Read Hmong Njua Levis Kevcai 13 Bible Online

Levis Kevcai 13 - Hmong Njua bible

Levis Kevcai 13

¹Tug TSWV has rua Mauxes hab Aloos obtug has tas,

²“Yog leejtwg muaj kaab mob rua nwg tej nqaj lossis mob npuag lossis mob nti tawv txho tshauv tawg kws yuav mob ruas, yuavtsum coj nwg moog cuag tug povthawj Aloos lossis Aloos tug tub kws yog tug povthawj.

³Tug povthawj maam tshuaj nwg tug mob, yog cov plaub kws nyob ntawm qhov mob ntawd dlawb hab mob tshwm huv cov nqaj tuaj, ces yog mob ruas ntaag, ces tug povthawj qha rua nwg has tas, nwg yog tuabneeg tsi huv lawm.

⁴Tabsis yog qhov mob ntawd dlawb hab tsi mob dlhau dlaim tawv rua huv cov nqaj, cov plaub kws tuaj ntawd los tsi dlawb, tug povthawj muab tug tuabneeg ntawd cais nyob tuab leeg xyaa nub.

⁵Nub xyaa tug povthawj rov tshuaj saib nwg tug mob ntawd dlua ib zag ntxiv, yog nwg pum qhov mob ntawd zoo le qub hab tsi fuam le, ces tug povthawj rov muab tug mob cais dlua xyaa nub ntxiv.

⁶Nub xyaa tug povthawj rov tshuaj dlua ib zag ntxiv, hab yog qhov mob ntawd tsi qhuav hab tsi fuam le, tug povthawj qha rua nwg has tas, nwg yog tuabneeg huv, tsuas yog mob xwb. Nwg yuavtsum hle nwg cev rig tsho moog ntxhua nwg txhaj huv.

⁷Tabsis yog qhov mob ntawd rov fuam tom qaab kws tug povthawj tshuaj taag hab has tas nwg yog tuabneeg huv, nwg yuavtsum tau rov moog cuag tug povthawj dlua.

⁸Tug povthawj rov tshuaj nwg dlua, yog qhov mob ntawd fuam dlhau dlaim tawv lawm, tug povthawj qha rua nwg has tas, nwg mob ruas; nwg yog tuabneeg tsi huv lawm.

⁹“Yog leejtwg mob ruas, mas yuavtsum tau coj nwg moog cuag tug povthawj,

¹⁰tug povthawj yuav tshuaj nwg qhov mob. Yog has tas qhov mob ntawd ca le dlawb hab ua rua cov plaub ntawm qhov mob ntawd dlawb taag hab ua kua yig,

¹¹ces yeej yog mob ruas ntev lug lawm. Tug povthawj qha rua nwg has tas, nwg yog tuabneeg tsi huv lawm, ces tsi taag yuav muab nwg cais hab tshuaj nwg tug mob ntxiv, vim yeej paub tseeb lawm has tas, nwg yog tuabneeg tsi huv.

¹²Yog cov ruas ntawd fuam thoob ib ce huv kutaw nto plawg sau taubhau,

¹³tug povthawj rov tshuaj tug mob ntawd dlua ib zag ntxiv. Yog tug povthawj pum has tas, cov mob zoo thoob plawg ib ce lawm, tug povthawj qha rua nwg has tas, nwg yog tuabneeg huv. Yog dlaim tawv dlawb mog nyoos thoob plawg ib ce, ces nwg yog tuabneeg huv.

¹⁴Tabsis yog thaus nwg cov nqaj tawg pleb ua rua tej mob tshwm tuaj lawm, ces nwg yog tug tuabneeg tsi huv.

¹⁵Tug povthawj rov tshuaj nwg dlua ntxiv, yog tug povthawj pum qhov mob ntawd tawg pleb lawm tag, tug povthawj qha rua nwg has tas, nwg yog tuabneeg tsi huv. Qhov tawg pleb ntawd qha has tas yog mob ruas lawm, hab nwg yog tuabneeg tsi huv.

