Read Hmong Njua Tej Lug Qha 9 Bible Online

Tej Lug Qha 9 - Hmong Njua bible

Tej Lug Qha 9

¹Kuv xaav ntev loo txug tej nuav, kuv pum has tas cov tuabneeg txawj ntse, cov tuabneeg ncaaj nceeg, puab tej kev sis hlub hab tej kev sis ntxub puavleej nyob huv Vaajtswv lub xibteg. Tsi muaj leejtwg paub tej kws yuav lug taav puab hauv ntej.

²Tuab txuj moov phem lug raug cov tuabneeg ncaaj nceeg hab cov tuabneeg nkhaus, cov tuabneeg sab zoo hab cov tuabneeg sab phem, cov tuabneeg huv hab cov tuabneeg tsi huv, cov tuabneeg muaj khoom fij hab cov tuabneeg kws tsi muaj. Tug tuabneeg ncaaj nceeg los yeej zoo tsi tshaaj tug tuabneeg txhum. Tug tuabneeg kws coglug los yeej zoo tsi tshaaj tug kws tsi coglug. Tsi muaj dlaabtsi txawv le.

³Nuav yog txuj moov phem kws lug raug txhua tug tuabneeg nyob huv lub nplajteb nuav ib yaam nkaus. Dlua le ntawd thaus puab tseem ua neej nyob, puab txhua tug lub sab puv nkaus tej kev phem hab kev vwm, ces tom qaab ntawd puab yuav tuag.

⁴Tabsis yog leejtwg muaj sa nrug cov tuabneeg kws ua neej nyob huv nplajteb nuav, tug ntawd tseem muaj kev ca sab; rua qhov tug dlev kws tseem caj sa muaj nqes dlua tug tsuv ntxhuav kws tuag lawm.

⁵Tseeb tag, cov tuabneeg kws tseem ua neej nyob paub has tas, muaj ib nub twg puab yuav tuag, tabsis cov tuabneeg kws tuag lawm tsi paub dlaabtsi le. Puab yuav tsi tau nqe zug hab tsi muaj leejtwg ncu txug puab le lawm.

⁶Puab tej kev sis hlub, kev sis ntxub hab tej kev khib puavleej tuag nrug puab moog. Puab yuav tsi nrug luas muaj feem muaj tug huv lub nplajteb nuav ntxiv lawm.

⁷Ca le noj koj tej zaub mov hab zoo sab; ca le haus koj tej cawv txiv maab hab kaaj sab lug. Rua qhov Vaajtswv yeej pum zoo kuas koj ua le ntawd.

⁸Txuag koj cev rig tsho kuas dlawb txhua lub sijhawm, hab pleev ntshis roj tsw qaab rua koj lub taubhau.

⁹Ca le txaus sab ua neej nrug tug quaspuj kws koj hlub moog taag koj lub neej kws tsi muaj qaabhau. Ca le txaus sab rua koj lub neej kws tsi muaj qaabhau, rua qhov tej ntawd txhaj yog tej kws koj muaj nyob huv nplajteb nuav.

¹⁰Ca le rau sab ntso ua teg num kws koj ua, rua qhov yuav tsi muaj dlejnum, tsi muaj kev xaav, tsi muaj kev txawj ntse hab tsi muaj tswvyim nyob huv tub tuag teb, qhov chaw kws koj yuav moog nyob ntawd.

¹¹Kuv pum dlua lwm yaam ntxiv nyob huv nplajteb nuav, cov tuabneeg kws dlha ceev tshaaj los yuav dlha tsi yeej txhua zag kws muaj kev sis tw dlha, hab cov tuabneeg kws sab tawv heev los yuav sis ntaus sis tua tsi yeej lawm; cov tuabneeg txawj ntse los yuav tsi muaj noj tsi muaj haus, cov tuabneeg muaj tswvyim los tsi npluanuj, hab cov tuabneeg kws ua tau tshaaj plawg los tsi tau tuav lub meejmom sab. Txuj moov phem yeej yuav lug raug txhua tug.

¹²Tsi muaj leejtwg paub has tas kev puamtsuaj yuav lug raug nwg thaus twg, ib yaam le tej noog kws tsi nwm tub maag luas tej hlua, hab ib yaam le tej ntseg kws moog maag luas lub vaag. Yog le ntawd peb yuav maag luas lub vuj hlua thaus peb tsi ncu ceevfaaj.

¹³Muaj dlua ib lub tswvyim zoo kws kuv pum nyob huv nplajteb nuav, xws le:

¹⁴Muaj ib lub nroog miv miv kws tsi muaj pejxeem coob nyob huv. Muaj ib tug vaajntxwv kws muaj fwjchim hab muaj tubrog coob heev tuaj ntaus lub nroog ntawd. Nwg tuaj vij hab npaaj tsoo tug ntsaa yeej moog rua huv lub nroog.

¹⁵Muaj ib tug tuabneeg pluag kws ntse heev nyob huv lub nroog ntawd, nwg muaj cuabkaav cawm tau lub nroog tsi raug luas tua, tabsis tsi muaj leejtwg xaav txug tug pluag ntawd le.

¹⁶Kuv has tas, muaj tswvyim zoo dlua muaj zug, tabsis tsi muaj leejtwg xaav txug tug tuabneeg pluag kws txawj ntse ntawd, hab tsi quavntsej nwg tej lug le.

¹⁷Ua tuab zoo noog tug tuabneeg txawj ntse tej lug kws nwg maam maam has, zoo dlua le noog cov tuabneeg ruag tug thawjtswj lub suab kws nthe nqho huv lub rooj saablaaj.

¹⁸Lub tswvyim ua tau ntau yaam zoo dlua tej cuabyeej ua rog, tabsis tug tuabneeg txhum yeej ua tsi tau ib yaam zoo le.