Read Hmong Njua Yaxayas 49 Bible Online

Yaxayas 49 - Hmong Njua bible

Yaxayas 49

¹Txhua lub tebchaws kws nyob dleb, ca le noog kuv has, cov tuabneeg kws nyob dleb, tug TSWV tub xaiv kuv thaus kuv tseem nyob huv plaab, hab nwg yeej tis kuv lub npe thaus kuv tseem nyob huv nam plaab.

²Nwg ua rua kuv tej lug ntse ib yaam le nav ntaaj, nwg muab nwg txhais teg tiv thaiv kuv. Nwg ua rua kuv zoo ib yaam le xibxub kws ntse heev hab npaaj rawv tog tua lawm xwb.

³Nwg has rua kuv tas, “Cov Yixalayees, mej yog kuv cov tubkhai, mej yuav ua rua kuv tau koob meej.”

⁴Kuv has tas, “Kuv tub ua num nyaav heev, tabsis tsi muaj qaabhau! Kuv tub siv kuv tug zug, tabsis tsi muaj dlaabtsi tav.” Txawm le ntawd los kuv tseem tso sab rua tug TSWV; hab kuv tug TSWV yuav coj nqe zug lug rua kuv.

⁵Tug TSWV tub tsaa kuv ua nwg tug tubkhai thaus kuv tseem nyob huv nam plaab, tug TSWV tsaa kuv ua nwg tug tubkhai, coj nwg tsaav tuabneeg Yixalayees kws tawg ua saab ua sua lawm, rov qaab lug cuag nwg. Tug TSWV yuav pub kuv tau ntsejmuag, hab Vaajtswv yog kuv tug zug,

⁶Tug TSWV has rua kuv tas, “Kuv tug tubkhai, kuv muab tej num tseemceeb dlua yaav taag lug lawm rua koj ua, koj yuav ua rua cov Yixalayees kws tseem seem nyob rov vaammeej tshaaj qub, tsi yog le ntawd xwb, kuv tseem yuav ca koj ua lub teeb ci rua txhua tsaav tuabneeg, kuas tuabneeg nplajteb txhaj yuav dlim.”

⁷Tug Vaajtswv dlawbhuv kws txhwv cov Yixalayees dlim; has rua tug tuabneeg kws raug luas thuam hab tug kws raug lwm tsaav tuabneeg tej numtswv cov tubkhai ntxub has tas, “Tej vaajntxwv yuav pum koj hab sawv hawm koj, cov numtswv puavleej pum koj hab khoov ntshis hawm; rua qhov tug TSWV kws yog cov Yixalayees tug Vaajtswv dlawbhuv, nwg yog tug ncaaj nceeg, nwg tub xaiv koj ca lawm.”

⁸Tug TSWV has rua nwg tsaav tuabneeg tas, “Thaus txug lub sijhawm kws kuv cawm mej, kuv yuav hlub mej, kuv yuav tsomkwm mej, kuv yuav teb mej tej lug thov, hab mej yuav yog kuv lu lug cog tseg rua lwm tsaav tuabneeg. Kuv yuav ca mej rov moog nyob huv mej lub tebchaws kws nwgnuav faab nyo.

⁹Kuv yuav has rua cov tuabneeg kws raug luas nteg tas, ‘Ca le tawm moog!’ Hab has rua cov tuabneeg kws nyob huv qhov tsaus ntuj nti tas, ‘Ca le lug rua ntawm qhov pum kev!’ Puab yuav nrhav noj sau tej roob ib yaam le tej yaaj.

¹⁰Puab yuav tsi raug kev tshaib kev nqhes. Lub nub hab tej cua suv tom taj suabpuam yuav tsi kub puab, vim tug kws hlub puab yuav coj puab kev moog. Nwg yuav coj puab moog rua ntawm qhov chaw kws muaj dlej txhawv.

¹¹“Kuv yuav rhawv ib txuj nam kev luj sau tej roob rua kuv tsaav tuabneeg taug.

¹²Kuv tsaav tuabneeg yuav lug dleb dleb lug, puab yuav lug saab peg qaumteb, saab nubpoob hab huv lub nroog Axavas kws nyob saab qaabteb lug.”

¹³Lub ntuj, ca le hu nkauj! Lub nplajteb, ca le qw zoo sab! Tej toj roob hauv peg ca le tsaa suab hu nkauj; tug TSWV yuav nplig nwg tsaav tuabneeg sab; nwg yuav taabncuab nwg tsaav tuabneeg kws raug kev txomnyem.