¹⁶Tabsis yog thaus twg qhov mob ntawd zoo hab tej tawv nqaj dlawb mog nyoos tuaj lawm, tug tuabneeg ntawd yuavtsum rov moog cuag tug povthawj,

¹⁷tug povthawj yuav rov tshuaj dlua ntxiv. Yog qhov mob zoo dlawb mog nyoos lawm, nwg txhaj yog tuabneeg huv hab tug povthawj qha rua nwg has tas nwg yog tuabneeg huv lawm.

¹⁸“Yog leejtwg mob npuag kws tub zoo lawm,

¹⁹hab yog tom qaab ntawd tsi ntev, lub qhov txhaab ntawd dlawb lag hab o tuaj lossis lab dlaaj dlawb rov tuaj, tug tuabneeg mob ntawd yuavtsum moog cuag tug povthawj.

²⁰Tug povthawj yuavtsum tshuaj nwg, hab yog qhov mob ntawd mob tub dlhau dlaim tawv rua huv cov nqaj hab cov plaub kws tuaj ntawm qhov mob ntawd dlawb taag lawm, ces tug povthawj qha rua nwg has tas, nwg yog tuabneeg tsi huv. Qhov mob ruas ntawd yog chiv ntawm qhov mob npuag tuaj ntaag.

²¹Tabsis yog tug povthawj tshuaj tsi pum cov plaub kws tuaj ntawm qhov mob ntawd dlawb hab qhov mob tsi qawj tub dlhau dlaim tawv rua huv, tabsis pum qhov mob ntawd txawv lawm, ces tug povthawj muab tug mob ntawd cais nyob tuab leeg xyaa nub.

²²Yog qhov mob ntawd fuam tuaj lawm, tug povthawj qha rua nwg has tas, nwg yog tuabneeg tsi huv; yog nwg mob ruas tag.

²³Tabsis yog tsi txawv hab tsi fuam le, ces yog kav txhaab mob npuag xwb, ces tug povthawj qha rua nwg has tas nwg yog tuabneeg huv.

²⁴“Yog muaj ib tug twg kub nyab, yog qhov kub nyab ntawd dlawb lossis lab dlawb lag,

²⁵tug povthawj yuav tau tshuaj qhov mob ntawd. Yog cov plaub ntawm qhov kub nyab dlawb hab qawj tub dlhau dlaim tawv rua huv cov nqaj lawm, yog cov kaab mob ruas pib fuam ntawm qhov kub nyab ntawd tuaj ntaag, ces tug povthawj qha rua nwg has tas, nwg yog tuabneeg tsi huv.

²⁶Tabsis yog tug povthawj tshuaj qhov mob, cov plaub ntawm qhov mob ntawd tsi dlawb hab tsi qawj dlhau dlaim tawv rua huv cov nqaj, tabsis pum qhov mob ntawd txawv lawm, ces tug povthawj muab tug mob ntawd cais nyob tuab leeg xyaa nub.

²⁷Nub xyaa tug povthawj maam rov tshuaj dlua ib zag ntxiv, hab yog qhov mob fuam tuaj, ces qhov mob ntawd yog mob ruas; tug povthawj qha rua nwg has tas, nwg yog tuabneeg tsi huv.

²⁸Tabsis yog qhov mob tsi txawv hab tsi fuam le, ces qhov mob ntawd tsi yog mob ruas. Tug povthawj qha rua nwg has tas, nwg yog tuabneeg huv, tsuas yog lub qhov txhaab kub nyab fuam tuaj xwb.

