Read Hmong Njua Yaxayas 6 Bible Online

Yaxayas 6 - Hmong Njua bible

Yaxayas 6

¹Xyoo kws Vaajntxwv Uxiyas tuag, kuv pum tug TSWV nyob sau nwg lub zwmtxwv kws nyob sab heev, hab nwg lub tsho nthuav puv nkaus huv lub Tuamtsev.

²Muaj ib cov xelafees sawv puagncig tug TSWV; ib tug xelafees twg muaj rau phob tis: ob phob tis npug ntsejmuag, ob phob tis npug lub cev hab ob phob tis yaa.

³Puab ib tug has rua ib tug tas: “Dlawbhuv, dlawbhuv, dlawbhuv! Vaajtswv tug kws muaj Fwjchim Luj kawg nkaus nwg yog tug dlawbhuv! Nwg tug tshwjchim ci ntsaa ab thoob plawg huv qaab ntuj.”

⁴Puab tej suab has lug ntawd ua rua ob tug ncej qhovrooj ua zug koog hab muaj paa nchu auv nab puv nkaus huv lub Tuamtsev.

⁵Kuv tau has tas, “Kuv tsi muaj chaw ca sab rua leejtwg hlo le! Zag nuav kuv tuag lauj, rua qhov tej lug kws kuv has txhua lu puavleej txhum, hab kuv yog ib tug tuabneeg kws nrug cov tuabneeg has lug phem lug qas nyob ua ke xwb. Txawm yog le ntawd los kuv lub qhovmuag tub pum kag tug Vaajntxwv kws yog tug TSWV tug kws muaj Fwjchim Luj kawg nkaus lawm.”

⁶Ces txawm muaj ib tug xelafees yaa lug cuag kuv, nwg muab caj tais tau ib lub ncaig tawg cig lab ploog tom lub thaaj nqaa lug rua ntawm kuv.

⁷Nwg tuav nkaus kuv ob dlaim tawv ncauj, muab lub ncaig tawg ntawd tso pluav rua ntawm kuv ob dlaim tawv ncauj hab has tas, “Nwgnuav koj tej kev txhum tub yaaj taag, hab kuv tub zaam koj lub txim lawm, rua qhov lub ncaig tawg nuav tub chwv koj ob dlaim tawv ncauj lawm.”

⁸Ces kuv nov tug TSWV nug has tas, “Kuv yuav khaiv leejtwg moog? Leejtwg yuav ua tug sawv peb cev moog?” Ces kuv teb has tas, “Kuv nyob ntawm nuav! Thov khaiv kuv moog!”

⁹Hab nwg has rua kuv tas, “Koj ca le moog, hab has rua cov pejxeem suavdlawg le nuav: ‘Mej noog taag noog thab, tabsis mej tsi totaub; mej saib taag saib thab, tabsis mej tsi pum muaj dlaabtsi tshwmsim le.’ ”

¹⁰Ces nwg has rua kuv tas, “Ca le ua kuas tsaav tuabneeg nuav lub sab ruag, qhovntsej laag qhovmuag dlig; kuas puab qhovntsej los tsi nov lug, hab puab qhovmuag los tsi pum kev, hab has lug los tsi totaub. Yog tsi ua le ntawd, nyob tsaam puab tsua tig lug cuag kuv, ces kuv khu puab zoo.”

¹¹Kuv txhaj nug has tas, “Tug TSWV, yuav zoo le nuav moog txug thaus twg?” Tug TSWV teb has tas, “Moog txug thaus tej nroog raug puamtsuaj taag tsi muaj tuabneeg nyob lawm, moog txug thaus tej tsev khoob lug tsi muaj tuabneeg nyob, ca moog txug thaus lub tebchaws nyob qhuav nkuag le tej roob mojsaab qhua.

¹²Kuv yuav ntab tej tuabneeg tsiv moog pluj qaab ndlais, hab kuas lub tebchaws caj nroj tsuag nyob ntsag tu.

¹³Txawm yog muaj tuabneeg seem nyob huv txug ib feem kaum xwb los puab tseem yuav raug puamtsuaj taag. Hab puab yuav zoo ib yaam le tej ntoo qheb kws luas muab ntuv taag tshuav lub hauvpaug lawm xwb.” (Lub hauvpaug ntoo ntawd pev txug Vaajtswv tsaav tuabneeg kws yuav rov hlaav tuaj dlua tshab.)