Read Hmong Njua Yaxayas 57 Bible Online

Yaxayas 57 - Hmong Njua bible

Yaxayas 57

¹Cov tuabneeg zoo tuag, tsi muaj leejtwg quavntsej lossis mob sab puab le. Tabsis thaus puab tuag, puab dlim kev nyuaj sab lawm.

²Cov tuabneeg kws ua lub neej ncaaj nceeg tau moog su ntawm qhov chaw tau zoo hab kaaj sab lug lawm.

³Cov tuabneeg txawj ua khawvkoob tej mivnyuas, cov tuabneeg ua kev nkauj kev nraug hab cov namndlav kws yog tuabneeg txhum, mej ca le lug ntawm nuav, kuv yuav txav txim rua mej!

⁴Mej luag leejtwg plig? Mej rua ncauj hab hlauv nplaig rua leejtwg? Mej tsi yog roj ntshaa lug ntawm cov tuabneeg ntxeev sab, hab caajceg ntawm cov tuabneeg dlaag los?

⁵Mej moog pe mlom hab pheej moog sis ntxag huv tej qaab ntoo qheb hab txhua tsob ntoo kws muaj nplooj ntxoov nyog. Mej muab mej tej mivnyuas moog tua fij rua huv tej qhov tsua kws nyob ze ntawm tej paag dlej txhawv.

⁶Mej muab tej pobzeb kws dlu ndlaug leeg huv tej qhov ntawd lug ua mlom rua mej pe. Mej laub cawv hab coj qoobloo moog fij rua tej pobzeb ntawd. Mej xaav has tas kuv txaus sab rua tej ntawd nua los?

⁷Mej nce moog fij khoom rua sau tej roob sab hab moog sis ntxag.

⁸Mej muab mej tej mlom moog teeb rua ntawm mej tej paws rooj. Mej tso kuv tseg; mej cem choj hab nce lug nrug tug kws mej hlub pw sau lub txaaj kws dlaav heev, mej them nyaj rua puab nrug mej pw. Hab mej yeej ua kuas txaus nkaus mej sab.

⁹Mej muab tshuaj tsw qaab pleev kuas mej tsw qaab ntxag moog pe tug vaajtswv Maulej. Mej khaiv mej tej numtswv moog dleb heev, txawm yog huv tubtuag teb los puab moog txug huv tuabsi.

¹⁰Mej qaug zug zig vim mej taug kev dleb heev, tabsis mej tsi tau has tas, “Taag kev ca sab lawm;” vim mej xaav has tas cov vaajtswv ntawd yuav txhawb mej tug zug, yog le ntawd mej txhaj tsi txawj nkeeg hlo le.

¹¹Tug TSWV has tas, “Cov vaajtswv twg tau ua rua mej ntshai, kuas mej dlaag kuv hab mej tsi ncu qaab txug kuv lawm? Vim kuv nyob ntsag tu tau ntev lug lawm, mej txhaj tso kuv tseg hab tsi fwm kuv puas yog?

¹²Kuv yuav nthuav tej kev ncaaj nceeg kws mej khaav hab tej num kws mej ua tawm, tabsis tej ntawd yuav tsi paab mej le.

¹³Thaus mej quaj thov paab, ca mej cov mlom lug cawm mej. Khaub zeeg cua yuav nqaa cov mlom ntawd moog povtseg! Tabsis cov kws ca sab rua kuv yuav tau nyob huv kuv lub tebchaws hab pehawm kuv huv kuv lub Tuamtsev.”

¹⁴Tug TSWV has tas, “Ca kuv tsaav tuabneeg rov qaab lug cuag kuv. Tshem tej tog khaub ntawm kuv tsaav tuabneeg txujkev moog povtseg! Ca le khu txujkev kuas zoo hab tav log!

¹⁵“Kuv yog tug Vaajtswv kws muaj Fwjchim Luj kawg nkaus hab yog tug dlawbhuv kws nyob moog ibtxhis. Kuv nyob sau qhov chaw sab hab dlawbhuv, hab kuv nrug cov tuabneeg kws txu fwjchim hab leeg kev txhum nyob. Yog le ntawd, kuv txhaj txhawb cov tuabneeg kws txu fwjchim hab leeg kev txhum kuas puab muaj kev ca sab.

¹⁶Kuv yuav pub txujsa rua kuv tsaav tuabneeg, hab kuv yuav tsi suav txim lossis tsi chim rua puab moog ibtxhis le lawm.

¹⁷Kuv chim rua puab, vim puab tej kev txhum hab ua sab hlub, yog le ntawd kuv txhaj rau txim rua puab hab muab puab tso tseg. Txawm le ntawd los puab tseem ua sab tawv hab pheej ua lawv le puab lub sab nyam xwb.

¹⁸“Kuv paub puab teg num lawm, tabsis kuv yuav khu kuas puab zoo mob. Kuv yuav coj puab, paab puab hab kuv yuav nplig cov kws muaj kev txomnyem sab.

¹⁹Kuv yuav pub kev thaajyeeb rua txhua tug, tsi has cov kws nyob dleb lossis nyob ze! Kuv yuav khu kuv tsaav tuabneeg kuas zoo mob.

²⁰Tabsis tug tuabneeg kws ua phem ua qas, zoo le dlej havtxwv ndlaas moog ndlaas lug tsi paub tug le, hab ua rua tej yaam qas tawm tuaj.

²¹Cov tuabneeg ua txhum tsi muaj kev kaaj sab le.” Tug TSWV yog tug has tej lug nuav.