Read Hmong Njua Yaxayas 56 Bible Online

Yaxayas 56 - Hmong Njua bible

Yaxayas 56

¹Vaajtswv has rua nwg tsaav tuabneeg has tas, “Ca le coj ncaaj hab ua qhov tseeb, tshuav tsi ntev lawm kuv yuav lug cawm mej.

²Kuv yuav foom koob moov rua cov kws coj hab fwm nub Xanpataus. Kuv yuav foom koob moov rua txhua tug kws tsi ua kev phem kev qas.”

³Tug tuabneeg txawv tebchaws kws koom tug TSWV tsaav tuabneeg tsi xob has tas, “Tug TSWV yuav tsi kaam kuv nrug nwg tsaav tuabneeg pehawm Vaajtswv.” Tug tuabneeg saam tsi xob has has tas, “Kuv tsuas zoo le tug ntoo qhuav lawm xwb.”

⁴Tug TSWV has rua tug tuabneeg saam tas, “Yog koj fwm kuv nub Xanpataus, ua hum kuv sab hab ua ncaaj lawv le kuv txuj kevcai,

⁵mas kuv yuav pub koj muaj npe nyob rua huv kuv lub Tuamtsev hab ntawm kuv tsaav tuabneeg. Qhov kws koj lub npe yuav tsi raug rhu tawm moog ibtxhis, yuav zoo dlua koj muaj tub hab muaj ntxhais coob.”

⁶Hab tug TSWV has rua cov tuabneeg txawv tebchaws kws lug zwm ua nwg tsaav tuabneeg kws hlub nwg hab tu nwg, fwm nwg nub Xanpataus hab coj lawv le nwg txujlug cog tseg has tas,

⁷“Kuv yuav coj puab moog nyob huv Xi-oos kws yog kuv lub roob dlawbhuv, kuas puab muaj kev zoo sab nyob huv kuv lub tsev kws yog qhov chaw pehawm kuv, kuv yuav txais puab tej khoom kws muab fij rua sau lub thaaj. Kuv lub Tuamtsev yuav hu ua txhua tsaav tuabneeg qhov chaw thov Vaajtswv.”

⁸Tug TSWV kws kaav txhua tsaav yaam tau coj nwg tsaav tuabneeg Yixalayees kws raug luas nteg moog lawm rov qaab lug, hab coglug has tas nwg tseem yuav coj lwm tsaav tuabneeg lug koom nrug puab hab.

⁹Tug TSWV has rua cov tuabneeg txawv tebchaws kuas puab lug ib yaam le tej tsaj qus lug noj nwg tsaav tuabneeg.

¹⁰Nwg has tas, “Taagnrho cov thawjcoj kws tsimnyog ceebtoom rua kuv tsaav tuabneeg, tej qhovmuag dlig lawm! Puab tsi paub ib yaam dlaabtsi le. Puab zoo le cov dlev zuv qhovrooj kws tsi txawj tsej, puab tsuas pw ntxeev luj luam hab ua npau suav nkaus xwb. Yog le caag puab yuav nyam tsaug zug ua luaj!

¹¹Cov dlev ntawd noj ntau npaum le caag los tsi paub tsau le. Cov tub yug yaaj nuav tsi totaub ib yaam dlaabtsi le; puab nyag taug nyag tig xubndlag moog rua nyag txujkev, hab puab nyag tsuas xaav kuas nyag tau ntau xwb tsi pub rua leejtwg le.

¹²Cov tuabneeg quav cawv has tas, ‘Ca le muab cawv lug hab haus kuas ntau npaum le peb haus tau! Pigkig peb tseem yuav haus ntau tshaaj nub nua hab.’ ”