¹⁴Tabsis cov tuabneeg huv lub nroog Yeluxalees has tas, “Tug TSWV tub tso peb tseg lawm; peb tug TSWV tsi ncu qaab txug peb lawm.”

¹⁵Yog le ntawd, tug TSWV teb has tas, “Puas muaj ib leej nam twg kws tsi ncu qaab nwg tug mivnyuas mog, hab tsi hlub tug mivnyuas kws nwg yug? Txawm yog leej nam tsi ncu qaab nwg tug mivnyuas los xij, kuv yuav ncu ntsoov mej hab tsi tso mej tseg ib zag le.

¹⁶Yeluxalees, kuv yeej ncu ntsoov koj, kuv sau koj lub npe rua huv kuv ob lub xibteg. Kuv yuav saib ntsoov koj moog le.

¹⁷“Tshuav tsi ntev cov tuabneeg kws yuav txhim khu lub nroog Yeluxalees tub yuav lug, hab cov tuabneeg kws rhuav tshem koj yuav tsiv moog.

¹⁸Ca le tsaa qhovmuag saib puagncig; saib tej xwm ntawd! Koj tsaav tuabneeg taabtom sis sau ua ke puab yuav lug cuag koj! Tug TSWV has tas, ‘Kuv yog tug kws muaj sa nyob, koj yuav zoo sab rua koj tsaav tuabneeg ib yaam le tug nkauj nyaab zoo sab rua nwg tej npauj nyag npauj kub.

¹⁹“ ‘Mej lub tebchaws raug puamtsuaj nyob dlo cuas ca, nwgnuav lub tebchaws yuav tsi txaus cov tuabneeg kws taabtom lug ntawd nyob, hab cov tuabneeg kws muab koj ua puag taag lawm, yuav raug luas lawv kuas tsiv moog dleb heev.

²⁰Muaj ib nub mej cov mivnyuas kws yug thaus mej raug luas nteg moog, yuav has rua mej tas, “Lub tebchaws nuav nqaim rua peb heev, peb xaav kuas tau lub tebchaws kws dlaav dlua lub nuav, txhaj txaus peb nyob!”

²¹Ces koj yuav xaav has tas, “Leejtwg yug cov mivnyuas nuav rua kuv? Kuv tej mivnyuas tub tuag taag hab kuv muaj tsi taug mivnyuas lawm. Kuv raug luas nteg coj moog nyob rua lwm lub tebchaws kws dleb heev, tabsis leejtwg tu cov mivnyuas nuav luj hlub? Kuv tub nyob dlo cuas ca lawm, yog le ntawd, tej mivnyuas nuav tseem lug qhov twg lug hab?” ’ ”

²²Tug TSWV kws muaj Fwjchim Luj kawg nkaus has rua nwg tsaav tuabneeg tas: “Kuv yuav cu teg rua txhua tsaav tuabneeg, hab qha rua cov pejxeem suavdlawg kuas puag mej cov tub ntawm puab xubndlag, hab ris mej cov ntxhais lug tsev.

²³Tej vaajntxwv yuav zoo le mej txiv, tej puj vaajntxwv yuav zoo le mej nam. Puab yuav nyo taubhau hawm mej hab txu fwjchim qeg kawg le. Ces mej txhaj yuav paub has tas kuv yog tug TSWV; cov tuabneeg kws tog rawv kuv paab yuav tsi nkim puab tug zug le.”

²⁴Mej puas muaj peevxwm moog muab tej khoom kws cov tubrog moog fuab tau lug? Mej puas muaj peevxwm moog tso cov tuabneeg kws tug tuabneeg limham nteg lawm?

²⁵Tug TSWV teb has tas, “Txawm yog cov tuabneeg kws raug cov tubrog nteg los yuav coj moog, hab tej khoom kws cov tuabneeg limham fuab tau los yuav coj moog. Kuv yuav tawmtsaam cov tuabneeg kws tawmtsaam mej, hab kuv yuav cawm mej cov mivnyuas kuas dlim.

²⁶Kuv yuav ua kuas cov tuabneeg kws tsimtxom mej rov sis tua ua lwj ua lam ib yaam le cov tuabneeg qaug cawv. Ces thaus ntawd txhua tsaav tuabneeg txhaj paub has tas kuv yog tug TSWV kws yog mej tug Cawmseej hab yog tug kws txhwv mej dlim; kuv yog Yakhauj tug Vaajtswv kws muaj Fwjchim Luj kawg nkaus.”