Read Hmong Njua Yaxayas 5 Bible Online

Yaxayas 5 - Hmong Njua bible

Yaxayas 5

¹Kuv yuav hu nkauj rua tug kws kuv hlub noog, zaaj nkauj nuav has txug nwg lub vaaj txiv maab: tug kws kuv hlub muaj ib lub vaaj txiv maab nyob sau lub ncov roob kws aav zoo heev.

²Nwg khawb hab khaws tej pobzeb tawm, nwg cog tej yub txiv maab zoo heev rua. Nwg ua ib lub chaw tsomfaaj zuv tej txiv maab ntawd. Nwg khawb ib lub qhov ua chaw tsuam txiv maab. Nwg tog rawv kuas tej txiv maab sav, tabsis tej txiv maab qaub kawg le.

³“Nwgnuav mej cov kws nyob huv lub nroog Yeluxalees hab cov Yudas, mej ca le txav txim rua kuv hab kuv lub vaaj txiv maab.

⁴Puas tseem tshuav tej yaam dlaabtsi kws tsimnyog kuv ua rua kuv lub vaaj txiv maab ntxiv hab? Vim le caag thaus kuv moog dle cov txiv zoo kws qaab zib, tsua dle tau cov txiv phem kws qaub xwb?

⁵“Nwgnuav kuv qha rua mej paub qhov kws kuv yuav ua rua kuv lub vaaj txiv maab. Kuv yuav muab tej xuv hlau kws xov ncig lub vaaj rhuav povtseg, hab lub vaaj ntawd yuav raug kev puamtsuaj; kuv yuav muab tej ntsaa laajkaab rhuav huv tuabsi povtseg, kuas tej txiv maab ntawd raug luas tsuj rua huv aav.

⁶Kuv yuav ua kuas lub vaaj txiv maab nuav tuaj nroj tsuag; kuas tsi muaj tuabneeg taav ntsis lossis npoog aav rua tej hauvpaug, kuv yuav ca xuavpaug nqai hlau hab xuavpaug rau tshws tuaj laum nwg. Kuv yuav txwv fuab cua kuas tsi muaj naag lug ywg lub vaaj nuav.”

⁷Tug TSWV kws muaj Fwjchim Luj kawg nkaus lub vaaj txiv maab yog cov Yixalayees. Cov Yudas yog cov txiv maab kws nwg cog rua. Nwg ca sab ntsoov has tas puab yuav ua tuabneeg zoo, tabsis puab tsua ua tuabneeg tua tuabneeg. Nwg ca sab ntsoov has tas puab yuav ua tuabneeg ncaaj nceeg, tabsis cov tuabneeg kws raug puab tsimtxom thov kuas muaj kev ncaaj nceeg.

⁸Mej yuav raug kev puamtsuaj lauj! Mej yuav ntau lub tsev hab ntau thaaj teb lug ntxiv rua tej kws mej tub muaj lawm. Tsi ntev yuav tsi muaj chaw rua lwm tug nrug mej nyob, tsuas tshuav mej nyob huv lub tebchaws ntawd lawm xwb.

⁹Kuv nov tug TSWV kws muaj Fwjchim Luj kawg nkaus has tas, “Taagnrho tej tsev luj hab zoo nkauj nuav yuav tsi muaj tuabneeg nyob.

¹⁰Cog kaum paav txiv maab, thaus sav tsuas tsuam tau ib thoob cawv xwb, hab tseb kaum kawm noob nplej, thaus sav tsuas sau tau ib kawm xwb.”

¹¹Mej yuav puamtsuaj lauj! Mej sawv thaus tsi tau kaaj ntug lug haus cawv, hab nyob tsheej taag mo haus cawv kuas mej qaug.

¹²Thaus mej muaj noj muaj haus, mej ntaus nkauj nogncaas, ntaus nruag, tshuab raaj ntsaws, hab haus cawv. Tabsis mej tsi totaub has tas tug TSWV ua dlaabtsi,

¹³yog le ntawd, mej txhaj yuav raug coj moog ib yaam le cov tuabneeg raug txim. Mej cov thawjcoj yuav tuag tshaib hab mej cov pejxeem yuav tuag nqhes.

¹⁴Tubtuag teb tshaib nqhes heev, nwg rua ncauj rug tog puab. Tubtuag teb yuav nqog tej numtswv huv lub nroog Yeluxalees nrug cov pejxeem hab puab tej kev lomzem moog kuas taag.

