Read Hmong Njua Exekees 18 Bible Online

Exekees 18 - Hmong Njua bible

Exekees 18

¹Tug TSWV has rua kuv tas:

²“Zaaj paajlug kws tej tuabneeg naj nub has huv tebchaws Yixalayees yog dlaabtsi? ‘Nam txiv noj txiv qaub, tabsis mivnyuas lug quavncaug.’ ”

³Tug TSWV kws kaav ib puas tsaav yaam has tas, “Kuv yog Vaajtswv tug kws muaj sa nyob. Kuv yuav tsi pub mej naj nub has zaaj paajlug nuav huv lub tebchaws Yixalayees ntxiv lawm.

⁴Txhua tug txujsa yog kuv le, tsi has nam txiv hab mivnyuas huv tuabsi. Tug twg ua txhum, tug ntawd tuag xwb.

⁵“Pevxaam has tas, muaj ib tug tuabneeg zoo kws sab ncaaj hab ua ncaaj ua nceeg,

⁶nwg tsi pe cov Yixalayees tej mlom hab tsi noj tej khoom fij rua mlom ntawm qhov chaw kws txwv tsi pub pe mlom. Nwg tsi tau ntxag tej quaspuj lossis tsi nrug tug quaspuj kws tseem coj ntxhua pw.

⁷Nwg tsi dlaag lossis tsi nyag leejtwg. Nwg thim tej kws luas coj tuaj yuam nqe ntawm nwg rov rua luas, nwg pub zaub mov rua cov tuabneeg tshaib nqhes noj lossis muab rig tsho rua cov tuabneeg labqaab naav.

⁸Nwg tsi qev nyaj rua leejtwg kuas them paajlaum. Nwg tsi ua kev phem kev qas, hab nwg txav txim ncaaj nceeg rua cov kws muaj xaiv muaj lug.

⁹Tug tuabneeg kws ua le ntawd yog tug kws fwm kuv tej lug saamfwm hab coj lawv le kuv tej kevcai. Nwg yog tug ncaaj nceeg hab nwg yuav muaj sa nyob. Tug TSWV kws kaav ib puas tsaav yaam has le ntawd.

¹⁰“Pevxaam has tas, tug tuabneeg ntawd muaj ib tug tub ua tubsaab hab tua tuabneeg, nwg ua tej kws has lug sau nuav ib yaam

¹¹kws leej txiv tsi tau ua ib zag le. Nwg noj tej khoom kws fij rua mlom ntawm qhov chaw kws txwv tsi pub pe mlom, hab ntxag luas tej quaspuj,

¹²nwg dlaag ntxag cov tuabneeg pluag, nwg ua tubsaab hab nwg tsi thim tej kws luas coj tuaj yuam nqe ntawm nwg rov rua luas. Nwg moog pe mlom hab ua kev phem kev qas,

¹³nwg qev nyaj rua luas kuas luas them paajlaum. Nwg puas yuav muaj sa nyob? Nwg yuav tsi muaj. Nwg tau ua tej kev phem kev qas nuav, mas nwg yuav tuag. Nwg yuav ris nwg lub txim ntawd tuag.

¹⁴“Pevxaam has tas, muaj dlua ib tug txivneej muaj ib tug tub. Tug tub ntawd pum txhua yaam kev txhum kws leej txiv ua, tabsis nwg tsi ua phem lawv le leej txiv ua.

¹⁵Nwg tsi moog pe cov Yixalayees tej mlom, tsi noj tej khoom kws fij rua tej mlom ntawm qhov chaw kws txwv tsi pub pe mlom, hab nwg tsi ntxag luas tej quaspuj,

¹⁶tsi tsimtxom lossis nyag leejtwg tug. Nwg thim tej kws luas coj tuaj yuam nqe ntawm nwg rov rua luas. Nwg pub zaub mov rua cov tuabneeg tshaib nqhes noj hab muab rig tsho rua cov tuabneeg labqaab naav.

¹⁷Nwg tsi ua kev phem kev qas, hab tsi qev nyaj rua leejtwg kuas them paajlaum. Nwg ua lawv le kuv tej kevcai hab coj lawv le kuv tej lug saamfwm. Nwg yuav tsi tuag vim nwg txiv tej kev txhum, tabsis nwg yuav muaj sa nyob.

