Read Hmong Njua Yaxayas 7 Bible Online

Yaxayas 7 - Hmong Njua bible

Yaxayas 7

¹Thaus Yauthaas tug tub Ahas kws yog Uxiyas tug xeebtxwv ua vaajntxwv kaav lub tebchaws Yudas, lub tebchaws tau sawv rog. Lexees kws ua vaajntxwv kaav tebchaws Xilias, hab Lemaliyas tug tub Pekas kws ua vaajntxwv kaav tebchaws Yixalayees tau tuaj tua lub nroog Yeluxalees, tabsis puab txeeb tsi tau.

²Thaus muaj tuabneeg moog qha rua Daviv cov xeebntxwv paub has tas, “Cov Xilias tau tuaj tsuam yeej rua huv cheebtsaam Efalayees lawm,” nwg lub sab hab nwg cov pejxeem tej sab tshee laim quas txag cuag le cua ntsawj tej ntoo kws nyob huv haav zoov.

³Tug TSWV has rua Yaxayas has tas, “Koj coj koj tug tub Se-as Yasus, moog cuag vaajntxwv Ahas. Meb yuav ntsib nwg ntawm ntu kev qhov chaw kws cov tuabneeg ntus ntaub nyob, ntawm tug kwj dleg kws lug peg lub paag dlej theem sau lug xaus nkaus.

⁴Has kuas nwg ceevfaaj tsi xob ua lub sab ywjfaab ywjfwj, tsi xob ntshai lossis nyuaj sab hlo le. Rua qhov Vaajntxwv Lexees hab nwg cov pejxeem Xilias, hab Vaajntxwv Pekas kws yog Lemaliyas tug tub txujkev npautawg tsuas zoo le ob yaav nyuas qaab tawg kws nchu nchu paa lawm xwb.

⁵Vim cov Xilias tau tuaj nrug cov Yixalayees hab puab tug vaajntxwv ntxeev sab tawmtsaam koj, puab has tas,

⁶Ca peb moog tua lub tebchaws Yudas hab ua kuas lub tebchaws ntawd ntshai, hab peb ca le txeeb lub tebchaws ntawd lug ua peb tug, hab muab Tanpees tug tub tsaa ua vaajntxwv kaav lub tebchaws ntawd.

⁷“Tabsis tug TSWV kws yog Vaajtswv has tas, ‘Tej xwm nuav yuav tsi tshwmsim ib zag le.

⁸Vim le caag? Rua qhov cov Xilias tsi muaj zug npaum le lub tuamceeb nroog Damaxes, hab Damaxes tsi muaj zug npaum le Vaajntxwv Lexees. Tshuav rau caum tsib xyoos lawm xwb, tsaav tuabneeg Yixalayees yuav tawg ua saab ua sua taag, tsi tsheej ib tsaav tuabneeg lawm.

⁹Hab cov Yixalayees lub taubhau yog lub nroog Xamalis, hab Xamalis lub taubhau yog Lemaliyas tug tub. “ ‘Yog koj kev ntseeg tsi ruaj tsi khov, koj yuav nyob tsi ruaj tsi khov ib yaam nkaus.’ ”

¹⁰Tug TSWV has dlua ib zaaj ntxiv rua Ahas has tas:

¹¹“Ca le thov tug TSWV kws yog koj tug Vaajtswv, ua ib yaam cim kuas tshwmsim rua koj pum. Yaam ntawd tawm huv tubtuag teb qhov kws tub tshaaj plawg lossis tawm sau qaum ntuj qhov kws sab tshaaj plawg tuaj.”

¹²Tabsis Ahas teb has tas, “Kuv yuav tsi thov ib yaam cim dlaabtsi hab kuv yuav tsi kaam sim tug TSWV sab.”

