Read Hmong Njua Yelemis 43 Bible Online

Yelemis 43 - Hmong Njua bible

Yelemis 43

¹Thaus kuv pav tug TSWV kws yog puab tug Vaajtswv tej lug txhua yaam kws nwg khaiv kuv moog qha rua puab taag.

²Ces Axaliyas kws yog Hausaiyas tug tub, Kaleyas tug tub Yauhanaas, hab cov tuabneeg khaavtheeb txawm has rua kuv tas, “Koj dlaag xwb. Tug TSWV kws yog peb tug Vaajtswv yeej tsi tau khaiv koj tuaj has kuas peb tsi xob tsiv moog nyob nraag tebchaws Iziv.

³Yeej yog Neliyas tug tub Npalus rau tswvyim rua koj tuaj tawmtsaam peb, muab peb cob rua cov Npanpiloos kuas tua peb lossis nteg peb coj moog rua tim tebchaws Npanpiloos xwb.”

⁴Yog le ntawd, tsi has Yauhanaas lossis cov thawj tubrog lossis cov pejxeem los yeej tsi noog tug TSWV kws yog puab tug Vaajtswv tej lug saamfwm kuas nyob tuabywv huv lub tebchaws Yudas le.

⁵Ces Yauhanaas hab cov thawj tubrog txhaj coj cov pejxeem kws nyob huv lub tebchaws Yudas hab cov tuabneeg kws raug ntab tawm moog lwm tebchaws rov qaab lug ntawd huv tuabsi moog rua nraag tebchaws Iziv lawm:

⁶tsi has cov txivneej, tej quaspuj mivnyuas, vaajntxwv cov ntxhais, cov tuabneeg kws tug thawj tubrog Nenpuxaladaas tso rua Nkedaliyas saib, coj Npalus hab kuv nrug puab moog.

⁷Puab tsi noog tug TSWV tej lug saamfwm, puab moog nyob rua nraag tebchaws Iziv hab moog nyob rua huv lub nroog Tapahes.

⁸Thaus peb nyob ntawm Tapahes, tug TSWV has rua kuv tas,

⁹“Koj ca le muab ib cov pobzeb luj lug faus rua huv plawv txujkev kws pua roj maab kws moog rua ntawm Vaajntxwv Falaus lub loog kws nyob huv lub nroog Tapahes. Koj ua le nuav rua cov Yudas saib ntsoov.

¹⁰Koj qha rua puab has tas, kuv yog tug TSWV kws yog cov Yixalayees tug Vaajtswv kws muaj Fwjchim Luj kawg nkaus, yuav coj kuv tug tubkhai kws yog Vaajntxwv Nenpukajnexales kws kaav tebchaws Npanpiloos tuaj rua ntawm thaaj chaw nuav, hab nwg yuav teeb nwg lub zwmtxwv hab tsaa nwg lub tsevntaub rua sau cov pobzeb kws koj faus nuav.

¹¹Nenpukajnexales yuav tuaj tua yeej lub tebchaws Iziv, cov tuabneeg kws teem tseg kuas tuag rua kaab mob kev nkeeg, yuav tuag rua kaab mob kev nkeeg, cov kws teem tseg kuas raug nteg, yuav raug luas nteg hab cov kws teem tseg kuas tuag rua nav ntaaj nav rag, yuav tuag rua nav ntaaj nav rag.

¹²Kuv yuav hlawv cov Iziv tej tuamtsev kws puab teev puab tej vaajtswv, hab tug vaajntxwv kws kaav tebchaws Npanpiloos yuav muab puab tej vaajtswv hlawv lossis coj moog. Tug yug yaaj ntxhua nwg tej rig kuas tuv tuag taag le caag, ces tug vaajntxwv kws kaav tebchaws Npanpiloos yuav tuaj muab lub tebchaws Iziv nuav rhuav kuas dlu lug le ntawd, hab nwg yuav rov kaaj sab lug moog lawm.

¹³Nwg yuav rhuav tej ncej zeb tseemceeb ntawm lub nroog Heli-aupulis huv tebchaws Iziv, hab hlawv tej tuamtsev kws cov Iziv pe puab tej vaajtswv povtseg.”