Read Hmong Njua Levis Kevcai 3 Bible Online

Levis Kevcai 3 - Hmong Njua bible

Levis Kevcai 3

¹Yog leejtwg muab nwg tug txiv nyuj lossis maum nyuj tua fij ua kev sis raug zoo, mas tug nyuj ntawd yuavtsum yog tug kws tsi muaj ib qhov phem hlo le.

²Tug txivneej ntawd yuavtsum tsaa nwg txais teg rua sau tug nyuj lub taubhau hab muab tug nyuj ntawd tua rua ntawm tug TSWV lub Tsevntaub sis ntsib lub qhovrooj. Ces Aloos cov tub kws yog cov povthawj muab cov ntshaav coj moog laub ywg thoob plawg lub thaaj

³hab muab tug tsaj ntawd tej nqaj le nraag nuav coj moog ua khoom fij sis raug zoo rua tug TSWV: Taagnrho cov npluag roj kws npug lub plaab, cov nyuv,

⁴ob lub raum hab tej roj kws npug ob lub raum, hab nplais sab kws zoo tshaaj plawg.

⁵Cov povthawj yuavtsum muab taagnrho tej ntawd hlawv rua sau lub thaaj kws yog hlawv nrug tej khoom fij. Tej paa khoom fij nuav tsw qaab ntxag ua rua tug TSWV txaus sab.

⁶Yog muab yaaj lossis tshis lug tua ua khoom fij ua kev sis raug zoo, muab tug txiv lossis tug maum los tau, tabsis yuavtsum muab tug kws tsi muaj ib qhov phem hlo le.

⁷Yog leejtwg muab ib tug yaaj fij,

⁸nwg yuavtsum tsaa nwg txhais teg rua sau tug yaaj ntawd taubhau hab muab tug yaaj ntawd tua rua ntawm hauv ntej tug TSWV lub Tsevntaub sis ntsib. Ces cov povthawj maam le muab cov ntshaav coj moog laub ywg thoob plawg rua lub thaaj,

⁹hab muab tug tsaj ntawd tej nqaj le nraag nuav coj moog ua khoom fij rua tug TSWV: Cov roj, tug kutwv nrug cov roj kws txav ti nkaus ntawm tug pobtxhaa ntsaag, tej npluag roj kws npug lub plaab, cov nyuv,

¹⁰ob lub raum hab tej roj kws npug ob lub raum hab nplais sab kws zoo tshaaj plawg.

¹¹Dlua le cov ntawd lawm, tug povthawj maam le muab coj moog hlawv taagnrho rua sau lub thaaj ua khoom fij rua tug TSWV.

¹²Yog leejtwg muab ib tug tshis fij,

¹³nwg yuavtsum tsaa teg rua sau tug tshis ntawd lub taubhau hab muab tug tshis ntawd tua rua ntawm hauv ntej tug TSWV lub Tsevntaub sis ntsib. Ces cov povthawj maam le muab cov ntshaav coj moog laub ywg thoob plawg lub thaaj,

¹⁴hab muab tug tsaj ntawd tej nqaj le nraag nuav coj moog fij rua tug TSWV: cov npluag roj kws npug lub plaab hab cov nyuv,

¹⁵ob lub raum hab tej roj kws npug ob lub raum hab nplais sab kws zoo tshaaj plawg.

¹⁶Dlua le cov ntawd lawm, tug povthawj maam le muab coj moog hlawv taagnrho rua sau lub thaaj, ua khoom fij tsw qaab ntxag rua tug TSWV. Taagnrho cov roj puavleej yog tug TSWV tug.

¹⁷Tsi pub cov Yixalayees ib tug twg noj tej roj lossis tej ntshaav le; qhov nuav yog ib txuj kevcai rua cov Yixalayees kws nyob txhua qhov coj moog ibtxhis le.