¹³Yaxayas teb has tas, “Vaajntxwv Daviv cov xeebntxwv, nwgnuav mej ca le noog kuv has. Qhov kws mej ua rua tuabneeg tsiv sab, puab txhaj ua tsi taug sab ntev, tseem tsi tau txaus mej sab hab los? Mej txhaj ua kuas Vaajtswv tsiv sab hab ua tsi taug sab ntev hab puas yog?

¹⁴Yog le ntawd, Vaajtswv yuav ua ib yaam cim tseemceeb rua mej pum lawv le tau has lug nuav. Ib tug nkaujxwb yuav xeeb tub hab yuav yug tau ib tug mivtub, nwg yuav muab tis npe hu ua ‘Emanu-ees.’

¹⁵Nwg yuav haus mig nyuj hab noj zib ntaab, thaus nwg paub taab lawm, nwg tsi nyam ua qhov phem, tabsis nwg nyam ua qhov zoo xwb.

¹⁶Thaus tug mivtub ntawd paub taab lawm, nwg tsi nyam ua qhov phem, tabsis nwg nyam qhov zoo xwb, ob tug vaajntxwv kws ua nruj ua tsiv rua koj ntshai ntawd, ob lub tebchaws yuav nyob nphob xuav tseg.

¹⁷“Tug TSWV yuav coj kev txomnyem lwj sab lug rua koj, koj cov pejxeem hab koj txiv tsev tuabneeg, thaus ntawd mej yuav raug kev txomnyem heev, tseem txomnyem tshaaj thaus cov Yixalayees faib tebchaws tawm ntawm cov Yudas kws nwg coj tug vaajntxwv kaav cov Axilias tuaj tua mej.

¹⁸“Nub ntawd, tug TSWV yuav xuav hu cov tuabneeg Iziv kuas sau nthwv tuaj ib yaam le yoov yaa tim ntug dlej Niles tuaj, hab hu cov tuabneeg Axilias sau nthwv huv puab lub tebchaws tuaj ib yaam le ntaab tsiv.

¹⁹Puab yuav tuaj sis sau ua npoj ntwg rua huv tej haav, tej toj ntxhaab, huv tej kis pobzeb ntawm tej roob zeb, hab puab yuav nyob puv nkaus ntawm tej haav xuavpaug hab tej nraag puamkhaab.

²⁰“Nub ntawd, tug TSWV yuav ndlav ib tug txav plaubhau tim tug dlej Efalates saab nubtuaj tuaj, tug txav plaubhau ntawd yog cov Axilias tug vaajntxwv ntaag; nwg yuav chais mej cov plaubhau, mej cov fwjtxwv hab mej tej plaub thoob plawg ib ce.

²¹“Nub ntawd, ib tug xyuas nyuj hab ob tug maum tshis xwb los yeej yuav cawm tau tug tswv teb txujsa,

²²tug xyuas nyuj hab obtug maum tshis ntawd yuav muaj kua mig ntau heev, hab nwg yuav muaj txaus noj txaus haus. Cov tuabneeg kws seem nyob huv lub tebchaws yuav muaj mig nyuj hab zib ntaab noj haus tsi taag le.

²³“Nub ntawd, tej vaaj txiv maab zoo heev kws muaj ib txheeb tsob txiv maab ib tsob twg ntaus nqe ib txheeb dlaim nyaj los yuav muab tso tseg rua maab xuavpaug hab ntoo xuavpaug laum kuas tuag taag.

²⁴Tuabneeg yuav nqaa neevnti hab xub vug moog plhob tua tsaj huv tej vaaj ntawd. Rua qhov maab xuavpaug hab ntoo xuavpaug yeej tuaj puv nkaus huv lub tebchaws ntawd.

²⁵Hab maab xuavpaug yuav tuaj puv nkaus sau tej pov roob kws zoo ua teb cog qoob cog loo, hab tsi muaj leejtwg yuav txeem tau moog rua huv le. Yuav ua chaw rua tej nyuj hab tej yaaj moog noj zaub lawm xwb.”