Read Hmong Njua Yaxayas 64 Bible Online

Yaxayas 64 - Hmong Njua bible

Yaxayas 64

¹Tug TSWV, ua caag koj tsi qheb hlo rooj ntug hab nqeg lug, kuas tej hauv roob txhaj yuav pum koj hab ntshai ua zug koog?

²Tej roob yuav tshee ua zug kais ib yaam le dlej npau huv lub laujkaub kws rhaub huv qhovcub. Thov koj lug qha koj lub fwjchim rua koj cov yeebncuab pum, hab ua rua txhua tsaav tuabneeg ntshai tshee nyo taabmeeg ntawm koj xubndlag.

³Muaj ib zag koj tau lug ua tej yaam kws peb ntshai kawg le rua peb pum, peb yeej tsi tau xaav txug has tas yuav muaj le ntawd; tej toj roob hauv peg ua zug koog thaus tej ntawd pum koj.

⁴Txij thaus u lug yeej tsi tau muaj leejtwg pum lossis nov ib tug Vaajtswv kws zoo le koj, leejtwg ua tej num luj npaum le nuav paab txhua tug kws ca sab rua nwg.

⁵Koj txais yuav txhua tug kws txaus sab ua tuabneeg ncaaj, cov ntawd yog cov tuabneeg kws ncu ntsoov ua lub neej lawv le koj lub sab nyam. Koj tub chim rua peb lawm, tabsis peb tseem ua txhum ntxiv hab txawm yog thaus u koj tub chim rua peb npaum le ntawd los peb pheej ua txhum tsi tseg le.

⁶Peb txhua tug puavleej tau ua txhum huv tuabsi; txawm yog tej num zoo kws peb ua los puavleej qas zoo ib yaam le txuj phuam kws tsi tau muab ntxhua. Tub yog vim peb tej kev txhum, peb txhaj zoo ib yaam le tej nplooj qhua kws cua muab ntsawj yaa taag lawm.

⁷Tsi muaj leejtwg tig lug thov koj; tsi muaj leejtwg tuaj thov koj paab le. Tub yog vim peb tej kev txhum koj txhaj tsiv nkaum peb hab muab peb tso tseg lawm.

⁸Tabsis tug TSWV, koj yeej yog peb leej txiv. Peb zoo le cov aav nplaum, hab koj yog tug puab peb.

⁹Yog le ntawd tug TSWV, thov koj tsi xob chim rua peb, hab tsi xob cim ntsoov peb tej kev txhum moog ibtxhis. Vim peb yog koj tsaav tuabneeg; thov koj hlub peb.

¹⁰Koj tej nroog tseemceeb raug pemsij ua suabpuam taag; txawm yog lub nroog Yeluxalees los raug luas muab tsoo puag taag, tsi muaj tuabneeg nyob huv lawm.

¹¹Lub Tuamtsev kws dlawbhuv hab zoo nkauj yog qhov chaw kws peb cov yawmkoob tuaj qhuas koj, tub raug suavtawg kub taag hab txhua thaaj chaw kws peb txaus sab rua puavleej raug puamtsuaj taag huv tuabsi lawm.

¹²Tug TSWV, koj tsi quavntsej tej nuav los? Koj txawm tsi ua ib yaam dlaabtsi le ntaag los? Koj yuav ca peb tsau rawv txujkev txomnyem kuas peb tiv tsi taug le los?