Read Hmong Njua Yelemis 34 Bible Online

Yelemis 34 - Hmong Njua bible

Yelemis 34

¹Tug TSWV has rua kuv thaus lwm tsaav tuabneeg tej tubrog tuaj paab Vaajntxwv Nenpukajnexales kws kaav tebchaws Npanpiloos hab nwg cov tubrog hab cov tuabneeg kws zwm rua nwg tuaj ntaus lub nroog Yeluxalees hab tej nroog kws nyob ibncig ntawd.

²Tug TSWV kws yog cov Yixalayees tug Vaajtswv kuas kuv moog has rua Vaajntxwv Xedekiyas kws kaav tebchaws Yudas tas, “Kuv kws yog tug TSWV, yuav muab lub nroog nuav cob rua tug vaajntxwv kws kaav tebchaws Npanpiloos, nwg yuav muab hlawv kuas kub nyab taag.

³Koj yuav tsiv tsi dlim le; koj yuav raug luas nteg coj moog cob rua Nenpukajnexales. Koj yuav tau moog ntsib nwg hab nrug nwg thaam tim ntsej tim muag, ces nwg yuav coj koj moog rua tim tebchaws Npanpiloos.

⁴Xedekiyas, koj ca le noog tej lug kws kuv has txug koj, koj yuav tsi raug tua tuag rua huv tshaav rog.

⁵Koj yuav tuag kaaj sab lug, luas yuav hlawv tshuaj tsw qaab rua koj hab log koj ib yaam le thaus u luas hlawv tshuaj tsw qaab hab log koj cov yawmkoob, hab cov vaajntxwv kws tuag ua ntej lawm. Puab yuav quaj nyav koj has tas, ‘Peb tug vaajntxwv tuag lawm!’ Kuv yog tug TSWV kws has le ntawd.”

⁶Kuv txhaj coj tug TSWV tej lug moog has rua Vaajntxwv Xedekiyas kws nyob huv Yeluxalees

⁷thaus tug vaajntxwv kws kaav tebchaws Npanpiloos cov tubrog tuaj tua lub nroog Yeluxalees, hab tua cov Yudas lub nroog Lakhis hab Axekas kws yog ob lub nroog huv tebchaws Yudas kws tseem muaj ntsaa yeej thaiv.

⁸Vaajntxwv Xedekiyas hab cov pejxeem kws nyob huv lub nroog Yeluxalees coglug has tas,

⁹puab yuav tso cov Henplais kws ua luas qhev kuas dlim kev ua qhev, tsi has quaspuj lossis txivneej, kuas cov kwvtij Henplais tsi muaj ib tug ua luas qhev le.

¹⁰Cov thawjcoj hab tej pejxeem suavdlawg pum zoo tso puab tej qhev hab tsi yuam puab ua qhev ntxiv lawm. Puab tau tso cov qhev ntawd tag,

¹¹tabsis tom qaab ntawd tsi ntev, puab hloov sab hab moog coj cov qhev rov lug ua qhev dlua.

¹²Ces tug TSWV,

¹³kws yog cov Yixalayees tug Vaajtswv kuas kuv moog has rua cov tuabneeg tas, “Kuv tau coglug rua mej cov yawmkoob thaus kws kuv tso puab tawm nraag tebchaws Iziv lug, kuas puab dlim ntawm txujkev ua luas qhev. Kuv has rua puab tas

¹⁴cov tuabneeg Henplais kws nwg muab nwg muag ua qhev hab ua num rua puab puv rau lub xyoos lawm, xyoo xyaa puab yuavtsum tso cov qhev ntawd, tabsis mej cov yawmkoob tsi quavntsej lossis tsi noog kuv has le.

¹⁵Ob peb nub kws dlhau lug ntawd, mej tau hloov sab ua kuas hum kuv sab nyam. Mej suavdlawg yeej pum zoo tso mej cov kwvtij Henplais kws ua mej qhev, hab coglug taabmeeg kuv huv lub Tuamtsev kws mej pehawm kuv.

¹⁶Tabsis mej rov hloov sab hab saib tsi taug kuv. Mej rov moog coj cov qhev kws mej tub muab tso moog lawm rov lug hab yuam kuas puab ua mej qhev dlua.

¹⁷Yog le ntawd, nwgnuav kuv kws yog tug TSWV has rua mej tas, mej yeej tsi noog kuv lug; mej tsi tso mej tej kwvtij Henplais kuas dlim kev ua qhev. Yog le ntawd, kuv yuav tso mej nyob ywjpheej: Yog kev ywjpheej moog tuag rua huv tshaav rog, tuag rua kev tshaib kev nqhes, hab tuag rua kaab mob kev nkeeg. Kuv yuav ua kuas txhua tsaav tuabneeg thoob nplajteb ntshai, vim tej kws kuv ua rua mej.

¹⁸Cov numtswv huv tebchaws Yudas, huv lub nroog Yeluxalees, huv lub loog, cov povthawj hab cov thawjcoj tau coglug rua kuv hab tua ib tug txiv nyuj muab phua ua ob saab, hab puab moog huv kis nruab nraab, tabsis nwgnuav puab rhuav tsi ua lawv le puab tej lug cog tseg. Yog le ntawd, kuv yuav ua rua puab ib yaam le puab ua rua tug txiv nyuj ntawd.

²⁰Kuv yuav muab puab cob rua puab tej yeebncuab kws nrhav nrhw tua puab tua povtseg. Tej tsaj qus hab noog yuav lug noj puab.

²¹Kuv yuav muab Vaajntxwv Xedekiyas kws kaav tebchaws Yudas hab nwg cov numtswv cob rua cov tuabneeg kws nrhav nrhw tua puab tua povtseg. Kuv yuav muab puab cob rua cov tubrog Npanpiloos kws tub thim rov qaab lawm.

²²Kuv yuav has rua puab, kuas puab tig rov lug rua huv lub nroog. Puab yuav tua lub nroog, txeeb lub nroog hab hlawv lub nroog kuas kub nyab taag. Kuv yuav ua kuas cov Yudas tej nroog zoo ib yaam le lub taj suabpuam kws tsi muaj tuabneeg nyob. Kuv yog tug TSWV kws has le ntawd.”