¹⁵Txhua tug yuav poob ntsejmuag, hab taagnrho tej tuabneeg khaavtheeb yuav raug txu fwjchim.

¹⁶Tabsis tug TSWV kws muaj Fwjchim Luj kawg nkaus yuav qha nwg lub fwjchim ntawm nwg txujkev ncaaj nceeg, hab Vaajtswv tug dlawbhuv qha nwg txujkev dlawbhuv, thaus nwg txav txim rua nwg tsaav tuabneeg.

¹⁷Yaaj yuav noj tej nyom tuaj huv tej nroog kws raug puamtsuaj taag, hab tej mivnyuas tshis yuav ntsib lub tshaav zaub kws mog heev.

¹⁸Mej yuav puamtsuaj lauj! Mej cov kws tsi kaam tso kev txhum tseg.

¹⁹Mej has tas, “Ca tug TSWV ua lawv le nwg has tas nwg yuav ua, kuas peb txhaj pum yaam kws nwg ua ntawd. Ca cov Yixalayees tug Vaajtswv kws dlawbhuv ua lawv le tej kws nwg tau npaaj tseg lawm, peb txhaj yuav paub.”

²⁰Mej yuav puamtsuaj lauj! Mej muab tej lug phem ntxeev has ua lug zoo, hab muab tej lug zoo ntxeev has ua lug phem. Mej muab lug qaab zib ntxeev ua lug ab lug dlaw, hab muab lug ab lug dlaw ntxeev has ua lug qaab zib.

²¹Mej cov kws pum has tas mej ntse, hab mej cov kws xaav huv mej lub sab has tas mej ntse, mej yuav raug puamtsuaj lauj!

²²Cov tuabneeg kws haus cawv ua tau, hab cov tuabneeg sab tawv kws muab cawv sis tov haus, mej yuav raug puamtsuaj lauj!

²³Tabsis mej txav txim tsi ncaaj, mej yuav tej nyaj xab hab tso tug tuabneeg kws muaj txim tawm nyob ywj sab, hab rau txim rua tug tuabneeg ncaaj nceeg.

²⁴Yog le ntawd, nwgnuav tej quavnyaab npleg hab tej nroj puamkhaab kub nyab le caag, mej tej caag yuav lwj, yuav qhuav hab cua yuav muab ntsawj yaa taag ib yaam le ntawd, vim mej tsi leeg paub tug TSWV kws muaj Fwjchim Luj kawg nkaus txuj kevcai kws cov Yixalayees tug Vaajtswv kws dlawbhuv tau qha tseg rua peb lawm.

²⁵Tug TSWV chim heev rua nwg tsaav tuabneeg hab nwg tsaa nwg txhais teg rau txim rua puab. Tej hauv roob yuav ua zug koog, hab yuav muab cov tuabneeg tuag tso pawg lug rua huv tej plawv kev ib yaam le tej khoom kws muab povtseg. Txawm yog tub muaj npaum le nuav los tug TSWV tseem chim tsi paub kawg, nwg tseem pheej tsaa nwg txhais teg txav txim taag zug le.

²⁶Tug TSWV ua ib yaam cim hu lub tebchaws kws nyob dleb heev, nwg xuav hu kuas puab tuaj tim qaab ntug tuaj cuag nwg. Hab puab tuaj lawm tag lauj! Puab tso saas ceev kawg le.

²⁷Tsi muaj leejtwg yuav nkeeg, tsi muaj leejtwg yuav qaug le. Puab yuav tsi tsaug zug ib zag le, puab tej hlaab sa los tsi xoob; tej hlua khau los tsi tu.

²⁸Puab tej xub nee los zuag kawg nkaus, hab puab tej neevnti los ntaa txhua raab tshuav qeb lawm xwb, puab cov neeg tej rau tawv ib yaam le pobzeb, hab puab tej tsheb neeg ndlog zoo ib yaam le khaub zeeg cua.

²⁹Cov tubrog nyooj lawg ib yaam le tug tsuv ntxhuav kws tum tau tsaj hab kwv moog rua qhov chaw kws tsi muaj tug lug txeeb tau ntawm nwg.

³⁰Thaus txug nub ntawd, puab yuav nyooj nrov heev thoob plawg lub tebchaws Yixalayees ib yaam le dlej havtxwv ndlaas. Tig saib lub tebchaws saib! Kev tsaus ntuj hab kev nyuaj sab lug lawm lauj! Kev tsaus ntuj muab kev kaaj laum taag lawm.