Read Hmong Njua Levis Kevcai 25 Bible Online

Levis Kevcai 25 - Hmong Njua bible

Levis Kevcai 25

¹Tug TSWV has rua Mauxes sau lub Roob Xinais has tas,

²“Koj has rua cov Yixalayees has tas, thaus mej moog nyob huv lub tebchaws kws tug TSWV muab pub rua mej lawm, mej yuavtsum fwm tug TSWV, xyoo xyaa mej tsi xob cog qoob rua huv mej tej laj tej teb.

³Mej muab rau lub xyoos cog qoobloo rua huv mej tej laj tej teb, taav mej tej txiv maab huv mej tej vaaj hab sau mej tej qoobloo lug ca.

⁴Tabsis xyoo xyaa yog xyoo kws ca tej laj tej teb ntawd su, rua qhov yog xyoo su rua tug TSWV. Tsi xob cog qoobloo rua huv mej tej laj tej teb hab tsi xob taav mej tej txiv maab huv mej tej vaaj le.

⁵Mej tsi xob moog hlais tej nplej kws nwg tuaj nwg huv mej tej laj tej teb kws tsi muaj tuabneeg tseb hab tsi xob moog dle tej txiv maab kws mej tsi tau taav; lub xyoo nuav yuavtsum ca lub tebchaws su, tsi xob ua ib yaam dlaabtsi le.

⁶Txawm yog xyoo ntawd tej laj tej teb su tsi cog qoobloo los mej yuav muaj zaub muaj mov txaus rua mej cov tubqhe, mej cov tub zug, cov tuabneeg txawv tebchaws kws nrug mej nyob,

⁷hab tej tsaj nyeg tsaj qus kws nyob huv mej lub tebchaws noj. Txhua yaam kws tuaj huv tej laj tej teb puavleej noj tau huv tuabsi.

⁸“Mej suav xyaa xyoo xyaa zag, taagnrho yog muaj plaub caug cuaj xyoos.

⁹Ces thaus lub xyaa hli ntuj nub xab kaug, yog nub theej txhoj, tso ib tug txivneej moog tshuab raaj tshuab xyu ncig thoob plawg huv mej lub tebchaws.

¹⁰Mej yuavtsum muab xyoo tsib caug ua xyoo tseemceeb rua mej hab tshaajtawm muab kev ywjpheej rua cov pejxeem suavdlawg huv mej lub tebchaws. Xyoo nuav tej teb kws mej yuav lug, yuavtsum thim rov qaab rua tug tswv qub lossis nwg tej xeebntxwv, hab txhua tug kws muab muag moog ua luas qhev lawm los yuavtsum xaa rov qaab moog rua nwg tsev tuabneeg.

¹¹Xyoo tsib caug ntawd, mej tsi xob cog qoob rua huv mej tej teb lossis hlais tej nplej kws nwg tuaj nwg lossis tsi xob dle tej txiv maab kws mej tsi tau taav huv mej tej vaaj txiv maab.

¹²Rua qhov xyoo ntawd, yog xyoo dlawbhuv rua mej; mej muab tej kws nwg tuaj nwg huv mej tej teb lug noj xwb.

¹³“Txhua yaam kws mej yuav lug, xyoo ntawd yuavtsum muab thim rov rua tug tswv qub.

¹⁴Yog mej muag mej tej teb rua mej cov kwvtij Yixalayees lossis mej yuav nwg tej teb, mej tsi xob ua tsi ncaaj rua ib leeg tug twg.

¹⁵Yuavtsum them tug nqe lawv le tej xyoo kws sau tau qoob huv dlaim teb ntawd ua ntej Xyoo kws thim Rov Qaab.

¹⁶Yog has tas ntau xyoo, yuavtsum them tug nqe ntau, tabsis yog tsawg xyoo kuj them tug nqe tsawg, rua qhovmuag lawv le tej qoob kws sau tau huv dlaim teb ntawd.

¹⁷Mej ib leeg tsi xob ua tsi ncaaj rua ib leeg, tabsis mej yuavtsum fwm tug TSWV kws yog mej tug Vaajtswv.

¹⁸“Mej yuavtsum ua lawv le tug TSWV tej kevcai hab tej lug saamfwm, mej txhaj yuav tau zoo nyob kaaj sab lug huv mej lub tebchaws.

¹⁹Mej lub tebchaws yuav ntsu qoobloo heev, mej yuav muaj noj muaj haus nplua mag hab tau zoo nyob kaaj sab lug.

