Read Hmong Njua Xalumoos Tej Nkauj 7 Bible Online

Xalumoos Tej Nkauj 7 - Hmong Njua bible

Xalumoos Tej Nkauj 7

¹Koj yog ib tug hluas nkauj kws zoo nkauj tshaaj plawg huv tuabsi! Koj txhais kutaw kws rau khau khab ua caag zoo nkauj ua luaj. Koj ob txhais ncej qaab ntug ntoob zoo nkauj ib yaam le tej nplhaib kws luas nchuav.

²Koj lub ntaws zoo ib yaam le lub ntim kws rau cawv txiv maab tsi nqhuab le. Koj lub plaab mog zoo ib yaam le teg nplej kws muaj paaj lilis nyob puagncig.

³Koj ob lub mig zoo ib yaam le ib nkawm mivnyuas kauv ntxaib.

⁴Koj lub cejdlaab zoo ib yaam le lub chaw tsomfaaj kws muab kaug ntxhw ua. Koj ob lub qhovmuag zoo ib yaam le tej paag dlej huv lub nroog Hesenpoos kws nyob ze lub roojvaag ntawm lub nroog luj. Koj tug caajntswg ntxim nyam ib yaam le lub chaw tsomfaaj peg Lenpanoos kws yog qhov chaw faajxwm lub nroog Damaxes.

⁵Koj lub taubhau tsaa sab ib yaam le lub Roob Kalemees. Koj cov plaubhau ci ndlaug leeg le cov xuv ntaub tsuj; cov plaub ntawd zoo nkauj kawg le; ua rua vaajntxwv tsi ncu qaab moog kev.

⁶Ua caag koj zoo nkauj hab ntxim sab ua luaj! Tug kws ntxim hlub, ua caag koj yuav zoo tau txaus sab ua luaj!

⁷Koj lub cev yag ib yaam le tug toovlaaj, hab koj ob lub mig zoo ib yaam le ob tauv txiv toovlaaj.

⁸Kuv yuav nce tsob toovlaaj hab dle nwg cov txiv. Kuv saib koj ob lub mig zoo ib yaam le tauv txiv maab nyeg, koj ua paa tsw qaab ntxag ib yaam le tej paa txiv dluaj.

⁹Hab koj lub qhovncauj zoo le cov cawv txiv maab kws qaab tshaaj plawg. Ca cov cawv txiv maab nrug ncaaj nraim moog rua ntawm tug kws kuv hlub, ndlwg moog ywg nwg ob dlaim tawv ncauj hab nwg cov nav.

¹⁰Kuv yog tug kws kuv hlub tug, hab nwg yeej xaav tau kuv kawg le.

¹¹Tug kws kuv hlub, ca le tawm tuaj, wb moog rua saab nrau ntug nroog hab moog pw ib mos huv tej zog.

¹²Wb yuav sawv ntxuv moog saib lub vaaj txiv maab, saib tej maab puas tau cuab hlaav nplooj, saib tej cos paaj puas tau tawg, hab saib tej ntoo txiv ntsab pobkws puas tau tawg paaj. Nyob qhov ntawd kuv maam muab kuv txujkev hlub rua koj.

¹³Koj yuav nov tej zaub ntug hauvpaug tsw qaab ntxag, hab txhua yaam txiv kws wb nyam noj yeej nyob ze ntawm wb qhovrooj, tug kws kuv hlub, kuv yeej khaws tej txiv qub hab tshab kws zoo tshaaj plawg rua koj.