kev txawj ntse; kuv nrhav kuas tau tswvyim hab kev txawj ntse teb kuv tej lug nug, hab kuv kawm kev ua sab phem hab kev ruag saib zoo le caag.

²⁶Kuv nrhav tau ib yaam kws ab sab tshaaj txujkev tuag, yog tug quaspuj kws muab nwg txujkev hlub thaab rua koj, nwg yuav nteg koj ib yaam le lub vaag lossis rooj ntaa npuj kws maag koj; hab nwg saab npaab kws puag koj yuav zoo ib yaam le txuj saw hlau kws khi koj. Tug tuabneeg kws ua hum Vaajtswv sab txhaj yuav tsiv dlim, tabsis tug quaspuj ntawd yuav nteg tau cov tuabneeg kws nyam ua txhum.

²⁷Tug tuabneeg txawj ntse has tas, “Saib maj kuv nrhav ib yaam dlhau rua ib yaam kuv txhaj moog nrhav tau lug teb kuv tej lug nug.

²⁸Kuv nrhav lwm yaam lug teb, tabsis nrhav tsi tau le. Kuv nrhav tau ib tug txivneej kws kuv fwm ntawm ib txheeb leej, tabsis cov quaspuj kuv nrhav tsi muaj ib tug le.

²⁹Tej kws kuv kawm tau yog le nuav: Vaajtswv yeej tsim tuabneeg lug ua ncaaj ua nceeg, tabsis yog peb pheej lob kev nyuaj sab lug rua peb xwb.”