²⁰“Tabsis mej nug has tas, yog xyoo xyaa ntawd peb tsi cog hab tsi sau qoobloo, peb yuav noj dlaabtsi txhaj le nyob dlhau xyoo?

²¹Xyoo rau tug TSWV yuav foom koob moov rua lub tebchaws kuas ntsu qoob heev txaus noj peb xyoos.

²²Xyoo yim thaus mej cog qoob rua huv mej tej teb los mej tseem tau tej qoob kws thaus xyoo rau mej sau ca ntawd lug noj, hab mej tseem yuav tau noj moog txug thaus mej hlais mej tej qoob tshab xyoo yim ntawd.

²³“Tsi xob muab koj dlaim teb muag tuag rua luas, rua qhov koj tsi yog tug tswv; dlaim teb ntawd yog Vaajtswv tug. Koj zoo le tug tuabneeg txawv tebchaws kws nrug kuv nyob xwb.

²⁴“Thaus muab dlaim teb muag rua lwm tug lawm, tug tswv qub muaj cai txhwv dlaim teb ntawd rov qaab lug ua nwg tug.

²⁵Yog cov Yixalayees leejtwg txomnyem hab raug yuam kuas muab nwg dlaim teb muag, nwg cov kwvtij txheeb ze yuavtsum moog txhwv dlaim teb ntawd rov qaab.

²⁶Yog leejtwg tsi muaj kwvtij txheeb ze paab txhwv dlaim teb rov qaab, tom qaab kws nwg muaj nyaj txaus nwg yuavtsum txhwv rov qaab.

²⁷Nwg yuavtsum suav txij xyoo kws nwg muag dlaim teb moog txug xyoo thim, saib tau pistsawg xyoo, nwg yuavtsum them nyaj ntxiv rua tug kws yuav nwg dlaim teb. Nwg txhaj yuav rov tau dlaim teb lug ua nwg tug.

²⁸Tabsis yog nwg tsi muaj nyaj txaus txhwv dlaim teb ntawd rov qaab, ces dlaim teb ntawd tseem nyob ntawm tug tswv kws nwg muab muag rua moog txug Xyoo Thim tej teb. Xyoo ntawd maam thim tau dlaim teb rov rua tug tswv qub.

²⁹“Yog leejtwg muag nwg lub tsev nyob huv lub nroog kws muaj ntsaa yeej, thawj xyoo kws txwm nkaus ib xyoos rua nub kws muag, nwg muaj cai txhwv tau rov qaab.

³⁰Tabsis yog nwg tsi txhwv rov qaab xyoo ntawd, ces nwg tsi muaj cai txhwv rov qaab lawm, lub tsev ntawd yuav yog tug kws nwg muab muag rua tug, hab nwg tej xeebntxwv tug moog le; thaus txug xyoo thim yuav tsi thim lub tsev lawm.

³¹Tabsis tej tsev kws nyob huv tej zog kws tsi muaj ntsaa yeej thaiv, ua ib yaam le tej teb ntaag, tug tswv tsev qub muaj cai txhwv tej tsev ntawd rov qaab thaus txug xyoo thim tej teb hab tej tsev ntawd yuavtsum thim huv tuabsi rov qaab.

³²“Txawm yog le caag los xij, cov Levis muaj cai txhwv puab tej vaaj tse huv tej nroog kws tub muab tu rua puab lawm rov qaab lub sijhawm twg los tau.

³³Yog cov Levis leejtwg muab nwg lub tsev huv tej nroog kws tu ua puab tug lawm muag hab tseem tsi tau txhwv rov qaab, thaus txug Xyoo Thim yuavtsum thim lub tsev ntawd rov qaab, rua qhov tej tsev ntawd nyob huv cov Levis tej nroog kws yog puab tug ntawm tsaav tuabneeg Yixalayees.

³⁴Tabsis tej teb kws nyob ibncig cov Levis tej nroog, tsi xob muab muag; tej ntawd yeej yog cov Levis tug moog ibtxhis le.

³⁵“Yog ib tug kwvtij Yixalayees kws nyob ze mej pluag hab tsi muaj noj tsi muaj haus, mej yuavtsum pub rua nwg kuas muaj noj muaj haus ib yaam le tug tuabneeg kws mej ndlav ua num, nwg txhaj nrug mej nyob taug.

