Read Hmong Njua Levis Kevcai 23 Bible Online

Levis Kevcai 23 - Hmong Njua bible

Levis Kevcai 23

¹Tug TSWV has rua Mauxes

²kuas qha rua cov Yixalayees paub has tas, tej rooj noj rooj haus kws tug TSWV teem tseg, yog tug TSWV tej rooj noj rooj haus kws dlawbhuv.

³“Mej ua num rau nub, tabsis nub xyaa yog nub Xanpataus kws yog nub su. Nub ntawd mej tsi xob ua ib yaam num dlaabtsi le; tabsis mej yuavtsum tuaj sis sau pehawm tug TSWV. Tsi has mej yuav nyob qhov twg, nub Xanpataus yog tug TSWV nub.

⁴Nuav yog tej rooj noj rooj haus dlawbhuv kws tug TSWV teem tseg, mej yuavtsum ua tej rooj noj rooj haus ntawd thaus txug lub sijhawm kws teem tseg.”

⁵“Mej ua Kevcai Hlaa Dlhau qhuas tug TSWV, yog pib ua rua lub ib hlis ntuj, nub kaum plaub, thaus nub poob qho yuav tsaus ntuj.

⁶Nub kaum tsib yog nub kws pib ua kevcai noj Ncuav tsi xyaw keeb, hab xyaa nub ntawd, mej yuavtsum tsi xob noj tej ncuav kws xyaw keeb hlo le.

⁷Thawj nub mej tuaj sis sau pehawm Vaajtswv hab nub ntawd tsi xob ua mej tej num ib yaam dlaabtsi le.

⁸Coj mej tej khoom moog hlawv fij rua tug TSWV kuas txwm xyaa nub ntawd. Nub xyaa mej rov tuaj sis sau pehawm Vaajtswv, nub ntawd tsi xob ua mej tej num.”

⁹Tug TSWV has rua Mauxes has tas, “Koj has rua cov Yixalayees has tas, thaus mej moog txug rua huv lub tebchaws kws kuv muab rua mej nyob lawm, hab thaus mej sau tau mej tej qoobloo, mej ca le coj thawj teg nplej moog rua tug povthawj.

¹¹Nwg yuav muab teg nplej ntawd yom fij rua tug TSWV, tug TSWV txhaj le txaus sab rua mej. Nub tom qaab kws dlhau nub Xanpataus lawm, tug povthawj maam le coj moog fij rua tug TSWV.

¹²Nub kws mej fij mej tej qoobloo, nub ntawd mej yuavtsum coj ib tug thaav yaaj noobnyoog ib xyoos kws tsi muaj ib qhov phem le moog tua hlawv fij rua tug TSWV.

¹³Hab muab plaub choj moov nplej zuaj xyaw roj txiv ntoo coj moog hlawv fij. Tej paa khoom fij ntawd yuav tsw qaab ntxag ua rua tug TSWV txaus sab heev. Mej yuavtsum muab ib laamfwj cawv txiv maab coj moog fij hab.

¹⁴Mej tsi xob rawm noj tej qoobloo tshab kws mej muab tau lug, tsi has noj nyoog, muab kib noj lossis muab cub ua ncuav noj moog txug nub kws mej coj thawj teg nplej moog fij rua Vaajtswv tsaiv, tsi has mej nyob qhov twg, qhov nuav yog txuj kevcai rua mej tej xeebntxwv coj moog ibtxhis le.

¹⁵“Suav kuas txwm nkaus xyaa lub limtam, pib nub tom qaab kws mej coj mej thawj teg nplej tuaj fij rua tug TSWV.

¹⁶Suav kuas txwm tsib caug nub tom qaab lub Xanpataus xyaa, mej ca le rov coj mej tej qoob tshab tuaj fij rua tug TSWV.

¹⁷Ib yig twg yuavtsum nqaa ob lub ncuav moog yom fij rua tug TSWV. Ib lub ncuav twg yuavtsum yog muab plaub choj moov nplej zuaj cub xyaw keeb hab coj moog fij rua tug TSWV thaus mej pib sau thawj phaum qoob.

¹⁸Cov pejxeem suavdlawg yuavtsum coj xyaa tug thaav yaaj kws noobnyoog ib xyoos, ib tug txiv nyuj hab ob tug laug tshis kws tsi muaj ib qhov phem le moog fij nrug cov ncuav ntawd. Puab yuavtsum muab cov tsaj ntawd hlawv fij rua tug TSWV, nrug cov ncuav hab cov cawv txiv maab ua ke. Tej paa khoom fij ntawd yuav tsw qaab ntxag txaus tug TSWV sab.

¹⁹Hab muab ib tug laug tshis coj moog fij dlaws txim, hab ob tug thaav yaaj kws noobnyoog ib xyoos moog fij ua kev sis raug zoo.

²⁰Tug povthawj yuavtsum muab cov ncuav nrug ob tug thaav yaaj coj moog yom fij ua ke rua tug TSWV, cov khoom nuav yog muab ua cov povthawj tug. Cov khoom fij nuav yog ib cov kws dlawbhuv.