¹⁸Tabsis nwg txiv ua tubsaab, fuab luas tug hab nwg naj nub ua phem ua qas rua txhua tug, yog le ntawd nwg yuav tuag vim nwg tej kev txhum.

¹⁹“Tabsis mej nug has tas, ‘Yog le caag tug tub txhaj tsi raug txim vim leej txiv tej kev txhum? Lu lug teb mas yog tug tub ua ncaaj hab ua zoo. Nwg ceev hab ua lawv le kuv tej kevcai, nwg txhaj muaj sa nyob.

²⁰Tsuas yog tug kws ua txhum txhaj yuav tuag xwb. Tug tub yuav tsi raug txim vim leej txiv tej kev txhum, hab leej txiv yuav tsi raug txim vim tug tub tej kev txhum. Tug tuabneeg ncaaj nceeg yuav tau nqe zug vim nwg ua ncaaj. Hab tug tuabneeg tsi ncaaj yuav raug txomnyem vim tej kev phem kev qas kws nwg ua.

²¹“Tug tuabneeg kws tso nwg tej kev txhum tseg hab ua lawv le kuv tej kevcai, nwg xyum coj ncaaj hab ua zoo, nwg yuav tsi tuag; tabsis yuav muaj sa nyob.

²²Kuv yuav zaam nwg tej kev txhum huv tuabsi hab nwg yuav muaj sa nyob, rua qhov nwg coj ncaaj.

²³Tug TSWV kws kaav ib puas tsaav yaam has tas, ‘Mej xaav has tas, kuv xaav pum tug tuabneeg ua txhum tuag nua los. Tsi yog le ntawd, kuv tsuas xaav pum tug tuabneeg txhum tso nwg tej kev txhum tseg hab muaj sa nyob xwb.

²⁴“ ‘Yog muaj ib tug tuabneeg ncaaj nceeg tso nwg txujkev ua zoo tseg, hab moog ua kev phem kev qas, ib yaam le cov tuabneeg ua phem ua qas ua, tug ntawd puas yuav muaj sa nyob? Tsi yog le ntawd! Kuv yuav tsi suav tej kws nwg tau ua zoo yaav taag lug le, nwg yuav tuag vim nwg tej kev txhum hab tsi muab sab npuab kuv.’

²⁵“Tabsis mej has tas, ‘Tej kws tug TSWV kws kaav ib puas tsaav yaam ua, nwg ua tsi ncaaj.’ Mej cov Yixalayees, ca le noog kuv has. Mej xaav has tas, tej kws kuv ua, kuv ua tsi ncaaj nua los? Mej yog cov kws ua tsi ncaaj ntaag!

²⁶Thaus tug tuabneeg ncaaj nceeg tso nwg txujkev ua zoo tseg, hab moog ua kev phem kev qas, nwg yuav tuag; nwg tuag vim tej kev phem kev qas kws nwg ua.

²⁷Thaus tug tuabneeg tsi ncaaj nceeg tso nwg tej kev txhum tseg, rov lug coj ncaaj hab ua zoo, nwg yuav tau txujsa.

²⁸Nwg thim xaav hab tso kev txhum tseg, yog le ntawd, nwg yuav tsi tuag, tabsis yuav muaj sa nyob.

²⁹Mej cov Yixalayees has tas, ‘Tej kws tug TSWV kws kaav ib puas tsaav yaam ua, nwg ua tsi ncaaj.’ Mej xaav has tas tej kws kuv ua, kuv ua tsi ncaaj nua los? Mej yog cov kws ua tsi ncaaj ntaag.

³⁰“Kuv kws yog tug TSWV kws kaav ib puas tsaav yaam has rua mej cov Yixalayees has tas, kuv yuav txav txim rua mej txhua tug lawv le teg num kws mej tau ua lug lawm. Ca le tso mej tej kev phem kev qas tseg, tsi xob ca mej tej kev txhum coj mej moog raug kev puamtsuaj.

³¹Mej ca le tso plhuav tej kev phem kev qas kws mej naj nub ua tseg, muab lub sab tshab hab txujkev xaav tshab lug coj. Vim le caag mej cov Yixalayees yuav xaav tuag ua luaj?

³²Tug TSWV kws kaav ib puas tsaav yaam has tas, ‘Kuv tsi xaav kuas ib tug twg tuag le. Ca le tso mej tej kev txhum tseg, mej txhaj muaj sa nyob.’ ”