³⁶Tsi xob tsub paajlaum rua nwg them, tabsis mej yuavtsum fwm Vaajtswv hab ca mej cov kwvtij Yixalayees nyob ze mej.

³⁷Tsi xob tsub paajlaum rua nwg them tej nyaj kws mej qev rua nwg, hab tsi xob muab mej tej qoob muag ua nqe kim kim rua nwg.

³⁸Kuv yog tug TSWV kws yog mej tug Vaajtswv kws coj mej nraag tebchaws Iziv lug, kuv muab lub tebchaws Kana-aas nuav rua mej nyob hab kuv yog mej tug Vaajtswv.

³⁹“Yog ib tug kwvtij Yixalayees kws nyob ze mej pluag heev hab nwg muab nwg muag ua mej qhev, mej tsi xob muab nwg ua num ib yaam le yog tug qhev.

⁴⁰Nwg nrug mej nyob ib yaam le tug tuabneeg kws mej ndlav ua mej tej num hab ua num rua mej moog txug Xyoo Thim xwb.

⁴¹Lub sijhawm ntawd, nwg hab nwg cov mivnyuas maam le tso mej tseg rov moog nrug nwg tsev tuabneeg nyob hab moog tuav nwg tej yawmkoob tej qubtxeeg qubteg.

⁴²Vim tsaav tuabneeg Yixalayees yog kuv cov tubkhai, hab kuv tau coj puab tawm nraag tebchaws Iziv lug, yuavtsum tsi xob muab puab muag moog ua luas qhev.

⁴³Mej tsi xob tswjfwm puab ntawm txujkev nruj tsiv hab tsimtxom, tabsis yuavtsum paub ntshai mej tug Vaajtswv.

⁴⁴Yog mej xaav tau tubqhe hab ntxhais qhev, mej yuavtsum muab nyaj moog yuav ntawm tej tsaav tuabneeg kws nyob puagncig mej xwb,

⁴⁵hab yuav tej tuabneeg txawv tebchaws kws nrug mej nyob tej mivnyuas lug ua mej qhev. Cov mivnyuas ntawd yog cov yug huv mej lub tebchaws, puab txhaj yog mej tuabneeg,

⁴⁶hab puab yuav ua mej tej tubki, tej tuabneeg los tau. Puab yuav ua num rua mej moog taag puab simneej, tabsis mej tsi xob ua le ntawd rua mej cov kwvtij Yixalayees.

⁴⁷“Tug tuabneeg txawv tebchaws kws nrug mej nyob, nwg muaj txag npluanuj, yog mej cov kwvtij Yixalayees leejtwg pluag hab nwg muab nwg muag rua tug tuabneeg txawv tebchaws lossis tug npluanuj ntawd ib tug kwvtij coj moog ua qhev;

⁴⁸tom qaab kws nwg muab nwg muag taag lawm, nwg cov kwvtij tseem muaj cai txhwv tau nwg rov qaab; nwg cov tijlaug, cov kwv,

⁴⁹cov yawm laug, cov txiv ntxawm, cov kwvtij lossis lwm tug kwvtij kws txheeb ze yuavtsum txhwv nwg lossis yog nwg muaj nyaj txaus, nwg yuavtsum them nyaj txhwv nwg rov qaab.

⁵⁰Nwg yuavtsum moog nrug tug kws yuav nwg ntawd saablaaj, hab obtug suav txij xyoo kws nwg muab nwg muag lug txug Xyoo Thim hab yuavtsum kom tug nqe kws txhwv nwg ntawd kuas npaum le tej nqe kws ndlav ib tug tub zug ntaag.

⁵¹Yog tseem tshuav ntau xyoo tug qhev ntawd yuavtsum thim tej nqe kws nwg tshuav ntawd ib nraab rov qaab lawv le tej xyoo kws nwg tshuav ntawd,

⁵²

⁵³ib yaam le yog tug tswv ntawd ndlav nwg ua num ib ntus xwb. Nwg tug tswv yuavtsum tsi xob ua limham rua nwg.

⁵⁴Yog nwg tsi txhwv nwg lawv le kws has lug nuav, txug Xyoo Thim, tug tswv yuavtsum tso nwg hab nwg cov mivnyuas moog.

⁵⁵Tsi pub cov Yixalayees ua luas qhev moog le. Rua qhov tsaav tuabneeg Yixalayees yog kuv cov tubkhai. Kuv yog tug coj puab tawm nraag tebchaws Iziv lug; kuv yog tug TSWV kws yog mej tug Vaajtswv.”