²⁹“Thaus kws ib tug txivneej lossis ib tug quaspuj mob o rua sau taubhau lossis rua ntawm puabtsaig,

³⁰tug povthawj yuavtsum tau tshuaj qhov mob ntawd. Yog pum qhov mob ntawd qawj dlhau dlaim tawv rua huv cov nqaj lawm, hab cov plaub ntawm qhov mob dlaaj hab soob soob lawm, ces qhov mob ntawd yog mob ruas rua sau taubhau lossis ntawm puabtsaig ntaag. Tug povthawj qha rua nwg has tas, nwg yog tuabneeg tsi huv lawm.

³¹Yog thaus tug povthawj tshuaj tug mob ntawd, qhov mob tsi qawj dlhau dlaim tawv rua huv cov nqaj, tabsis yog cov plaub tuaj tsi zoo xwb, ces tug povthawj yuavtsum muab tug mob ntawd cais nyob tuab leeg xyaa nub.

³²Nub xyaa tug povthawj rov tshuaj qhov mob dlua ib zag ntxiv, yog qhov mob tsi fuam, hab tej plaub ntawm qhov mob tsi dlaaj hab tsi qawj dlhau dlaim tawv rua huv cov nqaj,

³³tug tuabneeg ntawd yuavtsum tau muab tej plaub kws nyob ibncig ntawm qhov mob chais povtseg. Ces tug povthawj rov muab nwg cais nyob tuab leeg xyaa nub ntxiv hab.

³⁴Nub xyaa tug povthawj rov tshuaj qhov mob dlua ib zag ntxiv. Yog has tas tsi fuam hab tsi qawj dlhau dlaim tawv rua huv cov nqaj, tug povthawj qha rua nwg has tas, nwg yog tuabneeg huv. Tug tuabneeg ntawd yuavtsum hle nwg cev rig tsho moog ntxhua, nwg txhaj rov huv.

³⁵Tabsis yog qhov mob ntawd rov fuam tom qaab kws tug povthawj has tas, nwg yog tuabneeg huv,

³⁶tug povthawj yuav tau rov tshuaj tug mob ntawd dlua ib zag ntxiv. Yog qhov mob fuam tuaj, tsi taag yuav saib nwg tej plaub dlaaj kws tuaj ntawm qhov mob le, yeej paub tseeb has tas tug tuabneeg ntawd tsi huv lawm.

³⁷Tabsis yog tug povthawj pum has tas, qhov mob los tsi fuam hab cov plaub ntawm qhov mob los tuaj zoo, qhov mob los zoo lawm. Ces tug povthawj qha rua nwg has tas, nwg yog tuabneeg huv.

³⁸“Thaus ib tug txivneej lossis ib tug quaspuj mob nti tawv ua plhaws rua ntawm tej tawv nqaj,

³⁹tug povthawj yuavtsum tau tshuaj tug tuabneeg ntawd. Yog qhov mob ntawd tuag ntxhai dlawb muag lag, ces yog dlaim tawv laam tawg ua hlwv tawm tuaj xwb, tug tuabneeg ntawd yeej huv.

⁴⁰“Yog muaj ib tug txivneej tej plaubhau hle taag, nwg lub taubhau dlo dlus dlawb paug, los nwg tseem yog tuabneeg huv. Hab tug txivneej ntawd tej plaubhau sau xubqwb lossis ntawm hauvplaj hle taag lawm, nwg hauvplaj dlo dlus dlawb paug, tabsis nwg tseem yog tuabneeg huv.

⁴¹

⁴²Tabsis yog mob ua npuag lab dlawb tshwm rua sau tug tuabneeg ntawd qhov dlo hau, ces qhov mob ntawd yog mob ruas ntaag.

⁴³Tug povthawj yuavtsum tshuaj tug mob ntawd, yog mob ua lab dlawb txho tawg rua sau taubhau lossis ntawm hauvplaj,

⁴⁴ces tug povthawj qha rua nwg has tas, nwg yog tuabneeg tsi huv, rua qhov nwg mob ruas rua sau taubhau.

