Read Hmong Njua Exekees 19 Bible Online

Exekees 19 - Hmong Njua bible

Exekees 19

¹Tug TSWV has kuas kuv hu zaaj nkauj quaj ntsuag nuav rua cov Yixalayees ob tug nom:

²Meb nam zoo ib yaam le tug maum tsuv ntxhuav! Nwg tu nwg cov mivnyuas luj hlub nrug cov txiv tsuv ntxhuav kws nyaum heev.

³Nwg tu tug mivnyuas ntawd hab qha kuas txawj moog nrhav noj; nwg txhaj ua ib tug tsaj kws noj tuabneeg.

⁴Ntau tsaav tuabneeg nov nwg lub moo hab khawb qhov tog nwg kev. Luas muab nqailauj nqai nwg caab moog rua nraag tebchaws Iziv lawm.

⁵Thaus nwg pum has tas qhov kws nwg naj nub tog tsi muaj qaabhau, nwg taag kev ca sab. Nwg tu dlua ib tug mivnyuas, tug ntawd luj hlub ua ib tug tsuv ntxhuav kws nyaum heev.

⁶Thaus nwg luj hlub tav ib tug txiv tsuv ntxhuav lawm, nwg nrug lwm cov tsuv ntxhuav moog nrhav tum tsaj. Nwg xyum moog tum tsaj hab ua ib tug tsaj kws noj tuabneeg.

⁷Nwg tsoo luas tej chaw faajxwm, hab rhuav luas tej nroog puag taag. Txhua zag kws nwg nyooj ua rua cov tuabneeg huv lub tebchaws ntawd ntshai heev.

⁸Ntau tsaav tuabneeg sis sau ua ke tuaj tua nwg; muaj tuabneeg coob heev tuaj txhua qhov chaw tuaj. Puab nthuav puab tej vaag khwb hab nteg tau nwg.

⁹Puab muab nwg kaw rua huv ib lub nkuaj hab coj nwg moog cuag cov Npanpiloos tug vaajntxwv. Puab tso tuabneeg zuv rawv nwg tsi pub nwg nyooj, kuas tsi nov nwg lub suab nyooj sau tej roob kws nyob huv tebchaws Yixalayees lawm.

¹⁰Meb nam zoo ib yaam le tsob txiv maab kws cog ze rua ntawm ntug dlej. Nyob qhov ntawd muaj dlej nplua mag, tsob txiv maab muaj nplooj tsaus nti hab txi txiv ncw heev.

¹¹Tsob txiv maab tej ceg khov heev, hab ua tau vaajntxwv tej cwj. Hab tsob txiv maab sab heev moog nto plawg sau cov fuab; txhua tug pum tsob txiv maab ntawd muaj nplooj ntau hab sab heev.

¹²Tabsis txawm muaj tuabneeg limham muab nwg dlob povtseg. Cov cua saab nubtuaj ntsawj ua rua nwg cov txiv qhuav; hab nwg tej ceg ntshua taag; hab luas muab tej ceg qhuav coj moog hlawv povtseg taag.

¹³Nwgnuav luas muab nwg coj moog cog rua tom taj suabpuam; ntawm thaaj aav kws tsi muaj dlej.

¹⁴Tabsis suavtawg ca le cig sau tej ntsis txiv maab; kub tej ceg hab tej txiv taag dlu lug. Cov ceg ntawd tsi khov hab tsi tau ua vaajntxwv tej cwj lawm. Ntawm nuav yog zaaj nkauj quaj ntsuag kws luas hu taag rov hu dlua.