Read Hmong Njua Yelemis 11 Bible Online

Yelemis 11 - Hmong Njua bible

Yelemis 11

¹Tug TSWV has rua kuv tas,

²“Koj ca le ua tuab zoo noog kuv tej lug cog tseg nuav. Koj moog has rua cov Yudas hab cov tuabneeg kws nyob huv lub nroog Yeluxalees has tas

³kuv yog tug TSWV kws yog cov Yixalayees tug Vaajtswv, kuv tau foom tsi zoo rua txhua tug kws tsi coj hab tsi ua lawv le tej lug cog tseg nuav lawm.

⁴Tej lug nuav yog tej kws kuv cog tseg rua puab cov yawmkoob thaus kuv coj puab tawm nraag tebchaws Iziv kws zoo ib yaam le puab nyob huv lub qhovcub nchuav hlau lug. Kuv has kuas puab noog kuv lug hab ua lawv le kuv tej lug saamfwm. Kuv has rua puab tas, yog puab noog kuv lug, puab yuav ua kuv tsaav tuabneeg, hab kuv yuav ua puab tug Vaajtswv.

⁵Ces kuv yuav ua lawv le tej lug kws kuv cog tseg rua puab cov yawmkoob has tas, kuv yuav muab lub tebchaws aav rog hab zoo qoob rua puab kws nwgnuav puab tub tau lawm.” Kuv teb tug TSWV has tas, “Kuv yuav ua le ntawd.”

⁶Thaus ntawd tug TSWV has rua kuv tas, “Koj ca le moog rua huv cov Yudas tej nroog hab tom tej kev huv lub nroog Yeluxalees. Koj qha kuv tej lug rua puab noog hab kuas puab ua lawv le kuv tej lug cog tseg nuav.

⁷Thaus kuv coj puab cov yawmkoob tawm nraag tebchaws Iziv lug, kuv ntuag puab nyaav kawg kuas puab noog kuv lug hab kuv tseem naj nub ntuag puab lug txug nwgnuav.

⁸Tabsis puab tsi noog hab tsi ua lawv le kuv tej lug le. Puab tseem tawv ncauj hab ua phem ib yaam le qub. Kuv kuas puab ua lawv le kuv tej lug cog tseg, tabsis puab tsi ua. Kuv txhaj rau txim rua puab lawv le tej lug kws kuv has tseg lawm.”

⁹Tom qaab ntawd tug TSWV has rua kuv tas, “Cov Yudas hab cov tuabneeg kws nyob huv lub nroog Yeluxalees taabtom tuavhuv tawmtsaam kuv.

¹⁰Puab rov ua tej kev txhum kws puab cov yawmkoob ua. Puab cov yawmkoob tsi ua lawv le tej lug kws kuv has. Puab pe luas tej vaajtswv. Cov Yixalayees hab cov Yudas rhuav tej lug kws kuv cog tseg rua puab cov yawmkoob lawm.

¹¹Yog le ntawd, kuv kws yog tug TSWV txhaj qha rua puab has tas, kuv yuav tso kev puamtsuaj lug raug puab hab puab yuav tsiv tsi dlim le. Thaus puab thov kuv paab, kuv yuav tsi noog puab tej lug thov.

¹²Thaus ntawd, cov Yudas hab cov tuabneeg kws nyob huv lub nroog Yeluxalees yuav moog thov tej vaajtswv kws puab teev hab pe kuas paab puab. Tabsis thaus kws kev puamtsuaj tuaj ti puab lawm, tej vaajtswv ntawd yuav paab tsi tau puab le.

¹³Cov Yudas tej mlom ntau npaum nkaus le puab tej nroog, hab cov tuabneeg kws nyob huv lub nroog Yeluxalees teeb thaaj teev tug mlom Npa-aas kws phem qas ntau npaum nkaus le tej kev huv lub nroog.

¹⁴Yelemis, koj tsi xob thov kuv paab cov tuabneeg nuav. Thaus puab raug kev txomnyem, puab thov kuv paab, kuv yuav tsi noog puab tej lug.”

¹⁵Tug TSWV has tas, “Cov tuabneeg kws kuv hlub taabtom ua phem ua qas. Puab muaj cai tuaj huv kuv lub Tuamtsev ua dlaabtsi? Puab xaav has tas, puab tuaj coglug hab muab tsaj tua hlawv fij, ces puab txawm yuav dlim kev puamtsuaj nua los? Hab puab yuav muaj kev zoo sab nua los?

¹⁶Muaj ib zag kuv hu has tas, puab yog tsob txiv ntoo roj kws muaj nplooj tsaus nti hab txi txiv zoo nkauj kawg; tabsis nwgnuav kuv yuav muab suavtawg hlawv tej nplooj kuas kub nyab cig nrov nroo ntwg cuag xub nroo hab muab tej ceg luv huv tuabsi.

¹⁷“Kuv yog tug TSWV kws muaj Fwjchim Luj kawg nkaus, yog tug kws cog cov Yixalayees hab cov Yudas; tabsis nwgnuav kuv has rua puab tas, kuv yuav tso kev puamtsuaj lug raug puab. Puab rov ua rua puab raug kev puamtsuaj, rua qhov puab ua txhum; puab tua tsaj fij rua Npa-aas txhaj ua rua kuv chim.”

¹⁸Tug TSWV qha rua kuv paub has tas, kuv cov yeebncuab tuavhuv yuav tua kuv.

¹⁹Thaus tug TSWV tsi tau qha rua kuv paub, kuv zoo ib yaam le tug mivnyuas yaaj kws luas yuav caab moog tua. Kuv tsi paub has tas luas tub tuavhuv yuav ua phem rua kuv. Luas has tas, “Peb ca le muab tsob ntoo kws tseem khov kho ntawd ntuv povtseg; ca le muab nwg tua kag, txhaj tsi muaj leejtwg ncu txug nwg le lawm.”

²⁰Kuv thov tug TSWV has tas, “Tug TSWV kws muaj Fwjchim Luj kawg nkaus, koj yog tug kws txav txim ncaaj nceeg; koj paub tuabneeg lub sab hab tej kev xaav. Kuv thov koj ua pauj cov tuabneeg ntawd rua kuv pum ntsoov, rua qhov kuv tub muab kuv rooj plaub tso rua koj has lawm.”

²¹Cov tuabneeg Anathaus xaav muab kuv tua povtseg, puab has rua kuv tas, yog kuv pheej cev tug TSWV tej lug, puab yuav muab kuv tua povtseg.

²²Yog le ntawd, tug TSWV kws muaj Fwjchim Luj kawg nkaus has tas, “kuv yuav rau txim rua puab txhua tug! Puab tej tub hluas yuav raug nav ntaaj nav rag tuag; puab tej mivnyuas yuav tuag taag rua kev tshaib kev nqhes.

²³Kuv tub teem sijhawm tso kev puamtsuaj lug raug cov tuabneeg Anathaus lawm, thaus txug lub sijhawm ntawd, puab yuav tsi dlim ib tug le.”