²¹Nub ntawd mej tsi xob tawm moog ua ib yaam num le, tabsis mej yuavtsum tuaj sis sau pehawm Vaajtswv. Mej tej xeebntxwv yuavtsum coj txuj kevcai nuav moog ibtxhis le, tsi has mej nyob qhov twg le.

²²“Thaus mej hlais mej tej nplej, mej tsi xob hlais tej naab nplej kws nyob ntawm tej ceg kaum teb, hab tsi xob moog hlais tej naab nplej kws seem; ca tej ntawd rua cov tuabneeg txomnyem hab cov tuabneeg txawv tebchaws. Tug TSWV yog mej tug Vaajtswv.”

²³Tug TSWV has rua Mauxes has tas, “Koj has rua cov Yixalayees has tas, lub xyaa hli ntuj nub xab ib, yog nub kws mej su hab mej ca le tuaj sis sau pehawm Vaajtswv thaus mej nov suab raaj suab xyu nrov.

²⁵Coj tej khoom tuaj hlawv fij rua tug TSWV hab tsi xob ua mej tej num hlo le.”

²⁶Tug TSWV has rua Mauxes has tas, “Koj has rua cov Yixalayees has tas, lub xyaa hli ntuj nub xab kaug yog txwm rua nub kws ua kevcai theej cov pejxeem suavdlawg lub txhoj. Nub ntawd mej yoo mov hab tuaj sis sau pehawm Vaajtswv, hab coj tej khoom tuaj hlawv fij rua tug TSWV.

²⁸Nub ntawd tsi xob ua mej tej num, rua qhov yog nub kws ua kevcai theej mej lub txhoj.

²⁹Nub ntawd yog leejtwg noj ib yaam dlaabtsi, yuav muab tug ntawd rhu tawm ntawm Vaajtswv tsaav tuabneeg moog.

³⁰Hab yog nub ntawd leejtwg tseem ua nwg tej num, tug TSWV yuav muab tug ntawd tua povtseg.

³¹Txawm yog mej nyob qhov twg los mej hab mej cov xeebntxwv yuavtsum coj txuj kevcai nuav moog ibtxhis le.

³²Lub hlis ntawd nub xab cuag thaus nub poob qho moog txug nub xab kaug thaus nub poob qho, mej muab ua nub su. Nub ntawd mej tsi xob noj ib yaam dlaabtsi hlo le.”

³³Tug TSWV has rua Mauxes has tas, “Koj has rua cov Yixalayees has tas, lub xyaa hli ntuj nub kaum tsib yog nub ua Kevcai nyob Tsev Pheebsuab hab nyob kuas txwm nkaus xyaa nub.

³⁵Thawj nub mej ca le tuaj sis sau pehawm Vaajtswv hab tsi xob ua mej tej num hlo le.

³⁶Mej yuavtsum naj nub nqaa khoom tuaj fij rua tug TSWV kuas txwm xyaa nub ntawd. Nub yim mej rov tuaj sis sau dlua pehawm Vaajtswv hab coj tej khoom tuaj fij rua tug TSWV. Nub ntawd yog nub pehawm Vaajtswv nkaus xwb, mej tsi xob ua num hlo le.

³⁷(“Tej nuav yog ua kev sis sau tuaj ua kevcai pehawm qhuas tug TSWV hab muab tej khoom tuaj fij, hlawv tej khoom fij, fij tej qoobloo, fij tej khoom theej txhoj hab fij tej cawv txiv maab, lawv le nyag xaav coj tuaj fij ib nub dlhau ib nub.

³⁸Tej kevcai nuav yog ua ntxiv rua Nub Xanpataus kws ibtxwm ua lug lawm. Hab tej khoom fij nuav yog ntxiv rua mej tej khoom kws mej ibtxwm coj moog fij, yog tej kws mej fij ua tsaug rua tej lug cog tseg, hab tej khoom fij kws mej fij rua tug TSWV ntawm lub sab dlawb paug.)

³⁹“Thaus mej sau mej tej qoobloo tom teb lug rua huv tsev taag lawm, mej yuavtsum ua kevcai kuas txwm nkaus xyaa nub, pib nub kaum tsib lub xyaa hli ntuj. Nub ib hab nub yim yog ob nub kws mej su.

⁴⁰Nub ib, mej xaiv mej tej txiv ntoo kws zoo tshaaj plawg, tej nplooj toovlaaj hab tej ceg ntoo kws muaj nplooj coj tuaj ua kevcai qhuas tug TSWV kws yog mej tug Vaajtswv.

⁴¹Txhua lub xyoo thaus lub xyaa hli ntuj, mej ua kevcai rua tug TSWV xyaa nub. Muab txuj kevcai nuav qha rua mej cov xeebntxwv coj moog ibtxhis le.

⁴²Cov Yixalayees txhua tug yuavtsum nyob tsev Pheebsuab xyaa nub,

⁴³kuas mej cov xeebntxwv txhaj yuav paub has tas, tug TSWV yog tug kws ca cov Yixalayees nyob huv tej Tsev pheebsuab ntawd thaus nwg coj puab tawm nraag tebchaws Iziv lug. Kuv yog tug TSWV kws yog mej tug Vaajtswv.”

⁴⁴Yog le ntawd, Mauxes txhaj muab tej kevcai kws tug TSWV teem tseg nuav qha rua cov Yixalayees paub.