Read Hmong Njua Xalumoos Tej Nkauj 5 Bible Online

Xalumoos Tej Nkauj 5 - Hmong Njua bible

Xalumoos Tej Nkauj 5

¹Kuv nplooj sab, kuv tug nkauj nyaab, kuv tub tuaj rua huv kuv lub vaaj lawm. Kuv tuaj dle kuv tej txumlom hab tej nroj mules kws tsw qaab; kuv taabtom noj tej tsev ntaab hab tej zib ntaab; kuv taabtom haus tej cawv txiv maab hab tej kua mig. Cov phoojywg, ca le noj hab haus moog txug thaus kws mej qaug rua txujkev hlub lawm tsaiv!

²Kuv pw tsaug zug lawm, tabsis kuv lub sab yeej tsim pis dlheev le, kuv ua npau suav toog nov tug kws kuv hlub tuaj khob qhovrooj; Tug kws kuv hlub, kuv nplooj sab, kuv tug nquab, ca le qheb qhovrooj rua kuv lug tsev; kuv lub taubhau ntub lwg hab ntsu tej lwg thaus ib taag mo taag le lawm.

³Kuv tub hle khaub dluag lawm; vim le caag kuv tseem rov naav dlua hab? Kuv tub ntxuav kuv txhais kutaw lawm, vim le caag kuv tseem rov tsuj aav dlua hab?

⁴Tug kws kuv hlub cev nwg txhais teg ntawm qhovrooj lug, ua rua kuv lub sab dlha tig toog thaus nwg nyob ze kuv.

⁵Kuv tub npaaj tog qheb qhovrooj rua nwg lug tsev lawm. Kuv muab tshuaj tsw qaab mules pleev kuv txhais teg, kuv cov ntiv nteg puavleej pleev tshuaj mules huv tuabsi. kuv maam cev teg moog tuav tug laag qhovrooj.

⁶Kuv qheb qhovrooj rua tug kws kuv hlub lug tsev, tabsis sov nwg tub moog rua qhov twg lawm. Ua caag kuv xaav nov nwg lub suab ua luaj le! Kuv tawm moog nrhav nwg, tabsis nrhav tsi tau; kuv hu nwg tabsis tsi nov nwg teb.

⁷Cov tub faajxwm kws zuv lub nroog ntsib kuv; puab muab kuv ntaus ua rua kuv tej nqaj ntsuab taag; cov tub faajxwm ntawm tug ntsaa yeej muab kuv dlaim ntaub npug ntsejmuag dlua.

⁸Ib tsoom quaspuj kws nyob huv lub nroog Yeluxalees, mej ca le coglug rua kuv, yog mej ntsib tug kws kuv hlub; mej ca le qha rua nwg has tas kuv mob vim txujkev hlub.

⁹Tug kws zoo nkauj tshaaj ib tsoom quaspuj huv tuabsi, puas yog tug kws koj hlub txawv dlua le lwm tug? Dlaabtsi ua rua tug kws koj hlub zoo tshaaj tug kws luas lwm tug hlub, txhaj tsimnyog kuas peb coglug rua koj?

¹⁰Tug kws kuv hlub zoo nraug hab muaj zug heev; nwg yog ib tug kws nto npe tshaaj plawg nyob rua huv ib txheeb leej ntawd.

¹¹Nwg lub ntsejmuag yog tej tseem kub hab dlu ndlaug leeg; nwg cov plaubhau ntev nplwg loo dlub ncab le tug uab laag.

¹²Nwg ob lub qhovmuag zoo nkauj ib yaam le cov nquab nyob lawv ntug dlej, cov nquab kws dlaa tej kua mig hab sawv nplawg nta lawv ntug dlej.

¹³Nwg lub plhu zoo ib yaam le lub vaaj kws muaj tshuaj tsw qaab hab txumlom puv nkaus tsw qaab ntxag, nwg ob dlaim tawv ncauj zoo ib yaam le tej paaj lilis kws ntub tshuaj mules.

¹⁴Nwg ob txhais teg zoo nkauj kawg nkaus, nwg coj tej nplhaib kws muaj nqes tshaaj plawg. Nwg lub cev ntaaj ntsug ndlaug leeg dlu lug ib yaam le tug kaug ntxhw; muab tej hlaws xafiles dlai thoob plawg rua nwg lub cev.

¹⁵Nwg ob txhais ncej qaab zoo ib yaam le tej qai zeb kws muab cog rua sau thooj tseem kub; nwg lub cev ntaaj ntsug zoo ib yaam le lub Roob Lenpanoos kws muaj tej ntoo cab tuaj puagncig.

¹⁶Nwg lub ncauj has lug qaab zib ntxim nwj; nwg lub cev ntaaj ntsug ntxim nyam hab txaus sab kawg le. Cov ntxhais huv nroog Yeluxalees, tug kws kuv nyam hab hlub zoo le nuav ntaag.