Read Hmong Njua Yelemis 13 Bible Online

Yelemis 13 - Hmong Njua bible

Yelemis 13

¹Tug TSWV has kuas kuv moog yuav ib txuj hlaab ntaub maag lug sa, tabsis nwg has rua kuv tas, “Koj tsi xob muab raus dlej le.”

²Yog le ntawd, kuv txhaj moog yuav tau ib txuj hlaab ntaub maag lug sa.

³Tug TSWV rov has rua kuv tas,

⁴“Koj ca le moog rua ntawm tug Dlej Efalates hab muab txuj hlaab ntawd zais rua huv ib lub qhov ntawm cov pobzeb.”

⁵Kuv txhaj coj txuj hlaab ntawd moog zais ze rua ntawm ntug Dlej Efalates lawv le tug TSWV has rua kuv.

⁶Tau tsi ntev tom qaab nuav, tug TSWV has kuas kuv rov moog muab txuj hlaab ntawm tug dlej Efalates lug.

⁷Yog le ntawd kuv txhaj rov moog, thaus kuv moog txug ntawm qhov chaw kws kuv zais txuj hlaab, kuv pum has tas txuj hlaab tub lwj taag tsi zoo lawm.

⁸Tug TSWV rov has rua kuv tas,

⁹“Qhov nuav yog qha rua koj paub has tas, kuv yuav rhuav cov Yudas hab cov tuabneeg kws nyob huv lub nroog Yeluxalees txujkev khaavtheeb kuas puamtsuaj taag.

¹⁰Cov tuabneeg ua phem ua qas nuav tsi noog kuv lug. Puab tawv ncauj hab ua phem ua qas tshaaj yaav taag lug, puab teev hab pe lwm tsaav tuabneeg tej vaajtswv. Yog le ntawd puab yuav zoo ib yaam le txuj hlaab kws lwj taag tsi zoo siv lawm.

¹¹Kuv xaav kuas cov Yixalayees hab cov Yudas cog ruaj rua ntawm kuv ib yaam le txuj hlaab kws khi ruaj rua ntawm dluav. Kuv ua le ntawd kuas puab txhaj tau ua kuv tsaav tuabneeg, qhuas kuv hab fwm kuv lub npe; tabsis puab tsi noog kuv lug le.”

¹²Tug TSWV kws yog Vaajtswv has rua kuv tas, “Yelemis, koj has kuas cov Yixalayees ntim cawv txiv maab puv nkaus txhua lub hub. Puab yuav teb koj has tas, puab paub has tas yuavtsum ntim cawv txiv maab kuas puv txhua lub hub.

¹³Koj has rua puab tas, kuv kws yog tug TSWV, kuv yuav muab cawv txiv maab txhaus cov tuabneeg kws nyob huv lub tebchaws nuav, tsi has cov vaajntxwv kws yog Daviv cov xeebntxwv, cov povthawj, cov cev kuv lug, hab cov tuabneeg kws nyob huv lub nroog Yeluxalees moog txug thaus puab qaug cawv huv tuabsi.

¹⁴Ces kuv yuav muab puab tsoo kuas tawg ib yaam le cov hub sis tsoo tawg, tsi has tug laug lossis tug hluas los yuav tuag taag. Kuv yuav muab puab tua kuas tuag taag, tsi mov tsi tshua lossis tsi hlub puab le.”

¹⁵Cov Yixalayees, tug TSWV tub has lawm! Ca le txu fwjchim hab noog nwg lug.

¹⁶Fwm tug TSWV kws yog mej tug Vaajtswv ua ntej kws nwg tsi tau tso kev puamtsuaj lug, hab ua ntej mej kutaw dlawm qaug sau tej roob; ua ntej nwg muab qhov kaaj kws mej xaav tau hloov ua qhov tsaus dlub ncab.

¹⁷Yog mej tsi noog lug, kuv yuav moog quaj tuabywv nyob ib qho, vim mej txujkev khaavtheeb; kuv yuav quaj tu sab heev, kuas kuv tej kua muag ndlwg si laim, rua qhov tug TSWV tsaav tuabneeg raug luas nteg moog lawm.

¹⁸Tug TSWV has rua kuv tas, “Koj ca le has kuas vaajntxwv hab nwg nam ca le nqeg sau lub zwmtxwv lug, rua qhov obtug ob lub mom kub tub poob sau obtug taubhau lug lawm.

¹⁹Tej nroog kws nyob huv tebchaws Yudas saab qaabteb, luas tub tuaj vij taag lawm, tsi muaj leejtwg moog tau rua huv tej nroog ntawd le. Cov Yudas raug nteg huv tuabsi lawm.”

²⁰Yeluxalees, koj ca le tsaa qhovmuag saib! Koj tej yeebncuab taabtom tuaj saab qaumteb tuaj! Cov tuabneeg kws muab tso rua koj saib kws ua rua koj khaav nyob qhov twg lawm?

²¹Thaus cov tuabneeg kws koj xaav has tas yog koj cov phoojywg tuaj tua yeej koj hab tswjfwm koj, koj yuav has le caag? Yuav mob koj npaum nkaus le tug quaspuj kws taabtom mob plaab yuav yug mivnyuas.

²²Yog koj nug has tas, “Vim le caag tej xwm nuav txhaj lug raug kuv? Vim le caag luas dlua kuv tej rig tsho ndluag taag hab yuam kuv? Tub vim yog koj ua kev txhum ntau heev.

²³Tug tuabneeg tawv dlub puas hloov tau nwg dlaim tawv kuas dlawb lossis tug tsuv txaij puas hloov tau kuas tsi xob txaij? Yog has tas, ob yaam kws has nuav hloov tau, tsi taag koj yuav qha, tej tuabneeg sab phem yeej yuav hloov ua tau tuabneeg zoo.

²⁴Tug TSWV yuav ua kuas koj tawg ri sua ib yaam le tej quavnyaab kws cov cua tom taj suabpuam ntsawj.

²⁵Tug TSWV has tas, tej nuav yog tej kws koj tau. Tej nuav yog tej kws kuv npaaj tseg rua koj, rua qhov koj tau tso kuv tseg hab ca sab rua tej vaajtswv cuav.

²⁶Tug TSWV yuav hle koj cev rig tsho kuas koj labqaab hab txaajmuag.

²⁷Nwg pum ntsoov koj ua tej kws nwg ntxub. Hab nwg pum ntsoov koj moog pe luas tej vaajtswv sau tej ncov roob hab huv tej taj nraag, ib yaam le tug txivneej kws nyaag nrhw thaam luas tej quaspuj lossis ib yaam le tug txiv neeg xob kws lawv quas ncav tej maum neeg qaab. Cov tuabneeg kws nyob huv lub nroog Yeluxalees, mej puamtsuaj lawm! Thaus twg mej maam le ua tau tuabneeg zoo?”