⁴⁵“Tug tuabneeg kws mob ruas rua nwg lub cev lawm, nwg yuavtsum naav tej rig tsho ndluag ndluag xwb, tsi xob ntsis nwg tej plaubhau, muab ntaub lug npug nwg lub ntsejmuag ib nraab rua huv, hab qw has tas, ‘Tuabneeg tsi huv! Tuabneeg tsi huv!’

⁴⁶Tug kws mob ruas, yog mob ntev npaum le caag, nwg yuavtsum nyob nwg tuab leeg ntev npaum le ntawd, hab nwg yuavtsum tawm moog nyob rua saab nrau ntug yeej, tsi xob nyob xyaw luas lwm tug.”

⁴⁷Thaus tej rig tsho tuaj pwm, tsi has tej rig tsho plaub yaaj lossis tej rig tsho ntaub maag,

⁴⁸lossis txhua dlaim ntaub maag lossis tej rig tsho ntaub plaub yaaj lossis tej tawv tsaj lossis txhua yaam kws muab tawv tsaj ua,

⁴⁹yog cov pwm ntawd ua rua tej rig tsho, tsi has tej ntaub plaub yaaj lossis tej tawv tsaj, lossis txhua yaam kws muab tawv tsaj ua tuaj pwm ntsuab dlaaj lig lossis lab dlaaj lig, ces yog cov pwm ntawd fuam, mas yuavtsum coj moog rua tug povthawj saib.

⁵⁰Tug povthawj yuavtsum tshuaj qhov tuaj pwm ntawd hab muab dlaim khaub dluag ntawd coj moog tso rua ib qho xyaa nub.

⁵¹Nub xyaa tug povthawj muab rov lug tshuaj dlua ib zag ntxiv, yog tej qhov tuaj pwm fuam tuaj, ces dlaim khaub dluag ntawd tsi huv lawm.

⁵²Tug povthawj ca le muab dlaim khaub dluag ntawd moog hlawv, rua qhov cov pwm fuam tuaj lawm, yuavtsum muab hlawv povtseg.

⁵³“Tabsis yog thaus nwg tshuaj dlaim khaub dluag ntawd, tug povthawj tsi pum qhov tuaj pwm kws lu dlaim khaub dluag fuam tuaj le,

⁵⁴nwg yuavtsum kuas luas muab dlaim khaub dluag ntawd coj moog ntxhua hab muab tso rua ib qho xyaa nub ntxiv.

⁵⁵Ces nwg rov muab dlaim khaub dluag ntawd lug tshuaj dlua, yog tsi pum txawv le hab txawm yog tej pwm tsi fuam los dlaim khaub dluag ntawd yeej tsi huv lawm; mej yuavtsum muab dlaim khaub dluag ntawd hlawv povtseg, tsi has dlaim khaub dluag ntawd tuaj pwm rua ntawm xubndlag lossis nrau nrausqaum le.

⁵⁶Tabsis yog thaus tug povthawj rov tshuaj dlaim khaub dluag ntawd ntxiv, qhov tuaj pwm ca le yaaj taag lawm, tsi has ntaub lossis tawv tsaj, nwg yuavtsum muab qhov ntawd dlua povtseg.

⁵⁷Hab yog cov pwm rov tshwm dlua tshab tuaj hab fuam ntxiv, tug tswv khaub dluag ca le muab dlaim khaub dluag coj moog hlawv povtseg.

⁵⁸Yog nwg muab dlaim khaub dluag ntawd ntxhua hab qhov pwm ntawd ca le pluj lawm, mas nwg yuavtsum rov muab ntxhua dlua, dlaim khaub dluag ntawd txhaj yuav huv.”

⁵⁹Tej kws has lug nuav, yog txuj kevcai kws has txug tej pwm kws tuaj rua ntawm tej khaub dluag, tsi has tej ntaub plaub yaaj lossis ntaub maag lossis tej rig tsho ntaub maag lossis tej rig tsho ntaub plaub yaaj lossis txhua yaam kws muab tawv tsaj ua, saib huv lossis tsi huv.